Taliwala sa nagkagrabe nga korapsyon, krisis ug pasismo, mikusog ang panawagan nga iasdang ang gubat sa katawhan aron puuhon ang nagharing dunot nga sistema. Kini ang hinungdan nganong abli kaayo ang pultahan sa Bagong Hukbong Bayan (BHB) sa tanan nga gusto moapil sa paglilok sa bag-ong kasaysayan sa nasud.

Isip bahin sa pagsaulog sa ika-57 nga anibersaryo sa BHB, nakighisgut ang Ang Bayan sa mga kumander ug kadre sa mga yunit sa Luzon aron mahibal-an ang kalabot sa nagkadaghang kauban nga nagpadayag nga gustong moadto sa kabanikanhan, labi na ang mga kabatan-onan, nga buot makigsandurot uban sa mga Pulang mandirigma ug masa sa mga sona gerilya.

Sa pagsalmot sa mga nakigsandurot sa kolektibong pagpas-an sa adlaw-adlaw nga gimbuhaton sa hukbong bayan, labaw pang mihugot ang ilang paggakos sa kahusto sa armadong pakigbisog, ug labaw pang milig-on ang ilang baruganan nga moapil sa BHB.

Pagpangandam sa mga yunit

Hangtod mahimo, gipaningkamot sa yunit nga dawaton ang tanan nga buot makigsandurot. Isip pagpangandam, makuting gitun-an sa yunit ang sitwasyon militar ug giuyon ang mga gimbuhaton aron hatagag importansya ang mga tumong sa mga kaubang bisita. Sa miting sa kumand, ghisgutan ang proseso sa pagsulod sa mga bisita ug unsa ang mahimong programa nila base sa gipasa nga rekomendasyon ug sugyot. Gitun-an usab kung unsa ang kasarian ug gigikanang hut-ong sa mga bisita. Giandam ang dugang suplay nga kinahanglan sama sa duyan, tent, gamit sa lawas, pagkaon ug uban pa.

Sa tanang pagpangandam, importante kaayong katabang ang masa ug sangay sa Partido sa lokalidad.

Ang programa nga gibuhat alang sa mga bisita gibase sa gidugayon sa panahon nga ilang itahan, unsa ang ilang gilauman, gustong matun-an ug ilang kalig-on ug kahuyang. Bahin sa programa ang mga pagtuon sa pulitiko-militar, pagbansay sa martial arts ug self defense, batakang pagbansay medikal, ug mga pagtuon sa Partido ug hukbo. Gipasabut sa yunit sa mga bisita ang posibleng limitasyon sa ilang gustong makab-out subay sa kahimtang militar.

Prayoridad sa mga mobisita nga mahimong kabahin sa gimbuhatong masa, gimbuhatong produksyon, gimbuhatong pangkultura, mga workshop, paghatag og pagtuon, pagtukod og grupo ug uban pang gimbuhaton sa hukbo sama sa lohistika, medikal, ug uban pa.

Pagpangandam sa mga bisita

Gihagit ang mga bisita nga mangandam sa ilang pwedeng masinatian sa kinabuhing gerilya. Sa wala pa mosulod sa sona, maayong masiguro nga natun-an na ang batakang mga dokumento ug regulasyon sa BHB. Labaw sa tanan, maayong masiguro nga hingpit ang baruganan, ug andam ang lawas ug panghunahuna.

“Mahimo makasinati mo og ‘grand experiences,’ mahimo usab og ‘mundane moments,” sumala ni Ka Armand, usa sa mga nangulo sa mga yunit. Gihagit niya ang mga mobisita nga “samtang ania, mag-aktibo kamo sa adlaw-adlaw nga kinabuhi sa hukbo, gamiton og maayo ang matag oras ug minuto.”

Gitambag niya sa kinsamang bisita nga ayaw kahadlok mangutana kung naay gustong masayran, makighisgut sa mga kauban ug moapil sa tanang gimbuhaton—teknikal man o pulitikal. Kung may butang o gimbuhaton nga lisod, ipahibalo dayon sa lider sa iswad o sa inyong tagdumala sa programa.

“Ayaw tan-awa sa inyong kaugalingon isip simpleng bisita, kay integral ka nga bahin sa hukbo sa matag higayon nga ania ka,” tambag ni Ka Armand.

“Mangandam nga posibleng makasinati og panagsangka, tag-as nga lakaw ug uban pa, labi na kay naglunsad kita og armadong pakigbisog,” matod niya. Gipaabot niya nga kinahanglan bantayan ang personal nga mga gamit, ug siguraduhon nga walay importante nga mabilin.

“Kung mapatigbabawan na nimo ang wala naandang mga paagi sa kaugalingon sama sa pag-CR, pagkatulog, paglakaw ug uban pa, mahimong sayon na ang tanan,” matod niya.

Gawas sa mga gamit sa sona, kinahanglan iandam sa mga mobisita ang ilang mga panginahanglan, sama sa mga tambal kung adunay espesyal nga mga sakit ug uban pa.

“Maayo sab siyempre kung naay dalang pasalubong alang sa mga kauban,” tiaw niya.

Labaw sa tanan, importante kaayong iandam ang kaugalingon sa pagtubag sa awhag sa demokratikong rebolusyon sa katawhan aron makadesisyon nga magpultaym sa BHB.