Nadumaduma a porma ti tignay ti inyaramid dagiti drayber ken opereytor ti pangpubliko a transportasyon, dagiti mangmangged, nakurapay iti syudad, kabataan estudyante ken dadduma pay a sektor idi Abril 15-17 laban iti nakangatngato a presyo ti langis ken gera nga agresyon ti US ken Israel iti Iran ken dadduma pay a paset ti Middle East. Iti balangkas ti inawagan da a protesta ti umili, naisayangkat ti tigil-pasada, walkout, piket, kalampagan, konsyerto, kampuhan, tigil-palaot, ken motorcade iti Metro Manila, ken iti dadduma a syudad ken prubinsya.

Iti panangiyuna ti Piston (Pagkakaisa ng mga Samahan ng Tsuper at Operator Nationwide), inkasa dagiti drayber ken opereytor ti protesta iti saan a bumaba iti 10 sentro idiay Metro Manila. Adda met ti protesta idiay Legazpi City ken uppat a sentro idiay Cebu City.

Naparalisa ti pinagtipon a tigil-pasada ti Undoc-Piston, KNETCO ken Bacod-Manibela dagiti ruta idiay Bacolod City idi Abril 15. Kabayatanna, nagikasa ti nagsina a tigil-pasada ti grupo a Manibela idiay Metro Manila ken dadduma pay a syudad idi Abril 15-17.

Nag-walkout iti klase dagiti estudyante ti University of the Philippines-Diliman idi Abril 15. Inaramat da met dagiti konsyerto iti UP Fair idi Abril 15-18 tapno itampok dagiti awag kontra gera nga agresyon ti US, nangato a presyo ti langis ken krisis iti ekonomya.

Saan a nagkalap dagiti mangngalap ti Cavite ken Navotas City idi Abril 17 kas paset dagiti tignay. Idiay met laeng nga aldaw, dimmarup ken nagprotesta ti grupo a Kalikasan iti hedkwarters ti Shell iti Bonifacio Global City idiay Taguig City tapno kundenaren ti kinabukatot iti ganansya ti kumpanya.

Paset met ti protesta ti umili ti welga dagiti mangmangged ti Kowloon House West ken ti kampuhan dagiti nakurapay iti syudad iti DSWD, agpada nga iti Quezon City.

Nakikaykaysa dagiti komyuter ken tagasuporta iti panangitakder kadagiti kusina ti umili ken community pantry para kadagiti drayber ken opereytor. Iti panangiyuna ti PARA-Commuters’ Network, naisayangkat ti inisyatiba idiay Metro Manila, kadagiti syudad ti Baguio, Batangas, Cebu ken Davao. Nasaknap a nakipaset ditoy dagiti estudyante manipud kadagiti pangpubliko ken pribado a pagadalan ken unibersidad. Idemdemanda da ti kinainutil ti rehimen Marcos a sungbatan ti arungaing ken panagbisin dagiti nakurapay. Idi Abril 18, maysa a rider ti motorcycle taxi ti pimmusay idiay Quezon City bayat a nakapila tapno makaawat ti nakabasbassit nga ayuda ti rehimen.

Kabayatanna, nagisumite ti Piston ti petisyon para iti ₱10 a panagngato ti plete idi Abril 20 iti Land Transportation Franchising and Regulatory Board (LTFRB) tapno makagiddan ti sapul dagiti drayber iti sango ti nakanginngina a diesel. Didiay met laeng nga aldaw, nagprotesta ti Bus Employees Association of the Philippines iti LTFRB tapno singiren ti ahensya. Manipud Abril 21, isaysayangkat dagiti grupo ti baro a serye ti protesta ti umili.