Awanan asi ti rehimen US-Marcos ken dagiti pribado a korporasyon ken negosyo iti panangpatalaw kadagiti nakurapay manipud iti komunidad da daytoy Abril. Rabrabsuten dagitoy ti karbengan da iti pagtaengan, pagbiagan ken biag iti tengnga ti kumarkaro a krisis iti ekonomya gubway ti imperyalista a gera ti US ken Israel idiay Iran ken kinainutil ti rehimen US-Marcos.

Idiay Quezon City, dinuprak ti National Housing Authority idi Abril 9 dagiti balay ken istruktura iti NIA Road, Barangay Pinyahan a naibati kalpasan ti agsasaruno a puor iti komunidad. Pito a residente ti inarestar dagiti pulis iti kapatur ti demolisyon. Kabayatanna, nasurok 30 pamilya ti napatalaw iti maysa a demolisyon iti Cambridge iti Barangay E. Rodriguez idiay Cubao.

Idiay Taguig City, dinuprak ti dandani 1,000 tauhan ti Monocrete Construction Company ken 300 tauhan ti Philippine National Police (PNP) ken SWAT ti barikada dagiti residente a kontra iti demolisyon idiay Panday Creekside, Barangay Palingon-Tipas idi Abril 13. Nagaramat dagiti pulis ti tirgas ken pinurwakan da kadagiti bote dagiti residente, bayat a naka-abang a nakasirig dagiti isnayper a pulis iti aglawlaw. Pito nga indibwal ti naarestar iti demolisyon.

Manon a balay ti naduprak ken agarup 300 pamilya dagiti sharer, renter ken tenant ti mapatalaw iti komunidad. Dumanon iti 218 residente ti temporaryo nga aggigian iti igid-kalsada karaman ti 35 nga ubbing, 14 natataengan, lima nga addaan rangkap ken uppat a masikog.

Idiay Laguna, naranggas a dinuprak ti Bambang Land Corporation ken dagiti pulis ti nasurok 70 a balay ti Purok 6B, Barangay Bambang, Los Baños idi Abril 14. Patraydor a naiyaramid ti demolisyon iti laksid ti dayalogo dagiti residente ken ti kumpanya iti didiay nga aldaw. Innem a dekadan nga agin-indeg dagiti residente iti Purok 6B ken idi 2004 ket binigbig ti gubyerno ti karbengan da iti daga a nagtakderan dagiti balay da.

Idiay Aklan, saan a bumaba iti 40 pamilya ti naperwisyo iti pwersaan a panagalad iti komunidad iti Calachuchi Road, Barangay Andagao, Kalibo idi Abril 15. Ti komunidad ket inaladan da ti yero ken kinubong da dagiti residente, karaman dagiti natataengan, masikog ken ubbing. Dagiti residente ket pagtaltalawen ti makinbagi ti daga a ni Jesus Daroy.

Idiay Iloilo City, naranggas nga inabog ti lokal a gubyerno dagiti aglaklako iti igid-kalsada ken sango ti pribatisado nga Iloilo Terminal Market a patpatarayen ti SM Prime idi Abril 10 ti rabii. Inyaramid daytoy ti Local Economic Enterprise Office, ti PNP ken SWAT. Kinumpiskar dagitoy dagiti produkto ken tinakaw da dagiti personal nga alikamen ken kwarta dagiti aglaklako. Kadagiti sumaruno nga aldaw, nagtuloy ti panagipit ken panagpatalaw kadakwada.

Idiay Davao City, agarup 100 pamilya ti napatalaw iti demolisyon ti lokal a gubyerno iti komunidad iti Matina Aplaya idi Abril 14. Agplanplano dagiti residente nga agipila ti kaso iti korte laban iti iligal a demolisyon.

Kabayatanna, naranggas a naduprak ti kampuhan ti nasurok 2,000 a nakurapay iti syudad manipud iti Quezon City, Caloocan City ken Bulacan iti nailyan nga upisina ti Department of Social Welfare and Development (DSWD) idiay Barangay Batasan Hills, Quezon City manipud Abril 13. Iruprupir da ti kompensasyon wenno bayad ti danyos ti kalamidad manipud pay idi 2025. Paulit-ulit a binutbuteng ken rinanggas dagiti pulis dagiti nakurapay kabilang dagiti natataengan ken babbai.

Segun iti Katipunan ng mga Samahang Manggagawa (Kasama), alyado nga organisasyon ti National Democratic Front of the Philippines, ad-adda a maidurduron dagiti nakurapay ken mala-mangmangged a dalyasaten ti dana ti demokratiko a rebolusyon ti umili iti sango ti kumarkaro a panangikuspil ken pananggundaway kadakwada. Awag ti grupo a papigsaen ken konsolidaen dagiti basaran nga organisasyon da—dagiti unyon, timpuyog kadagiti komunidad, organisasyon kadagiti linya ti pagbiagan ken dagiti organisasyon ti umili—ken dagiti rebolusyonaryo nga organisasyon dagiti mangmangged ken mala-mangmangged.

“Kasapulan nga ipinget pay a papigsaen ken palawaen tayo dagiti dangadang para iti demokratiko a karbengan babaen kadagiti militante a dangadang ti masa a mangkarkarit ken ad-adda a mangidarum iti mismo a pundasyon ti reaksyonaryo a sistema,” kuna daytoy.