Duha ka sibilyan ang gipatay ug unom ang iligal nga giaresto sa mga pwersa sa estado sukad tunga-tunga sa Marso hangtod Abril 7. Samtang, bangis nga gibungkag sa kapitalista ang paglihok sa mga mamumuo sa usa ka pabrika sa Laguna.

Pagpatay. Sa Sorsogon, gipusil sa mga elemento sa 31st IB si James Quiñones, 24 anyos nga mamumuo, samtang nagpaabot sa bangka paingon sa sentro sa lungsod niadtong Marso 25 sa Barangay Juan Andre, Donsol. Gipasangil sa militar nga naigo sa ligaw nga bala ang biktima, apan gipanghimakak kini sa pamilya kay tadtad sa bala ang iyang lawas.

Sa Negros Oriental, namatay kay nahutdan og dugo ang mag-uuma nga si Edgar Tingting, 50, sa Barangay Trinidad, Guihulngan City niadtong Marso 17 human gipusil sa 62nd IB samtang nagpangita og kompay alang sa baka. Gipasangil sa 62nd IB nga Pulang manggugubat si Tingting nga namatay sa usa ka engkwentro.

Sa Negros Occidental, gipaulanan og bala sa 79th IB ang usa ka mag-uuma sa Barangay Minautok, Calatrava niadtong Abril 6. Wala pa masiguro ang kahimtang sa biktima. Gipasangil sa militar nga adunay engkwentro tali sa ila ug sa Bagong Hukbong Bayan (BHB).

Pag-aresto. Sa Occidental Mindoro, giaresto sa 68th IB si Charlize Garzon o Ceeka niadtong Marso 29 sa Sityo Salafay, Barangay Monteclaro, San Jose. Gipasangil nga myembro siya sa BHB nga nadakpan human sa usa ka away. Si Garzon usa ka pangkultura nga aktibista. Nakahuman siya sa kursong AB Arts Management sa De La Salle College of St. Benilde ug gihatagan og pasidungog nga magna cum laude. Sa sulod sa prisohan, gipailalom siya sa pisikal ug mental nga tortyur ug gilapas ang iyang mga katungod.

Sa Iloilo, giaresto sa giusang pwersa sa militar ug pulis si Josephine Porquia, 64, ug Ma. Luisa Tagamolila Guillen, 62, sa ilang gipuy-an sa Barangay Aganan, Pavia niadtong Abril 2.

Si Porquia, kanhi koordineytor sa Migrante, nag-atubang sa kaso sa rebelyon nga gipasaka niadto pang 2012. Aron mahawiran sa prisohan, gipasangil nga nakumpiska kaniya ang mga eksplosibo ug gipasakahan og kaso sa iligal nga paghimo, pagbaligya ug pagpanag-iya sa eksplosibo. Si Guillen, myembro sa Gabriela, gpasakahan og kaso nga obstruction of justice. Nakagawas siya niadtong Abril 3.

Sa Pasay City, iligal nga giaresto ug kapin usa ka semana nga gipriso sa Pasay City Philippine National Police ang tulo ka residente nga nagprotesta niadtong Marso 23 atubangan sa Pasay City Hall. Ang tulo kabahin sa Wowee Market Vendors Association nga supak sa pagsira sa Wowee Market. Nakagawas sila niadtong Marso 31.

Pagbungkag sa protesta. Sa Laguna, bangis nga gibungkag ug gibomba sa tubig ang mga nagprotestang mamumuo sa PackageWorld Inc., pagpanag-iya ni Lucio Tan, sa Laguna Technopark Special Economic Zone sa Cabuyao niadtong Marso 23. Human sa pipila ka adlaw, gipanangtang sa trabaho ang 139 ka kontraktwal nga mamumuo sa kompanya. Ang protesta gipanguluhan sa PackageWorld Inc. Workers Union-Independent batok sa dedlak ug pagbarat sa kompanya sa ilang collective bargaining agreement. Ang PackageWorld Inc naghimo og mga gamit sa pagputos alang sa mga ilimnon ug uban pa. Bahin kini sa kumpanyang Asia Brewery Incorporated.