Garapalan ti panangaramat ken panangipeggad ti imperyalismo a US kadagiti sibilyan a pasilidad ken lugar kadagiti operasyon daytoy iti Pilipinas. Kabinnadang ti aso-aso nga Armed Forces of the Philippines (AFP), nagpalastog pay dagiti upisyal daytoy iti inaramid da a “kaunaan” a panangikabil ti ramit-militar iti Mindanao ken panangiyakar kadagitoy iti Luzon usar dagiti sibilyan a barko. Kagiddan daytoy ti maiyar-aramid nga agtutuon a war games manipud Enero nga agalimpatok iti makunkuna a kasaknapan a Balikatan tatta Abril.

Idi Marso 12-15, inpwesto ti US dagiti lugan a panggubat iti sibilyan a sangladan ti Cagayan de Oro City, ken inyakar da dagitoy idiay Subic Freeport usar dagiti komersyal a barko a ro-ro. Kasabwat ti 4th ID, limed a naiyaramid ti inawagan daytoy a “rehearsal” wenno panagensayo ti napaspas a panangiyakar ken panagiwaras kadagiti ramit panggubat iti intero nga isla. Tungpa iti rupa dagiti Cagayanon a naiyaramid ti panagpwesto kadagiti ramit iti sangladan a limed iti kaamwan da kalpasan nga agiyebkas da ti pannakariribuk iti presensya ti US iti syudad da.

Inaramat met ti US ti Cebu South Port iti inawagan daytoy a Wartime Repair and Maintenance Exercise wenno SWARMEX idi Marso 25. Karaman iti daytoy a war games ti USS Ashland (LSD-48), maysa nga island-class landing ship, a simmanglad iti pyer, tapno kano iyaramid ti “wartime repair” wenno panangtarimaan kadagiti perdi gubway ti gubat. Tantan-awan ti US nga aramiden ti Cebu a paset ti iyap-aplag daytoy nga “unsinkable repair network” dagiti barko a panggubat daytoy iti Asia.

Ti Cagayan de Oro Port ken Cebu South Port ket agpada a sibilyan a pasilidad. Dagitoy ket sentro ti komersyo ken transportasyon dagiti produkto ken biyahero iti Visayas ken Mindanao. Dakkel a dangran iti lokal nga ekonomya nu mairaman dagitoy iti gera ti US. Madaman nga ar-aramaten ti US kas “EDCA site” dagiti eropwerto iti dua a syudad.

Daytoy Abril, linuktan ti US ti bidding para iti konstruksyon ti oil depot idiay Davao Gulf. Idi pay Agosto 2025 naiyanunsyo ti plano a panangitakder ti oil depot a paset ti estratehiko a panagiyimbak ti langis para iti napaspaspas a panagmaniobra dagiti pwersa ti US iti oras ti maysa nga “high intensity missile environment.” Kayat na a sawen, anyaman nga oras ket mabalin a bumtak ti nakaro nga armado a binnusor iti baet ti US ken dagiti kalaban daytoy, usar dagiti misayl ken dadduma nga armas a nakaturongen kadagiti base militar daytoy iti Asia Pacific.

Pinili ti US ti Cagayan de Oro, Cebu ken Davao gapu iti relatibo a kinaadayo dagitoy iti laud a paset ti pagilyan, nu sadinno a nakapwesto ti dadakkel nga Amerikano a base militar. Iti panagtasa mismo ti US, paborable dagitoy a lokasyon gapu ta sigurado nga umuna a puntiryaen dagiti kalaban daytoy ti Subic, Clark ken dadduma pay a base militar daytoy iti Luzon.

Pannakaiwaras dagiti ramit panggubat

Ti war games ti US idiay Cagayan de Oro ken Cebu, kasta met ti plano nga oil depot idiay Davao, ket nakabalangkas iti konsepto a “distributed maritime operations” (DMO). Iti sidong daytoy, iwarwaras ti US dagiti ramit, langis, tropa ken armas kadagiti isla tapno “paidaman ti target” dagiti kalaban daytoy. Panggep dagitoy a “rehearsal” ti panagsanay iti napaspas a panagiyakar-akar kadagiti ramit militar (lugan, misayl, kanyon ken dadduma pay) usar dagiti “host-nation infrastructure” wenno dagiti pasilidad ti Pilipinas, agpada a militar ken sibilyan.

Saan a baro ti panagaramat ti US kadagiti sibilyan nga usar ken serbisyo kadagiti operasyon militar daytoy.

Saan a baro ti panagaramat ti US kadagiti sibilyan a ramit ken serbisyo kadagiti operasyon militar daytoy. Maaw-awagan a “21st Century Foraging,” aktibo nga agsapsapul ti US kadagiti sibilyan a pasilidad, rekurso ken serbisyo imbes a mangnamnama kadagiti tradisyunal a linya a suplay pangmilitar.” Bukbuklen daytoy ti maaw-awagan a “hybrid a militar-sibilyan” a linya ti suplay.

Iti Pilipinas, addan ti nakaiyatag a kas ti nadakamat a “hybrid” a linya ti suplay iti Clark Airbase ken Subic Freeport, dagiti dati a base militar a tatta ket patpatarayen dagiti ahensya a sibilyan. Palpalawaen daytoy ti US babaen ti panangitakder kadagiti pabrika ken bodega kadagiti export processing zone iti Aurora ken Cagayan.

Target dagiti kalaban ti US

Pudno la unay nga ipegpeggad ti US ti Pilipinas iti panangaramat daytoy kadagiti sibilyan nga imprastruktura ken komunidad kadagiti militar a panggep. Saan na a pagdumdumaen ti sibilyan ken militar, isu a pagbalbalinen na a target dagiti biag ti sibilyan, dagiti komunidad ken sanikwa. Uray pay ibaga daytoy a “rehearsal” laeng dagiti naiyaramid a war games idiay Cagayan de Oro ken Cebu, nalawag a subsuboken daytoy ti kabaelan dagiti sangladan ken kabaybayan kas panagsagana iti pabpabettaken daytoy nga imperyalista a gera iti Asia.

Iti sidong ti internasyunal a makatao a linteg, nairut a maiparparit ti panangtarget kadagiti sibilyan a sanikwa iti panawen ti gubat. Ngem nu mausar dagitoy iti panggep a militar, ket mabalin a puntiryaen kas target militar. Gapu ta ar-aramaten ti militar ti US tapno agitulod kadagiti tangke, misayl ken dadduma pay a ramit a panggubat, dagiti sibilyan a barge wenno ro-ro, karaman dagiti sangladan ken eropwerto ket mabalin a puntiryaen dagiti kalaban ti US nu bumtak ti gera, ken maipeggad uray dagiti mangmangged a mangpatpataray kadagitoy. Inaramid daytoy ti mismo a militar ti US iti panangbomba daytoy kadagiti sibilyan nga imprastruktura iti Iran iti panangikalintegan nga agserserbi dagidiay kadagiti panggep a militar ti pagilyan.