Lapaw na sa isa ka bulan ang patarasak nga pagpangbomba sang imperyalismong US kag Zionistang estado sang Israel batuk sa Iran. Napaslawan ang buang nga pasistang kriminal nga si Donald Trump, presidente sang US, sa deklarado nga katuyuan nga paluhuron ang Iran kag isungka ang iya manggad nga lana sa kontrol sang imperyalismong US.

Masobra 16,000 ka bomba ang ginhulog sang US kag Israel sa Iran. Gintarget sini ang imprastrukturang militar sang Iran, apang gintarget man ang mga bilding pang-gobyerno kag pang-komersyo, mga kabalayan, mga eskwelahan kag unibersidad, ospital, laboratoryo, mga taytay, pabrika, plantang pang-enerhiya kag nukleyar, pasilidad pang-tubig, pangkasaysayan nga lugar, kag iban pa nga imprastrukturang sibilyan. Masobra 2,400 ka Iranian na ang napatay, lakip ang ginatos ka mga bata, kag masobra 25,000 ang pilason. May 3 ka milyon na ang natabog sa ila ginapuy-an.

Hugot nga ginpakig-awayan sang pungsod Iran ang wala-puas nga agresyon militar sang US kag Israel. Sa pihak sang naangkon nga malapad nga kahalitan, ang Iran padayon nga nakapabagsak sang mga modernong eroplanong pang-gyera sang US, kag nakapalupad sang mga misayl kag drone nga nag-igo sa mga pasilidad kag bilding sa Israel,pati na sa mga base militar sang US kag opisina sang mga kumpaniya nga Amerikano sa Bahrain, Jordan, Kuwait, Qatar, Saudi Arabia kag UAE. Ginauyatan sini ang Strait of Hormuz, estratehiko nga makitid nga alagyan kon diin naga-agi ang 20% nga pangkabug-osan nga baligyaanay sa lana, agud ipiton ang pangkalibutan nga ekonomiya, kag agud itulod ang US kag Israel nga tapuson na ang pagpang-gyera batuk sa Iran.

Sa pagpamalibad nga magduko kag magsungka, ginapaslaw sang pungsod Iran ang tuyo sang imperyalismong US nga magpinagusto sa Middle East. Wala nakuha ni Trump ang suporta sang mga kaalyado nga pungsod sa NATO. Sobra subong ang pagkaligwin sang US kag Israel sa bug-os nga kalibutan. Mas nga nagadalum ang konplikto sa kubay sang mga imperyalista. Nagakamal sang higante nga ganansiya ang oligarkiya sa pinansiya kag mga monopolyo kapitalista sa gyera, para suportahan ang baligyaanay sang armas sang industriyang militar, ispekulasyon kag pagbutyog sang presyo sang lana, kag pagpabaskog sang dolyar. Malaparan nga krisis kag pag-antus ang gintuga sini sa pumuluyo sa bug-os nga kalibutan.

Bisan sa sulod sang US, nagatindog ang pumuluyong Amerikano batuk sa gyerang agresyon sa Iran. Sang sini lang, nagdagsa sa kadalanan ang masobra walo ka milyon nga nagasikway kay Trump. Sunod-sunod ang ginpatalsik ni Trump nga mga heneral sang militar, nga ang iban ginasiling nga indi luyag sa pagpangsalakay sa Iran. Labi nga nagabuang ang pasistang si Trump. Sa atubang sang kapaslawan nga padukuon ang Iran kag ipatuman ang iya kagustuhan, nagliso si Trump sa bulgar nga paghambal kag paandam nga paulanan sang bomba ang Iran, kag palukpon ang mga taytay kag mga plantang pang-enerhiya, mga tikang nga direkta nga krimen sa katawhan sa kalibutan.

Sa atubang sang pagwarawara sang imperyalismong US sa iya brutal nga pwersang militar nga nagatampalas sa pungsodnon nga independensiya sang Iran, kag antes sini, sang Venezuela, pati na sang Cuba, Palestine kag iban pa nga mga pungsod, dapat manindugan kag maghulag ang bug-os nga pumuluyong Pilipino batuk sa imperyalistang pagpang-gyera sang US nga nagalapak sa kinamatarung sang mga pungsod nga nagagiit sang ila kahilwayan halin sa imperyalistang dominasyon kag kontrol. Dapat hugpungon ang pinakalapad nga kubay sang pumuluyo batuk sa imperyalistang pagpang-gyera sang US. Dapat ibuyagyag ang mga kabutigan kag disimpormasyon nga ginapalapta sang imperyalismong US kag sang papet nga rehimen Marcos.

