Dagiti mannalon, nagkampuhan kontra VAT. Nagisayangkat ti kampuhan idi Abril 8-13 ti ginasut a mannalon, mangngalap, mangmangged-talon iti kaunasan ken dadduma pay a sektor manipud iti District 1 ti Batangas iti Liwasang Bonifacio idiay Manila. Nagprotesta da iti House of Representatives idiay Quezon City iti maudi nga aldaw ti kampuhan. Awag da ti panangikkat ti value-added tax (VAT) ken excise tax kadagiti produkto a petrolyo, panangingato ti sweldo ken panangibaba ti presyo dagiti kangrunaan a gagatangen.

Dagiti taga-Laguna, nagpiket kontra iti managdadael a sanitary landfill. Nagprotesta dagiti residente ti Barangay Imok, Calauan, Laguna iti Laguna Provincial Capitol idi Abril 8 tapno tubngaren ti plano ti South Luzon Waste Management Corporation nga agitakder ti 84.23-ektarya a sanitary landfill iti komunidad da. Inrana da ti tignay iti aldaw ti espesyal a sesyon ti Sangguniang Panlalawigan nu sadinno a naibasura ti permit para iti proyekto.

Petisyon kontra pribatisasyon iti Cebu. Rinugyan idi Abril ti nadumaduma a sektor ken grupo iti Cebu City iti panangiyuna ti Carbon-hanong Alyansa ti panagkalap ti 100,000 pirma laban iti pribatisasyon ti Carbon Public Market. Maisumite iti Cebu City Council ti petisyon tapno kiddawen ti maysa a lehislatibo nga addang ken panangrepaso iti katulagan iti pribatisasyon.

Lider-mangmangged iti Davao, maiyaw-awag nga iparang. Nagprotesta dagiti progresibo a grupo iti Davao City idi Abril 9 tapno balbaliw nga iyawag ti panangiparang iti desaparesido a lider-mangmangged ti Southern Mindanao a ni William Lariosa. Maudi a nakita ni Lariosa iti Barangay Butong, Quezon, Bukidnon idi Abril 10, 2024 nu sadinno a dinukot isuna dagiti elemento ti 48th IB.

Panangparigat ti IRRI, balbaliw a kinundenar. Nagprotesta dagiti grupo ti mannalon ken kabataan iti sango ti International Rice Research Institute (IRRI) idiay Los Baños, Laguna idi Abril 13 tapno kundenaren ti agtultuloy a panangparigat ti institusyon kadagiti mannalon ken saan a makatao a panagaramat ti daga iti unibersidad. Rinambakan ti institusyon ti maika-66 tawen a pannakabuangay daytoy idi Abril 4.