Nahaatubang ang katawhan sa Cuba sa walay katumbas nga pag-antos tungod sa oil embargo nga gipahamtang sa rehimeng Trump sa US sa nasud aron “angkonon” ug pugson ang ilang gubyerno nga mosunod sa iyang gusto. Grabe ang epekto niini sa transportasyon, sa operasyon sa mga ospital ug pasilidad medikal, eskwelahan, turismo ug produksyon sa pagkaon sa nasud. Pinakabag-o lang kini sa walay puas nga pagpa-antos sa miaging 66 ka tuig tungod sa bangis nga mga sangsyon sa ekonomiya nga gipahamtang sa US sa nasud sukad sa nagmalampuson ang rebolusyon niini niadtong 1959 batok sa diktadurang US-Batista.

Imbis nga moduko, milihok ang gubyerno sa Cuba aron pun-an ang dakong kakulang sa enerhiya pinaagi sa pagpakusog sa kaugalingong produksyon sa krudo ug paspas nga pagtukod sa mga pasilidad sa solar ug geothermal. Giprayoridad sa estado ang mga ospital ug pasilidad sa panglawas, produksyon sa pagkaon, ug mga batakang serbisyo sa mga bulnerable sa katilingban sama sa mga tigulang, bata ug mabdos.

Labaw pa niini, gipakita sa katawhan sa Cuba ang ilang militante ug anti-imperyalistang panaghiusa. Gikundena nila ang embargo nga gitawag nilang usa ka “asimetriko, brutal ug madaogdaogong agresyon” sa imperyalismong US. Labihan ka brutal ang pag-atake, matud nila, kay nasayod ang US nga dili moduko ang rebolusyonaryong gubyerno sa Cuba, lig-on ang ilang sistema sa katilingban ug matinud-anon kini sa katilingbanong hustisya ug panaghiusa.

Sunod-sunod ang patriyotikong paglihok sa mga Cuban aron panalipdan ang ilang soberanya. May mga gabii nga nagtigom sila aron kundenahon ang US, bitbit ang liboang kandila. Pinakaulahi sa dagkong paglihok sa nasud ang gipahigayon niadtong Abril 2, diin nagmartsa paingon sa embahada sa US sa Havana ang liboang Cuban, sakay sa ilang bisikleta ug elektroniko nga bisikleta ug bitbit ang bandila sa ilang nasud. Kauban nila sa martsa ang ilang presidente nga si Miguel Diaz-Canel.

Dili mahubsang suporta

Sukad Enero hangtod Marso, midagayday ang suporta sa pulitika ug materyal sa Cuba. Naglunsad og mga protesta ug paglihok isip suporta sa Cuba ug pagkondena sa imperyalismong US ang mga progresibong grupo, mga unyon, estudyante ug mga grupong tigsuporta sa Latin America sa Belgium, UK, Canada, Spain, Malaysia ug mga syudad sa US. Nanawagan sila sa pagwagtang sa mga sangsyon sa ekonomiya.

Sa Africa, gibisita sa mga progresibong grupo ang 31 ka embahada sa Cuba aron ipaabot ang ilang pakighiusa sa katawhan niini.

Niadtong Marso 18-20, labaw sa 600 ka aktibista gikan sa 38 ka nasud ug 140 ka organisasyon ang miabot sa Cuba aron maghatod sa 20 tonelada nga tabang ug suporta sa pulitika. Lakip sa ilang dalang tabang ang pagkaon, tambal, gamit-medikal, baterya, solar panel ug bisikleta.

Gideklarar sa mga grupo ang Marso 21 isip “Pangkalibutanong Adlaw sa Pakighiusa sa Cuba,” nga giduyugan og mga koordinado nga paglihok sa nagkalain-laing bahin sa kalibutan.

Dugang pa, miabot sa nasud niadtong Marso 24 ang tulo ka barko gikan sa nagkalain-laing nasud sa Latin America nga adunay dalang tabang. Sa wala pa kini, nagpadala ang Mexico og labaw sa 1,200 tonelada nga pagkaon ug uban pang suplay. Nanaad si Claudia Sheinbaum, presidente sa Mexico, nga subli na kining magpadala og lana sa nasud. Ang Mexico usa sa mayor nga tigsuplay og lana sa Cuba nga mihunong mag-eksport og lana tungod sa presyur sa US.

Niadtong Marso 30, miabot sa Cuba ang oil tanker sa nasud nga Russia nga adunay dalang 730,000 bariles nga lana. Padulong na usab sa nasud ang ilang ikaduhang tanker nga adunay labaw sa 27,000 tonelada nga gas. Nanaad ang Russia nga magpadayon pagpadala og tabang bisan pa kontra kini sa blokeyo sa US. Nagpadala usab og tabang ang mga nasud sa Caribbean, ang China, Canada, Brazil, Italy ug pipila ka organisasyon gikan sa US.

Bisan dili paigo ang mga tabang aron hingpit nga mapakubos ang pag-antos sa katawhan sa Cuba, dala niini ang pangkalibutanong suporta sa ilang soberanya ug baskug nga pagkondena sa mapintas ug kriminal nga kolektibong pagsilot sa rehimeng Trump sa US sa katawhan sa Cuba.