Mga mag-uuma, nagkampuhan batok sa VAT. Nagpahigayon og kampuhan niadtong Abril 8-13 ang gatusan ka mga mag-uuma, mananagat, ug mamamumuo-sa-kaumahan sa tubuhan, ug uban pang sektor gikan sa District 1 sa Batangas didto sa Liwasang Bonifacio sa Manila. Nagprotesta sila sa atubangan sa House of Representatives sa Quezon City sa ulahing adlaw sa kampuhan. Panawagan nilang tangtangon ang value-added tax (VAT) ug excise tax sa mga produktong petrolyo, pagsaka sa sweldo, ug pag-ubos sa presyo sa mga batakang palaliton.

Mga taga-Laguna, nagpiket batok sa makadaot nga sanitary landfill. Nagprotesta ang mga residente sa Barangay Imok, Calauan, Laguna sa Laguna Provincial Capitol niadtong Abril 8 aron babagan ang plano sa South Luzon Waste Management Corporation nga magtukod og 84.23 ka ektarya sa sanitary landfill sa ilang komunidad. Gitunong nila ang protesta sa adlaw sa espesyal nga sesyon sa Sangguniang Panlalawigan diin gibasura ang permit alang sa proyekto.

Petisyon batok sa pribatisasyon sa Cebu. Gisugdan niadtong Abril 11 sa nagkalain-laing sektor ug grupo sa Cebu City pinaagi sa pagpanguna sa Carbon-hanong Alyansa ang pagpangalap og 100,000 ka pirma batok sa pribatisasyon sa Carbon Public Market. Giduso nila ngadto sa Cebu City Council ang maong petisyon aron mangayo og usa ka lehislatibong lakang ug pagrepaso sa kasabutan sa pribatisasyon.

Lider mamumuo sa Davao, gipanawagang ipagawas. Nagprotesta ang mga progresibong grupo sa Davao City niadtong Abril 9 aron subling ipanawagan ang pagpagawas sa desaparesidong lider-mamumuo sa Southern Mindanao nga si William Lariosa. Ulahing nakit-an si Lariosa sa Barangay Butong, Quezon, Bukidnon kaniadtong Abril 10, 2024 diin gidagit siya sa mga elemento ng 48th IB.

Pagpalisod sa IRRI, subling gikundena. Nagprotesta ang mga grupo sa mga mag-uuma ug kabatan-onan sa atubangan sa International Rice Research Institute (IRRI) sa Los Baños, Laguna niadtong Abril 13 aron kundenahon ang nagpadayon nga pagpalisod sa maong institusyon ngadto sa mga mag-uuma ug sa dili makitawhanong paggamit sa yuta sa unibersidad. Gisaulog niadtong Abril 4 ang ika-66 nga anibersaryo sa pagkatukod sa maong institusyon.