Pinakahitaas nga pagpasidungog an iginhahatag han Partido Komunista ng Pilipinas ha mga martir han katawhan Pilipino nga namatay hadton Abril 19 ha Barangay Salamanca, Toboso, Negros Occidental.

“Samtang nagseselebrar ngan nalilipay an mga naghahadi nga klase, duro nga nasusubo an tinalumpigos nga katawhan ha pagkamatay han mga Pula nga mangaraway nga naghalad han ira ngatanan agud atuhan an mga pasista nga halimaw,” pahayag ni Marco Valbuena, puno nga upisyal ha impormasyon han PKP. “Ginpapagawas han mga pasista an mga namatay nga kasama komo mga ‘kriminal’ ngan ‘terorista’ agud tahuban an ira waray wantas nga gerra han panmuypoy ngan itago an grabe nga pangabuso kontra ha katawhan.”

Ha butnga han disimpormasyon ngan buwa han AFP, maaram an katawhan han Toboso ngan bug-os nga Negros an kadig-unon han mga Pula nga mangaraway ha pakigbisog para ha mga katungod nira nga mga tinalumpigos nga parag-uma. Iginkokonsidera nira an ira mga Pula nga mangaraway komo kalugaringon nga mga anak, nga waray pagkamakaiya nga nagserbe ha ira komo mga doktor, dentista, kabulig ha produksyon ngan magturutdo.

“Putuson naton an ira mga kabaong han Pula nga bandera han rebolusyon, alsahon an aton mga kamao ngan iguliat an ira kamabayanihon samtang igindudul-ong naton hira ha ira urhi nga karadtuan,” panawagan ni Valbuena. Piho nga damo pa an matatagan inspirasyon han ira mga sakripisyo agud umato ngan ipasulong an rebolusyon para na nasyunal nga katalwasan ngan demokrasya.

Samtang, kinahanglan ibuksas ngan suknaon an nahiaguman nga grabe nga militarisasyon han magkasapit nga barangay han Salamanca ngan San Jose. Tungod hini, masobra 600 nga indibidwal an napiritan nga mag-ebakwet ngan temporaryo nga inukoy ha sentro han ebakwasyon. Kinahanglan ipanawagan an pagrespeto ha ira mga katungod.