Duha ka sibilyan ang ginpatay kag anum ang iligal nga gin-aresto sang mga pwersa sang estado halin tunga nga bahin sang Marso tubtob Abril 7. Samtang, mapintas nga ginbungkag sang kapitalista ang hublag sang mga mamumugon sa isa ka pabrika sa Laguna.

Pagpatay. Sa Sorsogon, ginpatay sang mga elemento sang 31st IB si James Quiñones, 24 anyos nga mamumugon, samtang nagabantay sang bangka padulong sa sentro sang banwa sadtong Marso 25 sa Barangay Juan Andre, Donsol. Ginapaguwa sang mga militar nga naigo ang biktima sang nagtalang nga bala nga ginhimutig sang pamilya tungod puno sang igo sang bala ang iya lawas.

Sa Negros Oriental, napatay sa pagkaubos sang dugo ang mangunguma nga si Edgar Tingting, 50, sa Barangay Trinidad, Guihulngan City sadtong Marso 17 pagkatapos tirohon sang 62nd IB samtang nagakuha sang hilamon nga pagkaon sang baka. Ginapaguwa sang 62nd IB nga Pulang hangaway si Tingting nga napatay sa isa ka engkwentro.

Sa Negros Occidental, ginpaulanan sang bala sang 79th IB ang isa ka mangunguma sa Barangay Minautok, Calatrava sadtong Abril 6. Indi pa segurado ang kahimtangan sang biktima. Ginapaguwa sang militar nga nagka-engkwentro sa tunga sini kag ang Bagong Hukbong Bayan (BHB).

Pag-aresto. Sa Occidental Mindoro, gin-aresto sang 68th IB si Charlize Garzon ukon Ceeka sadtong Marso 29 sa Sityo Salafay, Barangay Monteclaro, San Jose. Ginapasibangdan siya nga myembro sang BHB nga nadakop pagkatapos ang isa ka awayan. Si Garzon isa ka pangkultura nga aktibista. Nakatapos siya sa kurso nga AB Arts Management sa De La Salle College of St. Benilde kag ginhatagan sang pasidungog nga magna cum laude. Sa prisohan, ginpaidalum siya sa pisikal kag mental nga tortyur kag ginlapas ang iya mga kinamatarung.

Sa Iloilo, gin-aresto sang gin-isa nga mga pwersa sang militar kag pulis sanday Josephine Porquia, 64, kag Ma. Luisa Tagamolila Guillen, 62, sa ila ginateneran nga balay sa Barangay Aganan, Pavia sadtong Abril 2.

Si Porquia, anay koordineytor sang grupong Migrante, nagaatubang sa kaso nga rebelyon nga ginpasaka sadtong pang 2012. Para ipabilin sa bilangguan, ginpaguwa nga nakumpiskar sa iya ang mga pangbomba kag ginpasakaan sang kaso nga iligal nga pagmanupaktura, pagbaligya, kag pagpanag-iya sang eksplosibo. Si Guillen, myembro sang Gabriela, ginpasakaan sang kaso nga obstruction of justice. Nahilway siya sadtong Abril 3.

Sa Pasay City, iligal nga gin-aresto kag masobra isa ka semana nga ginpriso sang Pasay City Philippine National Police ang tatlo ka residente nga nagprotesta sadtong Marso 23 sa atubang sang Pasay City Hall. Ang tatlo kalakip sa kubay sang Wowee Market Vendors Association nga nagapamatuk sa pagsira sang Wowee Market. Nahilway sila sadtong Marso 31.

Pagbungkag sa protesta. Sa Laguna, mapintas nga ginbungkag kag ginbomba sang tubig ang mga nagprotesta nga mamumugon sang PackageWorld Inc., ginapanag-iyahan ni Lucio Tan, sa Laguna Technopark Special Economic Zone sa Cabuyao sadtong Marso 23. Pagkaligad sang pila ka adlaw, ginkakas sa trabaho ang 139 ka mamumugon nga kontraktwal sang kumpaniya. Ang protesta ginpangunahan sang PackageWorld Inc. Workers Union-Independent batuk sa deadlock kag pagpangbarat sang kumpaniya sang ila collective bargaining agreement. Ang PackageWorld Inc nagahimo sang mga kagamitan pang-pakete para sa mga produkto nga ilimnon kag iban pa. Kabahin ini sang kumpaniyang Asia Brewery Incorporated..