Sa lain-lain nga bahin sang kalibutan, naghulag ang mga partido kag organisasyon sadtong Marso 28 para ipanawagan ang pagtapos sang Operation Kagaar (ukon katapusan nga gyera) sang pasistang Brahmanical Hindutva sang pasistang rehimen ni Narendra Modi sa India. Nagpakig-kapit-bisig sila sa pumuluyong Indian kag Adivasi (tumandok) nga ginatarget sang mapintas kag maduguon nga kampanya sang pagpanumpo nga nagsugod sadtong Enero 2024.

Sa panawagan sang International Committee to Support the People’s War in India, nagpakigbahin sa adlaw sang hublag ang mga pwersa halin sa Brazil, Bangladesh, Finland, Mexico, the Netherlands, Pilipinas, Switzerland, United Kingdom kag US. Nagpanatagtag sila sang mga polyeto, nagpanapik sang mga poster, nagsab-it sang mga istrimer, nagpinta sang mga panawagan sa pader, nagtalakayan kag nagprotesta para engganyuhon ang mas madamo nga pumuluyo nga magtindog para sa mga Indian kag Adivasi.

Lakip sa mga aktibo nga nakigbahin sa kampanya ang anti-imperyalistang alyansa nga International League of Peoples’ Struggle (ILPS) kag ang Commission on Indigenous Peoples and National Minorities sini ukon ILPS Commission 10.

Ang maduguon nga “katapusan nga gyera”

Ang Operation Kagaar kabahin sang pangkabug-osan nga pagpasingki sang pasismo sang estado sang India sa idalum sang Surajkund Scheme (2022). Isa ini ka kampanya kontra-insurhensiya nga may deklarado nga katuyuan nga dugmukon sa katapusan sang Marso 2026 ang armadong rebolusyonaryong pakig-away sang pumuluyong Indian nga ginapamunuan sang Communist Party of India ukon CPI (Maoist).

Ginbalay ini base sa doktrinang US counterinsurgency kag direkta nga kasugpon sang US Indo-Pacific Strategy. Dugang diri, ginapaypayan sang operasyon ang panatisismo sa relihiyon para sa pasistang pagpangsumpo sang rehimen Brahmanical Hindutva nga ginapamunuan ni Modi.

Sa idalum sang Kagaar, masobra 750 ka indibidwal, mayor mga Adivasi sa Central India, ang ginmasaker sang rehimen Modi. Linibo man ang gin-aresto kag ginbilanggo sang armadong pwersa sang estado sa sampaw-sampaw nga mga kaso kag pagbansag sa ila bilang “terorista.”

Ginpaidalum ang mga komunidad sang mga tumandok sa kampanya sang madamuan nga pagpasungka kag pagpangpwersa nga makigbuligay sa militar. Ginapuno ang mga kabukiran kag komunidad sang ginatos ka kampo militar nga naga-akto nga protektor sang mga korporasyon multinasyunal nga nagapang-agaw sang mga kadutaan sang katigulangan kag nagakawkaw sa kapalibutan.

Samtang, indi pipila ka mga kadre kag lider sang CPI (Maoist) kag sang People’s Liberation Guerilla Army (PLGA) ang nangin biktima sang kalakasan sang Kagaar. Kinaandan nga modus sang rehimen Modi ang pag-aresto sa ila, pagpaidalum sa grabe nga tortyur antes patyon samtang yara sa kustodiya sang militar kag pulis. Mga malala nga paglapas ang mga ini sa internasyunal nga makatawo nga layi.

Pagpakig-isa sang PKP kag BHB

Sa atubang sang deklarado nga katuyuan sang rehimen Modi nga tapuson ang CPI (Maoist) kag PLGA sa katapusan sang Marso 2026, liwat ginpalig-on sang Partido Komunista ng Pilipinas, Bagong Hukbong Bayan kag bug-os nga rebolusyonaryong kahublagan Pilipino ang suporta sa ila. Suno kay Marco Valbuena, lider opisyal sa impormasyon sang partido, nagasalig ang rebolusyonaryong kahublagan Pilipino nga malampuwasan kag magmadinalag-on ang rebolusyonaryong kahublagan Indian batuk sa Kagaar. “Tubtob nagapadayon ang pagpanghimulos, magapakig-away ang pumuluyo,” suno sa iya.

Ginapaanggid ni Valbuena ang Kagaar sa mga pasistang taktika nga ginadikta sang US nga ginagamit batuk sa pumuluyong Pilipino sa sulod sang madamo nga dekada sa idalum sang lain-lain nga rehimen tubtob sa subong nga rehimen US-Marcos. Suno sa iya, ang pumuluyong Indian kag Pilipino pareho nga nagapakita sang pagkaisog sa pagpakig-away sa terorismo kag pagpamigos, nga handa nga atubangon ang tanan nga kabudlayan kag ihalad ang mga kinahanglanon nga sakripisyo.

Dugang ni Valbuena, ginahatagan sang inspirasyon sang isganan nga pakig-away sang pumuluyong Indian kag sang mga rebolusyonaryong pwersa sini ang pumuluyong Pilipino nga padayunon ang armadong paghimakas nga may mas mabaskog nga pagkapursigido.

Sa tunga sang isa ka kalibutan nga ginatay-og sang mga gyera nga ginsugdan, ginsulsolan, ukon ginasuportahan sang mga imperyalista, tuman ka kinahanglanon nga maghiliusa ang pumuluyong Indian kag Pilipino kag isulong ang ila mga paghimakas para sa pungsodnon nga kahilwayan kag demokrasya. Ang kahilwayan sang India kag Pilipinas gikan sa imperyalismong pagpamigos kag dominasyon magaserbe nga isa ka tuman ka malahalon nga kontribusyon sa pangkalibutanon nga paghimakas batuk sa imperyalismo kag para sa kahilwayan kag sosyalismo.