Sireregta a lagipen tayo iti umay nga Abril 24 ti maika-53 anibersaryo ti National Democratic Front of the Philippines (NDFP). Iti daytoy nga okasyon, ad-adda a papigsaen tayo ti panagkaykaysa ken determinasyon ti NDFP ken intero nga umili a Pilipino nga iyabante ti rebolusyonaryo a dangadang tapno ruk-atan ti pagilyan manipud iti panagari ti imperyalismo a US ken dagiti lokal nga agar-ari a dasig.

Rambakan tayo dagiti balligi ti NDFP kas pinakakonsolidado nga alyansa dagiti progresibo ken patriyotiko a pwersa a mangiyab-abante ti demokratiko a rebolusyon ti umili. Iti napalabas a lima a dekada, pinagkaykaysa ti NDF ti nadumaduma a sektor iti 12-punto a programa daytoy para iti panangiyabante ti nailyan-demokratiko a rebolusyon.

Bayat a subsublian tayo ti pakasaritaan ti awan-sarday a dangadang, kasapulan nga agsagana met ti NDFP iti panangibaklay ti nadagdagsen pay a rebbengen iti masangwanan, nangruna iti tengga ti dumakdakkel a pangta dagiti imperyalista a gubat iti wayawaya, kinatalged ken pagbiagan ti pagilyan, gubway ti kumarkaro a panaggubgubat ken agresyon ti imperyalismo a US, tapno tagikwaen wenno agawen ti napapateg a rekurso iti nadumaduma a paset ti lubong.

Agsaruno a rinaut ti imperyalismo a US ti Venezuela ken Iran, umuna ken maikatlo a pagilyan nga addaan kadakkelan a reserba ti langis iti intero a lubong. Babaen ti nabileg a pwersa militar, rinabngis ti US ti amin nga allagaden ti internasyunal a linteg. Sipaparang met a pangpangtaan ti US ti Mexico, Colombia, Cuba, Panama, Greenland uray ti paset ti teritoryo ti Ukraine.

Kumarkaro ti pananggera ti US iti gagem a pagtalinaeden ti sangalubongan a dominasyon iti sango ti estratehiko a panagkapsut ti ekonomya ken sangalubongan nga imperyo, ken panagtaud ti nadumaduma a sentro ti linnakwan ken sistema a pangpinansya a saan nga agar-aramat ti dolyar, ken dagiti alyansa ken kooperasyon a militar nga awan iti kontrol na. Us-usaren ken iwaswasiwas tatta ti US ti pwersa a militar daytoy tapno ipataw ti hegemonya iti nadumaduma a paset ti lubong, ken lapdan ti panaglawa ti bileg dagiti karibal daytoy nga imperyalista, nangruna ti China.

Ad-adda a papairuten ti US ti kontrol daytoy iti Pilipinas. Makarkarattot dagiti kapitalista nga Amerikano a kirauden ken bukodan ti nabatbati a kinabaknang a mineral ti pagilyan, ken dagiti nalawa a dagdaga tapno itakder dagiti plantasyon, kasta met dagiti proyekto a “renewable energy” wenno pangturismo. Limed a pinirmaan itay nabiit ni Marcos ti maysa a katulagan iti US (iti linged ti makunkuna a Luzon Economic Corridor) a mangisuksuko ti nasurok 1,620 ektarya iti naan-anay a kontrol dagiti kapitalista nga Amerikano, tapno kamkamen.

Tuluy-tuloy a palpalawaen ti US ti presensya a militar iti Pilipinas. Umad-adu nga umad-adu ti naka-istasyon a tropa nga Amerikano ken naibati a misayl ken dagiti ramit panggubat kadagiti base militar, agpada kadagiti EDCA site ken kadagiti limed a pasilidad militar iti nadumaduma a paset ti pagilyan. Tinawen a dumakdakkel dagiti iyar-aramid daytoy nga ehersisyo militar ken war games, kas ti Balikatan exercises a nangrugi tatta a bulan a dar-ayan t ti saan a bumaba iti 10,000 tropa nga Amerikano.

