Kalbaryo sang Pumuluyo, ginpatigayon sa Semana Santa. Ginpatigayon ang Kalbaryo sang Pumuluyo 2026 halin Martes Santo tubtob Byernes Santo, Abril 3, agud ipahayag ang mga ginapas-an sang pumuluyong Pilipino, ilabi na sa atubang sang krisis sa ekonomiya.

Ginsugdan ang aktibidad sa komunidad sa NIA Road sa Quezon City sadtong Marso 31. May amo man nga mga aktibidad sa Tondo sa Manila, Caloocan, Malabon, Navotas, kag sa Welcome Rotonda kag Tatalon sa Quezon City. Kadungan nga ginhiwat ang Kalbaryo sang Mamumugon Pang-ikaayong-lawas kag Pumuluyo sa atubang sang Department of Health batuk sa pagsaka sang presyo sang bulong kag dugang nga kabudlayan sa pagpa-ospital. Sa Davao City, may “Kalbaryo sa Katawhan” man sa pagpanguna sang mga progresibo nga grupo.

Barikada kontra mina sang mga tumandok nga Palaw’an. Nagpatindog sang barikada ang mga tumandok nga Palaw’an kag residente sang Palaw’an halin sadtong Marso 26 agud punggan ang pagsulod kag pagmina sang Calmia Nickel, Inc. Tungod sa ila panindugan, ginapahog kag gina-ipit sila sang kumpaniya.

Ang Calmia Nickel, Inc, nga magaserbe nga opereytor sang proyekto nga mina nga Infanta Nickel Project, ginkontrata sang MacroAsia Mining Corporation nga subsidyaryo sang MicroAsia Corp nga ginapanag-iyahan sang burgesya kumprador nga si Lucio Tan.