Walay hunong nga pagpalayas ang gihimo sa rehimeng US-Marcos ug mga pribadong korporasyon ug negosyo sa mga kabus gikan sa ilang mga komunidad karong Abril. Gipanghikawan sila sa ilang katungod sa pabalay, panginabuhian, ug kinabuhi taliwala sa nagkagrabeng krisis sa ekonomiya dala sa imperyalistang gubat sa US ug Israel sa Iran ug kawalay pulos sa rehimeng US-Marcos.

Sa Quezon City, gipangguba sa National Housing Authority niadtong Abril 9 ang mga balay ug istruktura sa NIA Road, Barangay Pinyahan nga nangabilin human sa sagunson nga sunog sa komunidad. Pito ka mga residente ang gipangdakop sa mga pulis samtang gilunsad ang demolisyon. Samtang kapin 30 ka pamilya ang gipalayas sa usa ka demolisyon sa Cambridge sa Barangay E. Rodriguez sa Cubao.

Sa Taguig City, giguba sa dul-an 1,000 ka pwersa sa Monocrete Construction Company ug 300 ka pwersa sa Philippine National Police (PNP) ug SWAT ang barikada sa mga residenteng mikontra sa demolisyon sa Panday Creekside, Barangay Palingon-Tipas niadtong Abril 13. Gigamitan og tirgas ug gipanglabayan og mga botelya sa mga pulis ang mga residente, samtang ang mga isnayper nga pulis nag-atang sa palibot. Pito ka mga indibidwal ang gipangdakop sa demolisyon.

Pipila na nga panimalay ang giguba ug gibana-bana nga 300 ka pamilya sa mga sharer, renter, ug tenant ang papahawaon sa komunidad. Mokabat sa 218 ka mga residente ang temporaryong nagpuyo sa daplin sa dalan nga naglakip sa 35 nga mga bata, 14 nga mga tigulang, ug lima nga baldado, ug upat ka mabdos.

Sa Laguna, bangis nga giguba sa Bambang Land Corporation ang kapin 70 ka balay sa Purok 6B, Barangay Bambang, Los Baños kaniadtong Abril 14. Patraydor nga gipahigayon ang demolisyon bisan pa adunay dayalogo tali sa mga residente ug kumpanya niadtong adlawa. Unom na ka dekada nang nagpuyo ang mga residente sa Purok 6B ug giila na sa gubyerno ang ilang katungod sa maong yuta kaniadtong 2004.

Sa Aklan, dili moubos sa 40 ka pamilya ang naperwisyo sa pugos nga pagkoral sa mga komunidad sa Calachuchi Road, Barangay Andagao, Kalibo niadtong Abril 15. Gipalibutan og mga atupan ang komunidad ug gikordonan ang mga residente, lakip ang mga tigulang, mabdos, ug mga bata. Gipangpahawa sa tag-iya sa yuta nga si Jesus Daroy ang mga residente.

Sa Iloilo City, bangis nga gipahawa sa lokal nga gubyerno ang mga manindahay sa daplin sa kalsada ug atubangan sa pribatisadong Iloilo Terminal Market nga gipadagan sa SM Prime niadtong Abril 10 sa gabii. Gipahigayon kini sa Local Economic Enterprise Office, PNP, ug SWAT. Gikumpiska ang ilang mga produkto ug gikawat ang personal nga mga butang ug kwarta sa mga manindahay. Nagpadayon ang pagpamig-ot ug pagpalayas kanila sa misunod nga mga adlaw.

Sa Davao City, gibana-bana nga 100 ka mga pamilya ang gipahawa sa demolisyon sa lokal nga gubyerno sa komunidad sa Matina Aplaya niadtong Abril 14. Nagplanong magpasaka og kaso sa korte ang mga residente batok sa iligal nga demolisyon.

Samtang, bangis nga gibungkag ang kampuhan sa kapin 2,000 nga mga kabus-sa-dakbayan gikan sa Quezon City, Caloocan City, ug Bulacan sa nasudnong upisina sa Department of Social Welfare and Development (DSWD) sa Barangay Batasan Hills, Quezon City gikan adtong Abril 13. Nanawagan sila og kumpensasyon o kun danyos sa mga biktima sa katalagman sukad niadtong 2025. Makadaghang higayon nga gihulga ug giatake sa kapulisan ang mga kabus lakip na ang mga tigulang ug babaye.

Matod pa sa Katipunan sa mga Samahang Manggagawa (Kasama), usa ka alyadong organisasyon sa National Democratic Front of the Philippines, samot nga giduso ang mga kabus ug mala-mamumuo nga subayon ang dalan sa demokratikong rebolusyon sa katawhan atubangan sa nagkakusog nga pagpanumpo ug pagpahimulos kanila. Panawagan sa grupo nga pakusgon ug konsolidahon ang ilang mga batakang organisasyonmga unyon, organisasyon sa komunidad, organisasyon sa panginabuhian, ug mga organisasyon sa katawhan ug ang mga rebolusyonaryong organisasyon sa mga mamumuo ug semi-proletaryo.

Kinahanglang hingpit nga palig-unon ug palapdon sa atong kalihukan ang mga pakigbisog alang sa demokratikong katungod pinaagi sa mga militanteng pakigbisog sa masa nga mohagit ug labaw pang moigo sa mismong pundasyon sa reaksyunaryong sistema, dugang niini.