Ar-aramaten ti US ti Pilipinas, uray met ti South Korea ken Japan,tapno papigsaen ti presensya dagiti pwersa a militar daytoy kadagiti kabaybayan iti aglikmot ti China. Iti South China Sea, iyar-aramid daytoy ti “transparency operations” usar ti Armed Forces of the Philippines (AFP) ken Philippine Coast Guard tapno kariten ken probokaren ti China. Plano met ti US nga itakder ti dakkel nga imbakan ti langis iti Davao Gulf tapno agserbisyo kadagiti barko a panggubat daytoy. Plano met daytoy nga itakder ti pabrika dagiti ramit militar (bala, drone ken dadduma pay) idiay Subic ken idiay Aurora. Amin dagitoy ket paset ti panagaramat ti US iti Pilipinas para iti agresyon militar, kas ti panangaramat daytoy kadagiti base militar na kadagiti pagilyan iti gulpo, para iti armado a panangraut iti Iran.

Ti ima ti amin a soldado nga Amerikano ket addaan mulit ti dara ti rinibo nga Iranian ken Palestino a pinatay ti panagbomba ti US-Israel, ti minilyon a pinatay da kadagiti gera nga agresyon iti napalabas a siglo, karaman ti milyon a Pilipino a pinatay ti US iti gera a panangsakop daytoy iti Pilipinas. Dakkel nga insulto iti umili a Pilipino nga us-usaren dagiti gangannaet a mannanakop ti pagilyan kas paginanaan, pangibatyan kadagiti armas da ken pangisayangkatan ti ad-adu pay a gubat nga agresyon. Ti panangiguyod ti US iti Pilipinas iti pannakirinnibal daytoy iti China ket kaniwas iti tarigagay ti umili a Pilipino a natalinaay a makipagbiag kadagiti kaasideg daytoy a pagilyan. Agdadata daytoy a panangrabngis iti panagwaywayas ti Pilipinas ken pangta iti kinatalged na.

Iti sango daytoy a kasasaad, dakkel a karit iti NDFP a pagkaykaysaen ken riingen ti umili a Pilipino a tumakder laban iti dumakdakkel a pangta ti panaggubgubat ti US, ken panagaramat daytoy iti Pilipinas a pangisayangkatan kadagiti gera nga agresyon. “Gubat ti umili laban iti imperyalista a gera,” ti awag tapno dalyasaten ti dana ti armado a rebolusyon tapno ruk-atan ti pagilyan manipud iti kuko ti imperyalista a sumipsippayot ken mangikuskuspil.

Adda iti nakasaysayaat a saad ti NDFP nga akemen daytoy a rebbengen, nangruna iti panagpigsa daytoy kadagiti napalabas a tawen. Tuloy-tuloy a lumawlawa ken tumibtibker dagiti rebolusyonaryo nga organisasyon manipud idi ideklara ti Partido ti tignay panagilinteg idi 2023. Umad-adu dagiti maitaktakder a balangay ti KM, PKM, Armas ken dadduma pay a rebolusyonaryo a timpuyog. Adda ti dadduma a nakaisayangkat kadagiti nailyan a konggreso ken pulong dagiti konseho, bayat a tuluy-tuloy a makapalpalawa ken makapagkonkonsolida.

Naiyaramid ti NDFP dagiti kumperensya ken pulong tapno pagkaykaysaen ti takder dagiti alyado nga organisasyon daytoy iti nababara nga isyu ti umili, ken tapno agbibinningay kadagiti kapadasan ken adal iti panagorganisa ken panagpatignay iti masa. Rumegregta dagiti aktibidad a mangririing iti nalawa a masa kas kadagiti rali nga apagdarikmat, ken panangipablaak ti nadumaduma a langa ti propaganda, uray iti ruar ti pagilyan. Lumawlawa ti suporta a makalkalap para iti hukbo ti umili bayat nga umad-adu ti agtartarigagay nga agturong iti kaaw-awayan tapno makipaset iti armado a dangadang.

Pasingkedan tayo ti pangngeddeng a papigsaen ken palawaen ti NDFP iti okasyon ti maika-53 anibersaryo daytoy. Ad-adda pay a paregtaen tayo ti panangibinglay ken pannakipaset ti NDFP iti panangpapigsa ti naunday a gubat ti umili, ti gubat nga maiyab-abante ti intero nga umili, tapno gun-oden ti umili ti wayawaya ti pagilyan ken kagimongan.