Pinakataas nga pagsaludo ang gihatag sa Partido Komunista sa Pilipinas sa mga martir sa katawhang Pilipino nga namatay niadtong Abril 19 sa Barangay Salamanca, Toboso, Negros Occidental.

“Samtang nagsaulog ug naghugyaw sa kalipay ang mga nagharing hut-ong, nabangutan ug nasubo ang katawhang nilupigan sa pagkamatay sa mga Pulang manggugubat nga naghalad sa ilang tanan aron batukan ang mga pasistang mangtas,” pahayag ni Marco Valbuena, pangulong upisyal sa impormasyon sa PKP. “Gidaot sa mga pasista ang mga namatay nga kauban isip ‘kriminal’ ug ‘terorista’ aron tabunan ang ilang walay-hunong nga gera sa pagpanumpo ug itago ang ilang grabeng mga abuso batok sa katawhan.”

Taliwala sa disimpormasyon ug mga bakak sa AFP, sayod ang katawhan sa Toboso ug tibuok Negros sa kalig-on sa mga Pulang manggugubat sa ilang pakigbisog alang sa mga katungod sa mga linupigang mag-uuma. Gitagad nila ang ilang mga Pulang manggugubat isip ilang kaugalingong mga anak, nga walay pagduha-duhang nag-alagad kanila isip mga doktor, dentista, katabang sa produksyon, ug magtutudlo.

“Atong saputan ang ilang mga lungon sa Pulang bandila sa rebolusyon, itaas ang atong mga kamao ug pakusgon ang atong mga tingog samtang nagamartsa aron ihatod sila sa ilang pahuwayanan,” awhag ni Valbuena. Sigurado nga daghan ang mahatagan og inspirasyon sa ilang mga sakripisyo aron makibisog ug iasdang ang rebolusyon alang sa nasudnong kagawasan ug demokrasya.

Samtang, kinahanglan ibutyag ug batikuson ang grabe nga militarisasyon sa magkatupad nga barangay sa Salamanca ug San Jose. Tungod niini, kapin 600 ka indibidwal ang napugos nga magbakwit ug temporaryo nga mipuyo sa sentro sa ebakwasyon. Kinahanglan ipanawagan ang pagtahod sa ilang mga katungod.