Sa nagkalain-laing bahin sa kalibutan, milihok ang mga partido ug organisasyon niadtong Marso 28 aron iduso ang pagtapos sa Operation Kagaar (o katapusang gera) sa pasistang Brahmanical Hindutva nga pasistang rehimen ni Narendra Modi sa India. Nakigkapit-bisig sila sa katawhang Indian ug Adivasi (lumad) nga gipunting sa bangis ug duguong kampanya sa pagpanumpo nga gisugdan niadtong Enero 2024.

Sa awhag sa International Committee to Support the People’s War in India (ICSPWI), misalmot sa adlaw sa paglihok ang mga pwersa gikan sa Brazil, Bangladesh, Finland, Mexico, Netherlands, Pilipinas, Switzerland, United Kingdom ug US. Nanghatag sila og mga polyeto, nagpaskil og mga poster, nagsab-it og mga istrimer, nagpintal og mga panawagan sa dingding, nagpahigayon og mga panaghisgot ug nagprotesta aron dasigon ang mas daghang katawhan nga mobarug alang sa mga Indian ug Adivasi.

Lakip sa mga aktibo nga misalmot sa kampanya ang anti-imperyalistang alyansa nga International League of Peoples’ Struggle (ILPS) ug ang Commission on Indigenous Peoples and National Minorities niini o ILPS Commission 10.

Ang dugoong “katapusang gera”

Ang Operation Kagaar kabahin sa kinatibuk-ang pagpagrabe sa pasismo sa estado sa India ubos sa Surajkund Scheme (2022). Usa kini ka kampanya kontra-insurhensya nga adunay deklaradong tumong nga sumpoon sa katapusan sa Marso 2026 ang armadong rebolusyonaryong pakigbisog sa katawhang Indian nga gipanguluhan sa Communist Party of India o CPI (Maoist).

Nakagambalay kini sa doktrina sa US counterinsurgency ug direktang sumpay sa US Indo-Pacific Strategy. Dugang pa, gipaypayan sa operasyon ang panatisismo sa relihiyon alang sa pasistang pagpanumpo sa rehimeng Brahmanical Hindutva nga gipanguluhan ni Modi.

Ubos sa Kagaar, labaw sa 750 ka indibidwal, kadaghanan mga Adivasi sa Central India, ang gimasaker sa rehimeng Modi. Liboan usab ang giaresto ug gipriso sa armadong pwersa sa estado sa patong-patong nga mga kaso ug pagbansag kanila isip mga “terorista.”

Gipailalom ang mga komunidad sa mga Adivasi sa kampanya sa dinaghang pagpasurender ug pugos nga makigtinabangay sa militar. Gibutangan ang mga lasang ug komunidad og gatusan ka kampo militar nga nagsilbi isip protektor sa mga multinasyunal nga korporasyon nga nangilog sa mga yutang kabilin ug nangawkaw sa kinaiyahan.

Samtang, dili pipila ka kadre ug lider sa CPI (Maoist) ug sa People’s Liberation Guerilla Army (PLGA) ang biktima sa kabangis sa Kagaar. Kasagaran nga modus sa rehimeng Modi ang pag-aresto kanila, pagpailalom sa grabeng tortyur una pagpatay samtang anaa sa kustodiya sa militar ug pulis. Grabe kini nga mga paglapas sa internasyunal nga tawhanong balaod.

Pakighiusa sa PKP ug BHB

Atubangan sa deklaradong tumong sa rehimeng Modi nga buntugon ang CPI (Maoist) ug PLGA sa katapusan sa Marso 2026, subling gipalig-on sa Partido Komunista sa Pilipinas, Bagong Hukbong Bayan ug tibuok rebolusyonaryong kalihukang Pilipino ang suporta kanila. Sumala ni Marco Valbuena, punong upisyal sa impormasyon sa Partido, salig ang rebolusyonaryong kalihukang Pilipino nga makabangon ug magmalampuson ang rebolusyonaryong kalihukang Indian batok sa Kagaar. “Hangtod nagapadayon ang pagpanghimulos, manglimbasog ang katawhan,” matud niya.

Gikumpara ni Valbuena ang Kagaar sa mga pasistang taktikang mando sa US nga gigamit batok sa katawhang Pilipino sulod sa daghang dekada ubos sa nagkalain-laing rehimen hangtod sa kasamtangang rehimeng US-Marcos. Matud niya, parehong nagpakita ang katawhang Indian ug Pilipino og kaisog sa pakigbisog batok sa terorismo ug pagpangdaogdaog, nga andam moatubang sa tanang kalisdanan ug maghalad sa gikinahanglang sakripisyo.

Dugang ni Valbuena, gidasig sa maisugong pakigbisog sa katawhang Indian ug sa ilang rebolusyonaryong pwersa ang katawhang Pilipino nga dugang pang pakusgon ang armadong pakigbisog.

Taliwala sa kalibutang gitay-og sa mga gubat nga gisugdan, gihulhog o gisuportahan sa mga imperyalista, kinahanglan kaayong maghiusa ang katawhang Indian ug Pilipino ug iasdang ang ilang mga pakigbisog alang sa nasudnong kagawasan ug demokrasya. Ang paglingkawas sa India ug Pilipinas gikan sa imperyalistang pagpangdaogdaog ug dominasyon magsilbi isip usa ka mahinungdanong kontribusyon sa kalibutanong pakigbisog batok sa imperyalismo ug alang sa kagawasan ug sosyalismo.