Lumawlawa ti awag para iti panangpasardeng iti imperyalista a gubat ti US, kabadang ti Israel, laban iti Iran ken dadduma pay a paset ti lubong. Idi Abril 9, ginasut a kameng ti nailyan-demokratiko nga organisasyon ti nagmartsa agturong iti embahada ti US tapno kundenaren ti US iti panagatake ken tuloy-tuloy a panagpangpangta daytoy iti umili ti Iran. Iti laksid ti nabukel a katulagan iti panagsardeng ti putukan, agtaltalinaaed a saan nga istable ti rehiyon gapu iti panagpilpilit ti US nga isuko ti Iran ti soberanya ken karbengan daytoy iti Strait of Hormuz.

Kinundenar met dagiti nagprotesta ti panangiguyod ti rehimen US-Marcos iti umili a Pilipino kadagiti awan sarday nga imperyalista a gera a nangitunda ti panagtayok ti presyo ti langis, ken kagiddan daytoy ti taraon ken dadduma pay a gagatangen. Napasamak ti kapada a tignay iti Cagayan Valley a lugar dagiti upisyal ken saan nga upisyal nga EDCA site.

Idi Abril 14, intakder dagiti akademiko, manursuro ken empleyado iti UP Diliman idiay Quezon City ti Coalition of Academics Against US Aggression, ti koalisyon da laban iti gera nga agresyon ti US. Agkalkalap metten ti pirma dagiti adda iti sektor ti syensya ken teknolohiya para iti panangitakder ti kapada nga alyansa.

Isardeng ti Balikatan

Nagprotesta iti sango ti Camp Aguinaldo idiay Quezon City dagiti nailyan-demokratiko a grupo idi Abril 20, umuna nga aldaw ti Balikatan, tapno isardeng daytoy ken ti dadduma pay a war games ti US iti Pilipinas. Kunada, ti dumakdakkel a presensya ti militar ti US ket manggugguyod iti Pilipinas kadagiti gera nga agresyon daytoy. Kasta met a walwaldasen daytoy ti binilyon a kwarta ti umili, agpada dagiti Amerikano ken Pilipino, bayat a minilyon ti agsagsagaba gapu iti pananggera ti US iti Iran.

Manipud Enero, saan a bumaba iti innem a war games ken aktibidad militar ti inyaramid ti US iti pagilyan. Inaramat daytoy dagiti sibilyan a sangladan ken eropwerto kadagiti syudad ti Cagayan de Oro, Cebu ken Tacloban. Tallo met laeng a panaglayag, iti linged ti maritime cooperation ti inyaramid daytoy iti South China Sea tapno pakibiangan dagiti susik a pangbaybay iti baet ti China ken dagiti pagilyan iti Southeast Asia.

Tapno aramiden a normal ti presensya da, nagisayangkat dagiti yunit ti US kadagiti operasyon sibil-militar iti prubinsya ti Quezon ken Tuguegarao City. Insayangkat met daytoy idi Abril 6-9 ti Salaknib, a dinar-ayan ti 7,000 tropa a militar. Amin dagitoy ket nagalimpatok iti 2026, a makunkuna a “kadakkelan” ken “sumaklaw iti intero nga arkipelago.” Dar-ayan daytoy ti 17,000 tropa, nu sadinno a 10,000 ket Amerikano ken ti dadduma ket aggapu iti Pilipinas, Japan, France, Australia, Canada ken New Zealand. Para iti maysa nga aktibidad a para kano iti “rehiyunal a seguridad,” awan uray maysa iti Southeast Asia ti dimmar-ay ditoy.

Kontra Pax Silica

Kinundenar met dagiti patriyotiko a grupo ti panagserrek ti rehimen Marcos Jr iti Pax Silica, maysa a programa ti US nu sadinno nga agbalin a paset ti Pilipinas iti panangsuplay iti militar ti US ti kritikal a mineral a napateg iti panagaramid kadagiti ramit panggubat. Maysa kadagiti plano ti US ti panangitakder ti 1,619-ektarya nga “economic security zone” iti Luzon para iti produksyon dagiti elektroniks nga maaramat kadagiti misayl da, eroplano a panggubat ken drone.

Daytoy a sona ket imatonan ti US a saan nga agbaybayad ti abang agingga ti 99 tawen. Maipaayan daytoy ti diplomatic immunity, kas ti embahada ti US. Kayat na a sawen, saan a maipasidong daytoy kadagiti linteg ti Pilipinas nu di ket ti linteg ti US ti agraira iti uneg ti sona iti ekonomya. Kas kadagiti soldado da, saan a maipasidong iti linteg ken pannusa ti Pilipinas dagiti tauhan ditoy, anyaman a krimen ti mabalin a maaramid da.