Kangatwan a pammadayaw ti ipapaay ti Communist Party of the Philippines (CPP) kadagiti martir ti umili a Pilipino a pimmusay idi Abril 19 iti Barangay Salamanca, Toboso, Negros Occidental.

“Bayat nga agramrambak ken agpyespyesta dagiti agar-ari a dasig, nabalkot ti liday ti maidadanes nga umili iti pannakapasag dagiti Nalabbaga a mannakigubat a nangidaton ti amin da tapno labanan dagiti pasista a halimaw,” inyebkas ni Marco Valbuena, dadaulo nga upisyal iti impormasyon ti CPP. “Parparwaren dagiti pasista dagiti nabuwal a kakadwa kas `kriminal’ ken ‘terorista’ tapno kaluban ti narungsot a gera ti represyon ken ilemmeng dagiti nakaro nga abuso laban iti umili.”

Iti tengnga ti disimpormasyon ken kinaulbod ti AFP, ammo ti umili ti Toboso ken intero a Negros ti kinatibker dagiti Nalabbaga a mannakigubat iti laban para kadagiti karbengan da a maikuskuspil a mannalon. Ibilbilang da dagiti Nalabbaga a mannakigubat kas bukod da nga annak, a sipupudno a nagserbi kadakwada kas duktor, dentista, katulong iti produksyon ken manursuro.

“Balkuten tayo dagiti lungon da ti Nalabbaga a bandera ti rebolusyon, itag-ay dagiti gemgem ken ipukkaw tayo ti kinabanwar da bayat nga itultulnog tayo isuda iti tanem da,” awag ni Valbuena. Sigurado nga adu pay ti maikkan ti inspirasyon dagiti sakripisyo da tapno lumaban ken iyabante ti rebolusyon para iti nailyan a wayawaya ken demokrasya.

Kabayatan na, kasapulan nga ibunannag ken babalawen ti mapaspasaran a nainget a militarisasyon ti agabay a barangay ti Salamanca ken San Jose. Gapu ditoy, nasurok 600 indibidwal ti napilitan nga agbakwit ken temporaryo a naggyan iti sentro ti ebakwasyon. Nasken nga iyawag ti panangrespetaar kadagiti karbengan da.