Iti tengnga ti kumarkaro a korapsyon, krisis ken pasismo, pumigpigsa ti awag nga iyabante ti gubat ti umili tapno gibusan ti agar-ari a bulok a sistema. Rason daytoy nu apay a silulukat ti ruangan ti New People’s Army (NPA) iti amin nga agtarigagay a makipaset iti panangiyuged ti baro a pakasaritaan ti pagilyan.

Kas paset ti panagrambak ti maika-57 anibersaryo ti NPA, kinainnuman ti Ang Bayan dagiti kumander ken kadre dagiti yunit iti Luzon tapno talantanen ti umad-adu a bilang dagiti agturturong iti kaaw-awayan, nangruna dagiti kabataan, nga agtartarigagay a makipagbiag kadagiti Nalabbaga a mannakigubat ken masa kadagiti sona a gerilya.

Iti pannakipaset dagiti makipagbibiag iti kolektibo a panangibaklay ti inaldaw a trabaho iti hukbo ti umili, ad-adda nga umir-irot ti pannakaawat da iti kinausto ti armado a dangadang, ken ad-adda a tumibtibker ti takder da nga agkameng iti NPA.

Panagsagana dagiti yunit

Agingga mabalin, ikagkagumaan ti yunit nga awaten ti amin a kayat na a makipagbiag. Kas panagsagana, naanep a pagad-adalan ti yunit ti sitwasyon militar ken iyan-annatup dagiti trabaho tapno ipateg dagiti panggep dagiti kakadwa a makipagbibiag. Iti pulong ti kumand, pagsasaritaan da ti proseso ti panagserrek dagiti bumisita ken anya ti agbalin a programa da basar iti naipasa a rekomendasyon ken singasing. Am-amwen da met nu anya ti kasarian ken dasig a nagtaudan ti bumisita. Maisagsagana ti nayon a suplay a kasapulan kas ti duyan, tent, arwaten, taraon ken dadduma pay.

Iti amin a panagsagana, kangrunaan a kabadang dagiti kumander ken mannakigubat ti masa ken sangay ti Partido iti lokalidad.

Ti programa a mabukbukel para kadagiti bisita ket nakabasar iti kinabayag ti panawen nga ipaay da, anya ti namnamaen, kayat a masursuro ken dagiti pagpigsaan ken pagkapuyan da. Paset ti programa dagiti panagadal iti pulitiko-militar, panagsanay iti martial arts ken self defense, basaran a panagsanay medikal, ken dagiti panagadal iti Partido ken hukbo. Ipakpakaawat ti yunit kadagiti bisita ti mabalin a limitasyon iti kayat da a magun-od segun iti kasasaad militar.

Prayoridad kadagiti makipagbiag nga agbalin a paset iti gawaing masa, trabaho iti produksyon, trabaho a pangkultura, dagiti workshop, panangited ti innadal, panangbukel ti grupo ken dadduma pay a trabaho iti hukbo kas ti lohistika, medikal ken dadduma pay.

Panagsagana dagiti bumisita

Al-allukoyen dagiti bumisita a saganaan ti mabalin a mapadasan da iti biag gerilya. Sakbay pay a sumrek da iti sona, siguradwen a naadal dagiti basaran a dokumento ken regulasyon ti NPA. Kangrunaan na, siguradwen a naan-anay ti pangngeddeng, ken sisasagana ti bagi ken panunot.

“Mabalin kayo a maaddaan kadagiti napipintas a kapadasan, mabalin met a makapatuok a kanito,” segun ken Ka Armand, maysa kadagiti mangidadaulo kadagiti nakainnuman a yunit. Inallukoy na dagiti makipagbibiag a “bayat nga adda ditoy, agbalin nga aktibo kayo iti inaldaw a biag ti hukbo, imaksimisa ti tunggal oras ken minuto.”

Balbalakadan na ti siasinoman a bumisita a saan nga agbain nga agsaludsod nu adda ti kayat a maamwan, makitinnalantan kadagiti kakadwa ken makipaset iti amin a trabaho – teknikal man wenno pulitikal. Nu adda ti banag wenno trabaho a marigatan, ipakaammo a dagus iti lider ti iswad wenno iti dadaulo a kakadwa.

“Saan yo nga ibilang ti bagbagi yo kas simple a bisita, gapu ta integral a paset kayo ti hukbo iti tunggal panawen nga adda kayo ditoy,” balakad ni Ka Armand.

“Rumbeng a sisasagana a posible a makapadas ti labanan, atitiddog a pinnagna ken dadduma pay, nangruna ta agisaysayangkat tayo ti armado a dangadang,” kunana. Agpalpalagip isuna a rumbeng nga annadan dagiti personal nga alikamen, ken siguradwen nga awan ti napateg a maibati.

“Nu nalabsamon dagiti saan a nakairuaman a wagas iti bagi kas ti panag-CR, pannaturog, pannagna ken dadduma pay, agbalinen a nalaka ti amin,” kuna na.

Malaksid kadagiti alikamen a pang-sona, nasken nga isagana dagiti makipagbiag dagiti kasapulan da, kas kadagiti agas nu adda dagiti saan a kadawyan a sakit ken dadduma pay.

“Siempre mayat met nu adda ti awit a pasalubong para kadagiti kakadwa,” angaw na.

Kangrunaan ti amin, napateg nga isagana ti bagi iti panagsungbat iti awag ti demokratiko a rebolusyon ti umili a mapangngeddeng nga agpultaym iti NPA.