Kalbaryo sa katawhan, gipahigayon sa Semana Santa. Gipahigayon ang Kalbaryo sa Katawhan 2026 gikan sa Martes Santo hangtud Biyernes Santo, Abril 3, aron ipahayag ang mga palas-anon sa katawhang Pilipino, ilabina taliwala sa grabeng krisis sa ekonomya.

Nanukad ang aktibidad sa komunidad sa NIA Road sa Quezon City niadtong Marso 31. May susamang mga kalihukan sa Tondo sa Maynila, Caloocan, Malabon, Navotas, ug sa Welcome Rotonda ug Tatalon sa Quezon City. Dungan niini ang Kalbaryo sa Mamumuong Panglawas ug Katawhan atubangan sa Department of Health batok sa pagsaka sa presyo sa tambal ug dugang kalisod sa pagpaospital. Sa Davao City, gipahigayon ang “Kalbaryo sa Katawhan” ubos sa pagpanguna sa mga progresibong grupo.

Barikada batok sa mina sa lumadnong Palaw’an. Nagtukod og barikada ang mga lumadnong Palaw’an ug mga residente sa Sityo Linao, Barangay Ipilan, Brooke’s Point sa Palawan sukad niadtong Marso 26 aron pugngan ang pagsulod ug pagmina sa Calmia Nickel, Inc. Tungod sa ilang lig-ong pagbarog, gihasi ug gipig-ot sila sa kumpanya.

Ang Calmia Nickel, Inc., nga mosilbing opereytor sa proyektong mina nga Infanta Nickel Project, gi-kontrata sa MacroAsia Mining Corporation nga subsidyaryo sa MacroAsia Corp., nga gipanag-iya sa burukrata-kapitalistang si Lucio Tan.