Pinakataas nga pagsaludo ang ginhatag sang Partido Komunista ng Pilipinas sa mga martir sang pumuluyong Pilipino nga napatay sadtong Abril 19 sa Barangay Salamanca, Toboso, Negros Occidental.

“Samtang nagasaulog kag nagapyesta ang mga nagahari nga sahi, ginalikupan sang kasubo ang ginapigos nga pumuluyo sa pagkapatay sang mga Pulang hangaway nga naghalad sang ila bug-os nga pagkatawo-osan agud pakig-awayan ang mga pasistang demonyo,” pahayag ni Marco Valbuena, lider opisyal sa impormasyon sang PKP. “Ginapaguwa sang mga pasista ang mga napatay nga kaupod bilang mga ‘kriminal’ kag ‘terorista’ agud tabunan ang ila patarasak nga gyera sang pagpanumpo kag taguon ang mga malala nga pagpang-abuso batuk sa pumuluyo.”

Sa tunga sang disimpormasyon kag kabutigan sang AFP, kahibalo ang pumuluyo sang Toboso kag bug-os nga Negros sang kalig-on sang mga Pulang hangaway sa pagpakig-away para sa mga kinamatarung nila nga mga pigos nga mangunguma. Ginakabig nila ang ila mga Pulang hangaway bilang kaugalingon nga mga bata, nga wala pagkangilin nga nag-alagad sa ila bilang mga doktor,dentista, kabulig sa produksyon, kag manunudlo.

“Putson naton ang ila mga lungon sang Pula nga bandera sang rebolusyon, ibayaw ang aton mga inumol kag isinggit ang ila pagka-baganihan samtang ginadul-ong naton sila sa ila katapusan nga palahuwayan,” panawagan ni Valbuena. Pat-od nga madamo pa ang mahatagan sang inspirasyon sang ila mga sakripisyo agud makig-away kag isulong ang rebolusyon para sa pungsodnon nga kahilwayan kag demokrasya.

Samtang, dapat ibuyagyag kag batikuson ang ginaantus nga grabe nga militarisasyon sang magkaiping nga barangay sang Salamanca kag San Jose. Tungod sini, masobra 600 ka indibidwal ang napilitan nga magbakwit kag temporaryo nga magtener sa sentro sang ebakwasyon. Dapat ipanawagan ang pagrespeto sa ila mga kinamatarung.