Milyun-milyon sa US ug gatusan ka libo sa Europe ang misalmot sa magkalain-laing protesta niining milabayng mga semana alang sa pagkondena sa kaylap ug nagkakusog nga pasismo ug rasismo sa ilang mga nasud. Aktibo nga misalmot sa mga paglihok ang mga Pilipino ubos sa Migrante sa Europe ug Tanggol Migrante Movement sa US.

Sa US, gibanabanang 8 milyong katawhan ang miapil sa ikatulo nga protesta nga “No Kings” niadtong Marso 28 isip pagkondena sa paghari-hari ni Trump. Mikabat sa 3,300 ka protesta ang nataho sa US. Labaw sa duha ka milyon ang miapil sa maong paglihok kumpara sa miaging “No Kings” niadtong Oktubre 25, 2025.

Gimakmak nila ang mapanumpoon nga mga lakang ug kawalay pagpanubag niini. Lakip niini ang pagpanggera sa Middle East, paggukod sa mga migrante ug imigrante, pagkunhod sa mga serbisyo sa katawhan ug pagpadako sa bahandi sa iyang pamilya ug mga kaabin nga dagkung korporasyon. Gawas sa US, adunay protesta batok kang Trump sa France, Portugal, Germany, Italy ug Greece.

Sa United Kingdom (UK), mikabat sa tunga ka milyon ang nagmartsa padulong sa Houses of Parliament niadtong Marso 28 isip pagsupak sa rasismo ug ultra-Toong direksyon sa nasud. Kini ang kinadak-ang protesta sa kasaysayan sa UK batok sa ultra-nasyunalista ug kontra-migranteng pwersa.

Anaa sa 500 ka grupo, lakip ang mga unyon, anti-rasismong mga grupo ug mga representante sa mga komunidad sa Muslim ang naghiusa para ilunsad ang aktibidad.