Dapat ubos-kusog nga batikuson sang pumuluyong Pilipino ang imperyalismong US kag Zionistang estado sang Israel sa pagtampalas sa sobereniya sang mga pungsod nga nagamakinaugalingon, kag ang pagpang-agaw sa manggad nga lana sang Iran. Dapat suportahan kag makig-isa sa pumuluyo sang Iran sa ila pakig-away sa agresyon militar sang imperyalismong US. Pasabton ang pasistang buang nga si Trump kag ang iya mga opisyal, sa ila mga krimen sa katawhan sa kalibutan angot sa patarasak nga pagpangbomba nga nagatarget sa mga sibilyan. Dapat kadungan nga batikuson sang pumuluyong Pilipino ang Zionistang estado sang Israel, sa pagpangbomba kag pagsalakay sang mga tropa sini sa Lebanon kag ang pwersa nga pagpalayas sa isa ka milyon nga Lebanese sa ila puluy-an kag kadutaan, kag ang padayon nga pagpangbomba sa Gaza Strip, sa pihak sang pagluntad sang ceasefire.

Batikuson ang imperyalismong US kag pakigbatuan ang tayuyon sini nga paghanda kag pagpangsulsol sang gyera. Wala pugong subong ang US sa pagpadako sang presensyang militar sini sa Asia-Pacific, kadungan sa pagpang-ipit kag pagpangsulsol sang kagamo sa China, kahimbon ang Japan kag iban pa nga pungsod. Ginagamit sang US ang mga base miltiar sini sa Pilipinas, Japan kag South Korea agud magpwesto kag pabaskugon ang presensya sa kadagatan sa palibot sang China. Tayuyon nga ginabubuan ni Trump sang pondo ang militar. Halin $1 trilyon, plano nga pasakaon ang badyet sini padulong sa $1.5 trilyon sa masunod nga tuig.

Ang pagpakig-isa sang pumuluyong Pilipino sa pakig-away sa imperyalistang pagpang-gyera sang US sa Iran, Venezuela kag iban pa nga pungsod away man para sa pungsodnon nga independensiya kag kaluwasan sang Pilipinas. Dapat batikuson sang pumuluyong Pilipino ang papet nga rehimen Marcos sa pagpamalibad sini nga kundenaron ang pagpang-gyera sang US kag Zionistang estado sang Israel sa Iran.

Kasubong sa kon paano ginagamit sang US ang mga base militar sa lain-lain nga pungsod sa Middle East para ilunsar ang pagpangsalakay sa Iran, pat-od nga gamiton man sang US ang mga base militar sini sa Pilipinas para ipatigayon ang pagpasilabot kag agresyon militar sa Asia-Pacific sa palaabuton. Gani, dapat pabaskugon ang singgit para bungkagon ang mga base kag mga sekreto nga pasilidad militar sang US sa pungsod, pamatukan ang permanente nga presensya sang linibo ka tropang Amerikano, ang pagtambak sa Pilipinas sang mga misayl kag iban pa nga hinganiban, plano nga tukuron nga pabrika sang armas kag iban pa. Dapat pursigido nga pamatukan ang plano nga ipatigayon nga Balikatan war exercises sugod sining Abril, nga lunsay nakatutok sa pagpahambog sang US batuk sa China.

Sa atubang sang nagadalum nga krisis sang pangkalibutanon nga sistemang kapitalista, segurado nga magalupok ang mas madamo nga armadong kagamo sa maabot pa nga panahon. Tuman ang kakinahanglanon, kon amo, nga matukod ang pangkalibutan nga kontra-imperyalistang paghiliusa sang mga pumuluyo agud pakigbatuan ang imperyalistang pagpang-gyera sang US, kag isulong ang mga rebolusyonaryong paghimakas para sa pungsodnon nga kahilwayan, demokrasya kag sosyalismo.