Natikahiluag an panawagan para ha pagpapaundang ha imperyalista nga gerra han US, kabakyang an Israel, kontra ha Iran ngan iba pa nga parte han kalibutan. Hadton Abril 9, gatus-gatos nga membro han mga nasyunal demokratiko nga organisasyon an nagmartsa tipakadto ha embahada han US agud kundenahon an US ha pangangatake ngan dirudiretso hini nga pananarhug ha katawhan han Iran. Ha luyo han nabug-os nga kasarabutan ha ukoy-bubto, nagpapabilin nga diri istable an rehiyon tungod ha pamimirit han US nga igsurender han Iran an soberaniya ngan katungod hini ha Strait of Hormuz.

Ginkundenar liwat han mga nagprotesta an pagdadanas han rehimen US-Marcos ha katawhan Pilipino ha mga waray kahumanan nga imperyalista nga gerra nga nagresulta han tigda nga paghitaas han presyo han lana, ngan kadungan hini han pagkaon ngan iba pa nga papliton. Nagkamayda han kapareho nga paggios ha Cagayan Valley nga lugar han mga upisyal nga diri upisyal nga EDCA site.

Hadton Abril 14, igintukod han mga akademiko, magturutdo ngan empleyado han mga unibersidad ha UP Diliman ha Quezon City an Coalition of Academics Against US Aggression, an ira koalisyon kontra ha gerra nga agresyon han US. Nangangalap na liwat han pirma an mga aada ha sektor han siyensya ngan teknolohiya para ha pagtitindog han kapareho nga alyansa.

Undangon an Balikatan

Nagprotesta ha atubangan han Camp Aguinaldo ha Quezon City an mga nasyunal demokratiko nga grupo hadton Abril 20, syahan nga adlaw han Balikatan, agud paundangon ini ngan iba pa nga war games han US ha Pilipinas. Sering nira, an tikadako nga presensya han militar han US nagdadanas ha Pilipinas hini nga mga gerra nga agresyon. Sugadman, ginmamalgastar dinhi an bilyun-bilyon nga kwarta han katawhan, ngaduha han mga Amerikano ngan Pilipino, samtang milyun-milyon an nag-aantos tungod ha pan-gegerra han US ha Iran.

Tikang Enero, diri mamenos ha unom nga war games ngan panmilitar nga aktibidad an iginhimo han US ha nasud. Gin-gamit hini an mga sibilyan nga duongan ngan erport ha mga syudad han Cagayan de Oro, Cebu ngan Tacloban. Tulo liwat nga paglalayag, ha tahub han maritime cooperation, an iginhimo hini ha South China Sea agud panginlabutan an mga pandagat nga sumpakiay giutan han China ngan mga nasud ha Southeast Asia.

Agud himuon nga normal an ira presensya, naglansar an mga yunit han US han mga sibil-militar nga operasyon ha prubinsya han Quezon ngan Tuguegarao City. Iginlansar liwat hini hadton Abril 6-9 an Salaknib, nga ginpartisiparan han 7,000 nga tropa nga militar. Pinungkay ini ngatanan ha Balikatan 2026 nga ginsesering nga “pinakadako” ngan “malupgop ha bug-os nga kamurupud-an.” Papartisiparan ini han 17,000 nga tropa, diin 10,000 Amerikano ngan an iba tikang ha Pilipinas, Japan, France, Australia, Canada ngan New Zealand. Para ha usa nga aktibidad nga para kunuhay ha “rehiyunal nga seguridad,” bisan usa nga nasud ha Southeast Asia waray magpartisipar dinhi.

Kontra Pax Silica

Ginkundenar liwat han mga patriyotiko nga grupo an pagsulod han rehimen Marcos Jr ha Pax Silica, usa nga programa han US diin magigin kaparte an Pilipinas ha pagsusuplay ha militar han US han kritikal nga mga mineral nga importante ha paghimo han mga higamit pan-gerra. Usa ha mga plano han US an pagtitindog han 1,619 kaektarya nga “economic security zone” ha Luzon para ha produksyon han mga elektroniks nga gagamiton ha ira mga misayl, eroplano nga pan-gerra ngan drone.

Ini nga sona dudumaraon han US hin diri nagbabayad hin plete hin tubtub 99 katuig. Tatagan ini han diplomatic immunity, sugad han embahada han US. Karuyag sidngon, diri ini igpapailarum ha mga balaud han Pilipinas ngan lugod an balaud han US an maungbaw ha sakob han sona ha ekonomiya. Sugad han ira mga sundalo, talwas ha balaud ngan sirot han Pilipinas an ira mga tawuhan dinhi, anuman nga krimen an posible nira mahimo.