Nagaatubang ang pumuluyo sang Cuba sang wala sang tupong nga pag-antus dulot sang oil embargo nga ginpatuman sang rehimen Trump sang US sa pungsod agud “angkunon” kag pwersahon ang gobyerno sini nga magsunod sa iya gusto. Grabe ang nangin epekto sini sa transportasyon, kag sa pagpadalagan sang mga ospital kag pasilidad medikal, eskwelahan, turismo, kag produksyon sang pagkaon sa pungsod. Pinakaulihi lang ini sa wala-untat nga pagpang-ipit sa 66 ka tuig nga mapintas nga sangsyon sa ekonomiya nga ginpatuman sang US sa pungsod halin sang magdaug ang rebolusyon diri sadtong 1959 batuk sa diktaduryang US-Batista.

Imbes nga magduko, naghulag ang gobyerno sang Cuba agud pun-an ang dako nga depisito sa enerhiya, paagi sa pagpa-arangkada sang kaugalingon nga produksyon sang krudo nga lana kag madasig nga pagtukod sang mga pasilidad nga solar kag geothermal. Ginhimo nga prayoridad sang estado ang mga ospital kag pasilidad pang-ikaayong-lawas,produksyon sang pagkaon, kag mga sandigan nga serbisyo sa mga bulnerable sa sosyedad kasubong sang mga tigulang, bata kag nagabusong.

Labaw pa diri, ginpakita sang pumuluyong Cuban ang ila militante kag kontra-imperyalista nga paghiliusa. Ginkundenar nila ang embargo nga gintawag nila nga isa ka “asimetriko, brutal kag mapiguson nga agresyon” sang imperyalismong US. Amo sini ka grabe ang brutalidad sang atake, suno sa ila, tungod kahibalo ang US nga indi magsungka ang rebolusyonaryong gobyerno sang Cuba, malig-on ang sosyal nga sistema sini kag tampad ini sa sosyal nga hustisya kag pagpakig-isa.

Asod-asod ang mga patriyotikong hublag sang mga Cuban para pangapinan ang sobereniya. May mga gab-i nga nagatipon sila para kundenaron ang US, bitbit ang linibo nga kandila. Pinakaulihi sa mga dalagkuan nga hublag sa pungsod ang natabo sadtong Abril 2,kon diin nagkadto sa atubang sang embahada sang US sa Havana ang linibo ka Cuban, sakay sang ila bisikleta kag elektroniko nga bisikleta kag bitbit ang mga bandera sang ila pungsod. Kaupod nila sa hublag ang ila presidente nga si Miguel Diaz-Canel.

Wala nagahubas nga suporta

Halin Enero tubtob Marso, nagbubo ang suportang pangpulitika kag materyal sa Cuba. Naglunsar sang mga protesta kag aktibidad bilang suporta sa Cuba kag pagkundenar sa imperyalismong US ang mga progresibong grupo,mga unyon, estudyante kag mga grupo nga nagasuporta sa Latin America sa Belgium, UK, Canada, Spain, Malaysia, kag mga syudad sa US. Nagpanawagan sila para sa pagkakas sa sangsyon sa ekonomiya.

Sa Africa, ginbisitahan sang mga progresibong grupo ang 31 ka embahada sa Cuba agud ipaabot ang ila pagpakig-isa sa pumuluyo sini.

Sadtong Marso 18-20, masobra 600 ka aktibista halin sa 38 ka pungsod kag 140 ka organisasyon ang nag-abot sa Cuba agud magdul-ong sang yara sa 20 ka tonelada nga ayuda kag suporta sa pulitika. Lakip sa dala nila nga bulig ang pagkaon, bulong, gamit-medikal, baterya, solar panel, kag bisikleta.

Gindeklarar sang mga grupo ang Marso 21 bilang “Pangkalibutanon nga Adlaw sang Pagpakig-isa sa Cuba,” nga gin-updan sang mga koordinado nga hublag sa lain-lain nga bahin sang kalibutan.

Dugang sini, nag-abot sa pungsod sadtong Marso 24 ang tatlo ka barko halin sa lain-lain nga pungsod sa Latin America nga may dala nga ayuda. Antes pa sini, nagpadala ang Mexico sang masobra sa 1,200 tonelada nga pagkaon kag iban pa nga suplay. Nagpangako si Claudia Sheinbaum, presidente sang Mexico, nga liwat magpadala sang lana sa pungsod. Ang Mexico ang isa sa mayor nga tigsuplay sang lana sa Cuba nga nag-untat nga magpadala sang lana tungod sa presyur sang US.

Sadtong Marso 30, nag-abot sa Cuba ang oil tanker sang pungsod Russia nga may dala nga 730,000 bariles sang lana. Manug-abot naman sa pungsod ang ila ikaduha nga tanker nga may dala sang masobra 27,000 tonelada sang gas. Nagpangako ang Russia nga padayon ini nga magpadala sang ayuda sa pihak sang blokeyo sang US. Nagpadala man sang ayuda ang mga pungsod sang Caribbean, ang China, Canada, Brazil, Italy, kag pila ka organisasyon halin sa US.

Bisan indi bastante ang mga ayuda agud lubos nga mabuhinan ang pag-antus sang pumuluyo sang Cuba, dala sini ang pangkalibutanon nga suporta sa ila sobereniya kag hugot nga ginakundenar ang mapintas kag kriminal nga kolektibong pagsilot sang rehimen Trump sang US sa pumuluyong Cuban.