Mikaylap ang panawagan para sa paghunong sa imperyalistang gera sa US, kauban ang Israel, batok sa Iran ug sa uban pang bahin sa kalibutan. Niadtong Abril 9, gatusan ka myembro sa mga nasudnon-demokratikong organisasyon ang nagmartsa padulong sa embahada sa US aron kundenahon ang US sa pagpangatake ug padayon nga pagpanghulga niini sa katawhan sa Iran. Bisan pa naa nay kasabutan sa sispayr, dili pa gihapon istable ang rehiyon tungod sa pagpamugos sa US nga i-surender sa Iran ang iyang soberanya ug katungod sa Strait of Hormuz.

Gikundena usab sa mga nagprotesta ang pagguyod sa rehimeng US-Marcos sa katawhang Pilipino sa mga walay katapusan nga imperyalistang gera nga nagresulta sa pagsaka sa presyo sa lana, ug dungan niini, ang presyo sa pagkaon ug uban pang palaliton. Naglunsad og parehas nga protesta sa Cagayan Valley nga lugar sa mga upisyal ug dili upisyal nga EDCA site.

Niadtong Abril 14, gitukod sa mga akademiko, magtutudlo ug empleyado sa mga unibersidad sa UP Diliman sa Quezon City ang Coalition of Academics Against US Aggression, ang ilang koalisyon batok sa gerang agresyon sa US. Nagtigum usab og mga pirma ang mga naa sa sektor sa syensya ug teknolohiya alang sa pagtukod og parehas nga alyansa.

Ihunung ang Balikatan

Nagprotesta atubangan sa Camp Aguinaldo sa Quezon City ang mga nasudnon-demokratikong grupo niadtong Abril 20, unang adlaw sa Balikatan, aron ipahunong kini ug ang uban pang war games sa US sa Pilipinas. Matud nila, ang nagkakusog nga presensya sa militar sa US nagguyod sa Pilipinas sa mga gerang agresyon niini. Mao usab, giusik-usik dinhi ang binilyong kwarta sa katawhan, parehas sa mga Amerikano ug Pilipino, samtang minilyon ang nag-antus tungod sa pagpanggera sa US sa Iran.

Sukad Enero, dili mokubos sa unom ka war games ug aktibidad militar ang gilunsad sa US sa nasud. Ginamit niini ang mga sibilyang pantalan ug landinganan sa mga syudad sa Cagayan de Oro, Cebu ug Tacloban. Tulo ka paglawig usab, sa takuban sa maritime cooperation, ang gilunsad niini sa South China Sea aron manghilabot sa mga lantugi pandagat tali sa China ug sa mga nasud sa Southeast Asia.

Aron himoong “normal lang” ang ilang presensya, naglunsad ang mga yunit sa US og mga operasyong sibil-militar sa probinsya sa Quezon ug Tuguegarao City. Gilunsad usab niini niadtong Abril 6-9 ang Salaknib, nga gisalmutan sa 7,000 tropang militar. Tanan kini mipungkay sa Balikatan 2026, nga giingong “pinakadako” ug “mosakop sa tibuok kapupud-an.” Gisalmutan kini sa 17,000 tropa, diin 10,000 Amerikano ug ang uban gikan sa Pilipinas, Japan, France, Australia, Canada ug New Zealand. Alang sa usa ka aktibidad nga para kuno sa “rehiyunal nga seguridad,” walay usa ka nasud sa Southeast Asia ang miapil dinhi.

Kontra Pax Silica

Gikundena usab sa mga patriyotikong grupo ang pagsulod sa rehimeng Marcos Jr sa Pax Silica, usa ka programa sa US diin mahimong bahin ang Pilipinas sa pagsuplay sa militar sa US sa kritikal nga mga mineral nga hinungdanon sa paghimo sa mga gamit iggugubat. Usa sa mga plano sa US mao ang pagtukod sa 1,619-ektaryang “economic security zone” sa Luzon alang sa produksyon sa mga elektroniks nga gamiton sa ilang mga misayl, eroplanong pandigma ug drone.

Ang maong sona pagadumalahan sa US nga walay abang hangtod 99 ka tuig. Hatagan kini og diplomatic immunity, sama sa embahada sa US. Buot ipasabot, dili kini ipailalom sa mga balaod sa Pilipinas ug imbis niini, ang balaod sa US ang magahari sulod sa sona sa ekonomiya. Sama sa ilang mga sundalo, luwas sa balaod ug silot sa Pilipinas ang ilang mga tawo dinhi, sa bisan unsang krimen ang mamahimo nila.