Ha butnga han natikagrabe nga korapsyon, krisis ngan pasismo, natikakusog an panawagan nga ipasulong an gerra han katawhan agud tapuson an naghahadi nga dunot nga sistema. Hinungdan ini kun kay ano abrido gud an purtahan han Bagong Hukbong Bayan (BHB) ha ngatanan nga karuyag nga magpartisipar ha paghimo han bag-o nga kasaysayan ha nasud.

Komo kaparte han pagselebrar ha ika-57 nga anibersaryo han BHB, gin-interbyu han Ang Bayan an mga kumander ngan kadre han mga yunit ha Luzon agud talakayon an natikadamo nga ihap han mga napakadto ha kabaryuhan, labina an mga kabatan-unan, nga karuyag mag-integreyt ha mga Pula nga mangaraway ngan masa ha mga sona nga gerilya.

Ha pagpartisipar han mga nakikig-integreyt ha kolektibo nga pagsugbong han matag-adlaw nga buruhaton ha hukbo han katawhan, dugang nga nahugot an ira pagsantop ha katukmaan han armado nga pakig-away, ngan mas nadig-on an ira paninindugan nga umapi ha BHB.

Pangangandam han mga yunit

Tubtub mahihimo, gintatalinguha han yunit nga karawton an ngatanan nga karuyag nga mag-integreyt. Komo pangandam, lagidgid nga gin-aadman han yunit an panmilitar nga sitwasyon ngan iginhahaum an mga buruhaton para makunsidera an mga katuyuanan han mga kasama nga nag-iintegreyt. Ha miting han kumand, gintatalakay an proseso han pagsulod han mga mabisita ngan ano an magigin programa nira subay ha iginpasa nga rekomendasyon ngan suhestyon. Gin-aadman liwat kun ano an tawoa ngan klase nga gintikangan han mabisita. Igin-aandam an dugang nga suplay nga ginkikinahanglan sugad han duyan, tent, gamit para ha lawas, pagkaon ngan iba pa.

Ha tanan ngatanan nga pangandam, yawe nga kabakyang han mga kumander ngan mangaraway an masa ngan sanga han Partido ha lokalidad.

An programa nga ginbubug-os para ha mga bisita nakabasar ha kaihaon han panahon nga ira igin-aalutaga, ano an ginlalauman, karuyag mahibaruan ngan ira kabaskugan ngan kaluyahan. Kaparte han programa an mga pag-aram ha pulitiko-militar, pagpapahiara ha martial arts ngan self defense, batakan nga medikal nga pagpapahiara, ngan mga pag-aram ha Partido ngan hukbo. Iginpapasantop han yunit ha mga bisita an poyde magin limitasyon ha ira karuyag nga makab-ot subay ha panmilitar nga sitwasyon.

Prayoridad ha mga mag-iintegreyt nga magin kaparte ha buruhaton masa, buruhaton produksyon, buruhaton pankultura, mga palihan, paghahatag han pag-aram, pagbubug-os han grupo ngan iba pa nga buruhaton ha hukbo sugad han buruhaton ha lohistika, medikal, ngan iba pa.

Pangandam han mga mabisita

Gin-aaghat an mga mabisita nga pangandaman an poyde nira maeksperyensyahan nga ginerilya nga kinabuhi. Antes pa sumulod ha sona, ginseseguro nga napag-adman an batakan nga mga dokumento ngan regulasyon ha BHB. Labaw ha ngatanan, seguruhon nga bug-os an panindugan, ngan andam an lawas ngan panhunahuna.

“Poyde kamo makaeksperyensya han ‘grand experiences,’ poyde liwat ‘mundane moments,'” sigon kan Ka Armand, usa ha mga namumuno ha nainterbyu nga mga yunit. Gin-aghat niya an mga nag-iintegreyt nga “samtang aadi, magin aktibo kamo ha matag-adlaw nga kinabuhi han hukbo, imaksimisa an kada oras ngan minuto.”

Ginsasagdunan niya an hin-o man nga mabisita nga diri maawod nga magpakiana kun mayda karuyag mahibaruan, makigsarusaruay ha mga kasama ngan magpartisipar ha ngatanan nga buruhaton—teknikal man o pulitikal. Kun mayda butang o buruhaton nga nakukurian, igpasabot dayon ha lider han iskwad o ha iyo tagdumara.

“Ayaw igtratar an kalugaringon komo simple nga bisita, tungod kay integral kamo nga kaparte han hukbo ha kada panahon nga aadi,” sagdon ni Ka Arman.

“Magin andam nga posible makaeksperyensya han agway, mga hilaba nga kalakat ngan iba pa, labina nga naglalansar kira han armado nga pakig-away,” sering niya. Nagpahinumdom hiya nga kinahanglan hirutan an mga personal nga gamit, ngan seguruhon nga waray importante nga mahibayaan.

“Kun malapayan mo na an mga diri nakahiaraan nga pamaagi ha kalugaringon sugad han pag-CR, pagkaturog, kalakat ngan iba pa, magigin masayon na an ngatanan,” sering niya.

Labot ha mga gamit nga pansona, kinahanglan ig-andam han mga mag-iintegreyt an ira panginahanglan, sugad han mga medisina kun mayda diri ordinaryo nga mga sakit ngan iba pa.

“Maupay liwat syempre kun mayda dara nga panapuan para ha mga kasama,” intremis niya.

Labaw ha ngatanan, importante nga ig-andam an kalugaringon ha pagbaton ha panawagan han demokratiko nga rebolusyon han katawhan nga magdesisyon nga magpultaym ha BHB.