Minilyon sa US kag ginatos ka libo sa Europe ang nagpakigbahin sa separado nga protesta sining nagligad nga mga semana agud kundenaron ang nagalapad kag nagasingki nga pasismo kag rasismo sa ila mga pungsod. Aktibo nga nagpakigbahin sa mga hublag nga ini ang mga Pilipino sa idalum sang grupong Migrante sa Europe kag Tanggol Migrante Movement sa US.

Sa US, ginabana-bana nga 8 milyon ka pumuluyo ang nagpakigbahin sa ikatatlo nga protesta nga “No Kings” sadtong Marso 28 bilang pagkundenar sa pagpostura nga “hari” ni Trump. Naglab-ot sa 3,300 nga protesta ang nalista sa US. Mas madamo sang duha ka milyon ang nagpakigbahin sa amo nga hublag kumparar sa nagligad nga “No Kings” sadtong Oktubre 25, 2025.

Ginbatikos nila ang mapanumpo niya nga mga tikang kag kawad-on sang salabton sa mga ini. Lakip diri ang pagpang-gyera sa Middle East, paglagas sa mga migrante kag imigrante, pagbuhin sa mga sosyal nga serbisyo kag pagkamal sang manggad sang iya pamilya kag kahimbon nga mga dalagko nga korporasyon. Sa guwa sang US, may mga protesta man batuk kay Trump sa France, Portugal, Germany, Italy kag Greece

Sa United Kingdom (UK), naglab-ot sa tunga sa milyon ang nagmartsa padulong sa Houses of Parliament sadto man Marso 28 bilang pagpamatuk sa rasismo kag direksyon ultra Tuo sa pungsod. Ini ang pinakadako nga protesta batuk sa mga pwersang ultra-nasyunalista kag kontra-migrante sa kasaysayan sang UK.

Yara sa 500 ka grupo, lakip ang mga unyon, grupo nga kontra rasismo kag tiglawas sang mga komunidad sang Muslim ang naghiliusa agud ilunsar ang aktibidad.