Waray respeto an rehimen US-Marcos ngan mga pribado nga korporasyon ngan negosyo ha pagpapalayas ha mga kablas tikang ha ira mga komunidad hini nga Abril. Ginkakawat an ira mga katungod ha balay, pakabuhian ngan kinabuhi ha butnga han natikagrabe nga krisis ha ekonomiya dara han imperyalista nga gerra han US ngan Israel ha Iran ngan kawaray pulos han rehimen US-Marcos.

Ha Quezon City, ginruba hadton Abril 9 han National Housing Authority an mga balay ngan istruktura ha NIA Road, Barangay Pinyahan nga nahibilin kahuman han susrunod nga sunog ha komunidad. Pito nga residente an gin-aresto han mga pulis ha butnga han demolisyon. Samtang, masobra 30 kapamilya an ginpalayas ha usa nga demolisyon ha Cambridge ha Barangay E. Rodriguez ha Cubao.

Ha Taguig City, ginbungkag han haros 1,000 nga tawuhan han Monocrete Construction Company ngan 300 tawuhan han Philippine National Police (PNP) ngan SWAT an barikada han mga residente nga kontra ha demolisyon ha Panday Creekside, Barangay Palingon-Tipas hadton Abril 13. Ginamit an mga pulis han tirgas ngan ginlabugan han mga bote an mga residente, samtang nakahulat na nga pumunting an mga isnayper nga pulis ha palibot. Pito nga indibidwal an gin-aresto ha demolisyon.

Pira nga balay na an ginruba ngan gintatantiya nga 300 kapamilya han mga sharer, renter ngan tenant an mapapalayas ha komunidad. Inabot ha 218 nga residente an temporaryo nga nakaukoy ha ligid han kalsada kaupod an 35 nga bata, 14 nga kalagsan, lima nga mayda kapansanan, ngan upat nga burod.

Ha Laguna, madarahug nga ginruba han Bambang Land Corporation ngan mga pulis an masobra 70 nga balay ha Purok 6B, Barangay Bambang, Los Baños hadton Abril 14. Patraydor nga ginhimo an demolisyon ha luyo han dayalogo giutan han mga residente ngan han kompaniya hiton nga adlaw. Unom kadekada na nga naukoy an mga residente ha Purok 6B ngan hadton 2004 ngan ginkilala han gubyerno an ira katungod ha tuna nga gintitindugan.

Ha Aklan, diri mamenos ha 40 kapamilya an naperwisyo ha pwersahay nga pagkukudal ha komunidad ha Calachuchi Road, Barangay Andagao, Kalibo hadton Abril 15. Ginpalibutan han mga yero an komunidad ngan ginkudal an mga residente, kaupod an kalagsan, mga burod ngan bata. Ginpapalayas an mga residente han tag-iya han tuna nga hi Jesus Daroy.

Ha Iloilo City, madarahug nga gintabrog han lokal nga gubyerno an mga nagbabaligya ha ligid han kalsada ngan ha atubangan han pribatisado nga Iloilo Terminal Market nga ginpapadalagan han SM Prime hadton Abril 10 han gab-i. Ginbuhat ini han Local Economic Enterprise Office, han PNP ngan SWAT. Ginkumpiska an ira mga produkto ngan ginkawat an personal nga higamit ngan kwarta han mga nagbabaligya. Ha sinunod nga mga adlaw, nagpadayon an pan-gigipit ngan pagpapalayas ha ira.

Ha Davao City, gintatantiya nga 100 kapamilya an ginpalayas ha demolisyon han lokal nga gubyerno ha komunidad ha Matina Aplaya hadton Abril 14. Nagpaplano nga magsalawad han kaso ha korte an mga residente kontra ha iligal nga demolisyon.

Samtang, madarahug nga ginbungkag an kampuhan han masobra 2,000 nga kablas ha syudad tikang ha Quezon City, Caloocan City ngan Bulacan ha nasyunal nga upisina han Department of Social Welfare and Development (DSWD) ha Barangay Batasan Hills, Quezon City tikang Abril 13. Gin-iinsister nira an kompensasyon o bayad-danyos ha mga ginlasurbo han kalamidad tikang pa hadton 2025. Pauru-utro nga ginhadlok ngan gindarahug han mga pulis an mga kablas kaupod an kalagsan ngan kababayin-an.

Sigon ha Katipunan ng mga Samahang Manggagawa (Kasama), alyado nga organisasyon han National Democratic Front of the Philippines, mas naduduso an mga kablas ngan baga-trabahador nga hasugon an dalan han demokratiko nga rebolusyon han katawhan ha atubangan han natikagrabe nga panmuypoy ngan paniniyupi ha ira. Panawagan han grupo nga pakusgon ngan konsolidahon an ira mga batakan nga organisasyon—mga unyon, asosasyon ha mga komunidad, organisasyon ha mga linya han panginabuhi, ngan mga organisasyon han katawhan—ngan an mga rebolusyunaryo nga organisasyon han mga trabahador ngan baga-trabahador.

“Kinahanglan pursigido pa nga pakusgon ngan pahiluagon han aton kagiusan an mga pakigbisog para ha demokratiko nga katungod pinaagi han mga militante nga panmasa nga pakigbisog nga naayat ngan mas pagpapabagsak ha pundasyon mismo han reaksyunaryo nga sistema,” sering hini.