Kapin sa usa ka bulan na ang walay puas nga pagpamomba sa imperyalismong US ug sa Zionistang estado sa Israel batok sa Iran. Pakyas ang buang nga pasistang kriminal nga si Donald Trump, presidente sa US, sa iyang gipahayag nga tumong nga paluhuron ang Iran ug ipailalom ang bahanding lana niini sa kontrol sa imperyalismong US.

Kapin na sa 16,000 ka bomba ang gihulog sa US ug Israel sa Iran. Gipunting niini ang imprastrukturang militar sa Iran, apan gitarget usab ang mga opisina sa gubyerno ug komersyo, mga balay, eskwelahan ug unibersidad, ospital, laboratoryo, mga tulay, pabrika, plantang pang-enerhiya ug nukleyar, pasilidad sa tubig, mga dapit nga makasaysayanon, ug uban pang sibilyang imprastruktura. Kapin sa 2,400 ka Iranian ang napatay, lakip ang gatusan ka mga bata, ug sobra sa 25,000 ang nasamdan. Kapin sa 3 milyon ang napalayas sa ilang pinuy-anan.

Hugot nga gibatukan sa nasud sa Iran ang walay hunong nga agresyong militar sa US ug Israel. Taliwala sa dakong kadaot nga nasinati niini, padayon ang Iran sa pagtira sa mga modernong eroplano sa US ug pagpalupad og mga misayl ug drone nga miigo sa mga pasilidad ug mga bilding sa Israel, lakip na sa mga base militar sa US ug mga opisina sa mga kumpanyang Amerikano sa Bahrain, Jordan, Kuwait, Qatar, Saudi Arabia ug UAE. Gikontrol niini ang Strait of Hormuz, ang estratehikong agianan kung asa miagi ang 20% sa patigayon sa lana sa kalibutan, aron pig-oton ang kalibutanong ekonomya ug pugson ang US ug Israel nga tapuson ang ilang pagpanggera.

Sa pagbalibad nga moduko ug mosurender, gipakyas sa Iran ang laraw sa imperyalismong US nga maghari sa Middle East. Wala makakuha si Trump og suporta gikan sa iyang mga kaalyado sa NATO. Labi nang nahimulag ang US ug Israel sa tibuok kalibutan. Nagkagrabe ang panagbangi sa han-ay sa mga imperyalista. Dako kaayong ganansya ang gibulsa sa mga oligarkiya sa pinansya ug monopolyo kapitalista sa gera, pagbaligya og armas, ispekulasyon ug pagsirit sa presyo sa lana, ug pagpalig-on sa dolyar. Nagdala kini og grabeng krisis ug pag-antos sa katawhan sa tibuok kalibutan.

Bisan sa sulod sa US, mibarug ang katawhang Amerikano batok sa gerang agresyon sa Iran. Niining miagi lang, mihaguros sa kadalanan ang kapin sa walo ka milyon nga nagsalikway kang Trump. Sunod-sunod ang pagtangtang ni Trump sa iyang mga heneral sa militar, ang uban kanila giingong dili uyon sa pag-atake sa Iran. Labi pang nabuang ang pasistang si Trump. Atubangan sa iyang kapakyasan nga paluhuron ang Iran, milabyog siya sa bulgar nga pamulong ug pagpanghulga nga bombahon pag-usab ang Iran ug pabuthan ang mga tulay ug plantang pang-enerhiya—mga buhat nga klarong krimen batok sa katawhan.

Atubangan sa pagwara sa imperyalismong US sa brutal nga kusog militar niini nga naglapas sa nasudnong soberanya sa Iran, ug bag-o niini, sa Venezuela, Cuba, Palestine ug uban pang nasud, kinahanglan magbarog ug molihok ang tibuok katawhang Pilipino batok sa imperyalistang pagpanggera sa US nga nagyatak sa katungod sa mga nasud nga nanglimbasog alang sa ilang kagawasan gikan sa dominasyon sa imperyalismo. Kinahanglan hiusahon ang pinakalapad nga han-ay sa katawhan batok sa imperyalistang pagpanggera sa US. Kinahanglan ibutyag ang mga bakak ug disimpormasyon nga gipakaylap sa imperyalismong US ug sa papet nga rehimeng Marcos.

Kinahanglan tibuok-kayang makmakon sa katawhang Pilipino ang imperyalismong US ug ang Zionistang estado sa Israel sa ilang paglapas sa soberanya sa nagkaugalingong mga nasud, ug sa pagpangawkaw sa bahandi sa lana sa Iran. Kinahanglan suportahan ug makighiusa sa katawhan sa Iran sa ilang pakigbisog sa agresyong militar sa imperyalismong US. Panubagon ang pasistang buang nga si Trump ug ang iyang mga opisyal sa ilang mga krimen sa katawhan tungod sa walay puas nga pagpamomba nga nagtarget sa mga sibilyan.

Kinahanglan kundenahon usab ang Zionistang estado sa Israel sa ilang pagpamomba ug pag-atake sa Lebanon ug sa pugos nga pagpalayas sa usa ka milyong Lebanese sa ilang yuta ug pinuy-anan, ug ang padayon nga pagpamomba sa Gaza Strip bisan pa naay ceasefire.

Kundenahon ang imperyalismong US ug batukan ang padayon nilang pagpangandam ug pagpanghulhog sa gera. Walay hunong karon ang US sa pagpakaylap sa presensya militar niini sa Asia-Pacific, kauban ang pagpamig-ot ug pagpanghulhog og panagbangi batok sa China, kakunsabo ang Japan ug uban pang nasud. Gigamit sa US ang mga base militar niini sa Pilipinas, Japan ug South Korea aron magposisyon ug magpalig-on sa presensya niini sa kadagatan palibot sa China. Padayon gihapon si Trump sa pagbubo og pondo sa militar. Gikan $1 trilyon, planong ipasaka ang badyet ngadto sa $1.5 trilyon sa sunod nga tuig.

Ang pakighiusa sa katawhang Pilipino sa pakigbisog batok sa imperyalistang pagpanggera sa US sa Iran, Venezuela ug uban pang nasud mao usab ang pakigbisog alang sa nasudnong soberanya ug kagawasan sa Pilipinas. Kinahanglan makmakon sa katawhang Pilipino ang papet nga rehimeng Marcos sa iyang pagdumili nga kundenahon ang pagpanggera sa US ug Zionistang estado sa Israel sa Iran.

Sama sa paggamit sa mga base sa Middle East aron atakihon ang Iran, siguradong gamiton usab sa US ang mga base niini sa Pilipinas alang sa ilang panghilabot ug agresyon sa Asia-Pacific sa umalabot. Busa, kinahanglan pakusgon ang singgit nga tangtangon ang mga base ug sikretong pasilidad militar sa US sa nasud, supakon ang permanente nga presensya sa liboan ka tropang Amerikano, ang pagbutang og misayl ug uban pang armas, ug ang plano nga magtukod og pabrika sa armas. Kinahanglan kusganong batukan ang Balikatan war exercises nga magsugod karong Abril, nga tanan pagpasundayag sa kusog sa US batok sa China.

Atubangan sa nagkagrabe nga krisis sa kalibutanong sistemang kapitalista, siguradong modaghan pa ang mga armadong panagbangi sa umalabot nga mga panahon. Busa, kinahanglan kaayo nga magtukod og lapad nga kalibutanong anti-imperyalistang panaghiusa sa katawhan aron batukan ang imperyalistang pagpanggera sa US ug iasdang ang rebolusyonaryong pakigbisog alang sa nasudnong kagawasan, demokrasya ug sosyalismo.