Nagalapad ang panawagan para sa pagpauntat sa imperyalistang gyera sang US, kabulig ang Israel, batuk sa Iran kag iban pa nga bahin sang kalibutan. Sadtong Abril 9, ginatos ka myembro sang mga pungsodnon-demokratikong organisasyon ang nagmartsa padulong sa embahada sang US agud kondenaron ang US sa pagpang-atake kag tayuyon nga pagpahog sini sa pumuluyo sang Iran. Sa pihak sang nabug-os nga kasugtanan sa untat-lupok, nagapabilin nga indi istable ang rehiyon tungod sa pagpamilit sang US nga isungka sang Iran ang sobereniya kag kinamatarung sini sa Strait of Hormuz.

Ginkundenar man sang mga nagprotesta ang pagdalahig sang rehimen US-Marcos sa pumuluyong Pilipino sa mga wala sang katapusan nga imperyalistang gyera nga nagtulod sa pagtimbuok sang presyo sang lana, kag kadungan sini sang pagkaon kag iban pa nga balaklon. May kasubong man nga hublag sa Cagayan Valley nga lugar sang mga opisyal kag indi opisyal nga EDCA site.

Sadtong Abril 14, gintukod sang mga akademiko, manunudlo kag empleyado sang mga unibersidad sang UP Diliman sa Quezon City ang Coalition of Academics Against US Aggression, ang ila koalisyon batuk sa gyerang agresyon sang US. Nagapangalap naman sang pirma ang mga yara sa sektor sang syensya kag teknolohiya para sa pagtukod sang kasubong nga alyansa.

Untaton ang Balikatan

Nagprotesta sa atubang sang Camp Aguinaldo sa Quezon City ang mga pungsodnon-demokratikong grupo sadtong Abril 20, una nga adlaw sang Balikatan, agud pauntaton ini kag iban pa nga war games sang US sa Pilipinas. Suno sa ila, ang nagadako nga presensya sang militar sang US nagaganoy sa Pilipinas sa mga gyerang agresyon sini. Subong man, ginawaldas diri ang binilyon nga kwarta sang pumuluyo, lunsay sang mga Amerikano kag Pilipino, samtang minilyon ang nagaantus tungod sa pagpang-gyera sang US sa Iran.

Halin Enero, indi magnubo sa anum ka war games kag aktibidad militar ang ginpatigayon sang US sa pungsod. Gingamit sini ang mga sibilyan nga pantalan kag paluparan sa mga syudad sang Cagayan de Oro, Cebu kag Tacloban. Tatlo man ka pagpalawod, sa tabon sang maritime cooperation, ang ginpatigayon sini sa South China Sea para hilabtan ang mga kagamo pangdagat sa tunga sang China kag mga pungsod sa Southeast Asia.

Para himuon nga normal ang ila presensya, naglunsar ang mga yunit sang US sang mga operasyon sibil-militar sa probinsya sang Quezon kag Tuguegarao City. Ginlunsar man sini sadtong Abril 6-9 ang Salaknib, nga ginpakigbahinan sang 7,000 ka tropang militar. Naglundo ang tanan nga ini sa Balikatan 2026, nga ginasiling “pinakadako” kag “magasakop sa bug-os nga arkipelago.” Pakigbahinan ini sang 17,000 ka tropa, kon diin 10,000 Amerikano kag ang iban halin sa Pilipinas, Japan, France, Australia, Canada kag New Zealand. Para sa isa ka aktibidad nga para kuno sa “rehiyunal nga seguridad,” ni isa ka pungsod sa Southeast Asia wala sang nagpakigbahin diri.

Kontra sa Pax Silica

Ginkundenar man sang mga patriyotiko nga grupo ang pagsulod sang rehimen Marcos Jr sa Pax Silica, isa ka programa sang US kon diin mangin kabahin ang Pilipinas sa pagsuplay sa militar sang US sang kritikal nga mga mineral nga malahalon sa paghimo sang mga gamit pang-gyera. Isa sa mga plano sang US ang pagtukod sang 1,619-ektarya nga “economic security zone” sa Luzon para sa produksyon sang mga elektroniks nga pagagamiton sa ila mga misayl, eroplano pang-gyera kag drone.

Ang sona nga ini pagadumalahan sang US nga indi magbayad sang arkila sang tubtob 99 ka tuig. Hatagan ini sang diplomatic immunity, kasubong sang embahada sang US. Buot silingon, indi ini ipaidalum sa mga layi sang Pilipinas kag imbes ang layi sang US ang magaluntad sa sulod sang sona sa ekonomiya. Kasubong sang mga soldado nila, luwas sa layi kag silot sang Pilipinas ang ila mga tinawo diri, ano man nga krimen ang pwede nila nga himuon.