Patarasak ang rehimen US-Marcos kag mga pribado nga korporasyon kag negosyo sa pagpalayas sa mga imol halin sa ila mga komunidad sining Abril. Ginakawat ang ila kinamatarung sa balay, pangabuhian kag kabuhi sa tunga sang nagasingki nga krisis sa ekonomiya dulot sang imperyalistang gyera sang US kag Israel sa Iran kag pagka-inutil sang rehimen US-Marcos.

Sa Quezon City, ginguba sadtong Abril 9 sang National Housing Authority ang mga balay kag istruktura sa NIA Road, Barangay Pinyahan nga nabayaan pagkatapos ang sunod-sunod nga sunog sa komunidad. Pito ka residente ang gin-aresto sang mga pulis sa kasagsagan sang demolisyon. Samtang, masobra 30 ka pamilya ang ginpalayas sa isa ka demolisyon sa Cambridge sa Barangay E. Rodriguez sa Cubao.

Sa Taguig City, ginbungkag sang halos 1,000 ka tinawo sang Monocrete Construction Company kag 300 ka tinawo sang Philippine National Police (PNP) kag SWAT ang barikada sang mga residente kontra sa demolisyon sa Panday Creekside, Barangay Palingon-Tipas sadtong Abril 13. Naggamit ang mga pulis sang tirgas kag ginhabuyan sang mga botelya ang mga residente, samtang nagabantay nga nagataya ang mga isnayper nga pulis sa palibot. Pito ka indibidwal ang gin-aresto sa demolisyon.

Pila ka balay na ang ginguba kag ginabana-bana nga 300 ka pamilya sang mga sharer, renter kag tenant ang mapalayas sa komunidad. Naglab-ot sa 218 ka residente ang temporaryo nga nagpuyo sa kilid sang karsada lakip ang 35 ka bata, 14 ka tigulang, lima ka may deperensya sa lawas, kag apat ka nagabusong.

Sa Laguna, mapintas nga ginguba sang Bambang Land Corporation kag mga pulis ang masobra 70 balay sa Purok 6B, Barangay Bambang, Los Baños sadtong Abril 14. Patraidor nga ginpatigayon ang demolisyon sa pihak sang dayalogo sa tunga sang mga residente kag sang kumpaniya sa adlaw nga ini. Anum na ka dekada nga nagapuyo ang mga residente sa Purok 6B kag sadtong 2004 ginkilala sang gobyerno ang ila kinamatarung sa duta nga ginatindugan.

Sa Aklan, indi magnubo sa 40 ka pamilya ang naperwisyo sa pwersa nga pagpangkudal sa komunidad sa Calachuchi Road, Barangay Andagao, Kalibo sadtong Abril 15. Ginpalibutan sang mga salsalon ang komunidad kag ginkudal ang mga residente, lakip ang mga tigulang, mga nagabusong kag bata. Ginapalayas ang mga residente sang tag-iya sang duta nga si Jesus Daroy.

Sa Iloilo City, mapintas nga ginpalayas sang lokal nga gobyerno ang mga nagabaligya sa higad sang karsada kag sa atubang sang ginpribatisa nga Iloilo Terminal Market nga ginapadalagan sang SM Prime sadtong Abril 10 sang gab-i. Ginpatigayon ini sang Local Economic Enterprise Office, sang PNP kag SWAT. Ginkumpiskar ang ila mga produkto kag ginkawat ang personal nga kagamitan kag kwarta sang mga manugbaligya. Sa sunod nga mga adlaw, nagpadayon ang pagpang-ipit kag pagpalayas sa ila.

Sa Davao City, ginabana-bana nga 100 ka pamilya ang ginpalayas sa demolisyon sang lokal nga gobyerno sa komunidad sa Matina Aplaya sadtong Abril 14. Nagaplano nga magpasaka sang kaso sa korte ang mga residente batuk sa iligal nga demolisyon.

Samtang, mapintas nga ginbungkag ang kampuhan sang masobra 2,000 ka imol nga taga-syudad halin sa Quezon City, Caloocan City kag Bulacan sa pungsodnon nga opisina sang Department of Social Welfare and Development (DSWD) sa Barangay Batasan Hills, Quezon City sugod Abril 13. Ginagiit nila ang kompensasyon ukon bayad-kahalitan sa mga naigo sang kalamidad halin pa sadtong 2025. Pasulit-sulit nga ginpangpahog kag ginpintasan sang mga pulis ang mga imol lakip ang mga tigulang kag kababaehan.

Suno sa Katipunan ng mga Samahang Manggagawa (Kasama), alyado nga organisasyon sang National Democratic Front of the Philippines, mas labi nga nagakatulod ang mga imol kag mala-proletaryado nga usoyon ang banas sang demokratikong rebolusyon sang banwa sa atubang sang nagasingki nga pagpigos kag paghimulos sa ila. Panawagan sang grupo nga pabaskugon kag konsolidahon ang ila mga sandigan nga organisasyon – mga unyon, asosasyon sa mga komunidad, organisasyon sa mga linya sang palangabuhian, kag mga organisasyon sang pumuluyo – kag ang mga rebolusyonaryong organisasyon sang mga mamumugon kag mala-proletaryado.

“Dapat pursigido pa nga pabakuron kag palaparon sang aton kahublagan ang mga paghimakas para sa demokratikong kinamatarung paagi sa mga militante nga paghimakas masa nga nagahangkat kag mas magapamatbat sa mismo pundasyon sang reaksyonaryong sistema,” suno diri.