Sa tunga sang nagalala nga korapsyon, krisis kag pasismo, nagabaskog ang panawagan nga isulong ang inaway banwa agud tapuson ang nagahari nga dunot nga sistema. Rason ini kon ngaa tuman ka bukas ang pwertahan sang Bagong Hukbong Bayan (BHB) sa tanan nga luyag nga magpakigbahin sa pagdihon sang bag-o nga kasaysayan sang pungsod.

Bilang kabahin sang pagsaulog sang ika-57 nga anibersaryo sang BHB, ginhinun-anon sang Ang Bayan ang mga kumander kag kadre sang mga yunit sa Luzon, agud talakayon ang nagadamo nga isip sang mga nagakadto sa kaumhan, ilabina ang mga pamatan-on, nga luyag makigpangabuhi sa mga Pulang hanganway kag masa sa mga sonang gerilya.

Sa pagpakigbahin sang mga nakigpangabuhi sa kolektibo nga pag-abaga sang adlaw-adlaw nga hilikuton sang hukbo sang banwa, mas nga nagahugot ang ila paghakos sa kahustohon sang armadong paghimakas, kag labi nga nagalig-on ang ila panindugan nga magpatapo sa BHB.

Paghanda sang mga yunit

Tubtob sa masarangan, ginatinguhaan sang yunit nga batunon ang tanan nga luyag makigpangabuhi. Bilang paghanda, maid-id nga ginatun-an sang yunit ang sitwasyon militar kag ginasanto ang mga hilikuton para hatagan importansya ang mga katuyuan sang mga kaupod nga nakigpangabuhi. Sa sinapol sang kumand, gina-estoryahan ang proseso sang pagsulod sang mga magabisita kag ano ang mangin programa nila base sa ginpasa nga rekomendasyon kag panugyan. Ginahibalo man kon ano ang kasarian kag sahi nga ginhalinan sang magabisita. Ginahanda ang dugang nga suplay nga kinahanglanon kasubong sang duyan, tent, gamit panglawas, pagkaon kag iban pa.

Sa tanan nga paghanda, yabe nga katimbang sang mga kumander kag hangaway ang masa kag sanga sang Partido sa lokalidad.

Ang programa nga ginahimo para sa mga bisita base sa kadugayon sang panahon nga ila italana, ano ang ginasigahum, gusto nga matun-an kag ila kabaskugan kag kahuyangan. Kabahin sang programa ang mga pagtuon sa pulitiko-militar, paghanas sa martial arts kag self defense, sandigan nga paghanas medikal, kag mga pagtuon sa Partido kag hukbo. Ginapahangup sang yunit sa mga bisita ang pwede mangin limitasyon sa ila luyag nga malab-ot santo sa kahimtangan militar.

Prayoridad sa mga makigpangabuhi nga mangin kabahin sa hilikuton masa, hilikuton produksyon, hilikuton pangkultura, mga pandayan, paghatag sang pagtuon, pagtukod sang grupo kag iban pa nga hilikuton sa hukbo kasubong sang hilikuton sa lohistika, medikal, kag iban pa.

Paghanda sang mga magabisita

Gina-engganyo ang mga magabisita nga handaan ang pwede nila ma-eksperyensya sa kabuhi gerilya. Antes magsulod sa sona, segurohon nga natun-an ang sandigan nga mga dokumento kag regulasyon sang BHB. Labaw sa tanan, segurohon nga bug-os ang panindugan, kag handa ang lawas kag panghuna-huna.

“Pwede kamo maka-eksperyensiya sang ‘grand experiences,’ pwede man ‘mundane moments,” suno kay Ka Armand, isa sa mga nagapamuno sa nahinun-anon nga mga yunit. Gina-engganyo niya ang mga nagapakigpangabuhi nga “samtang yari diri, mangin aktibo kamo sa adlaw-adlaw nga kabuhi sang hukbo, suliton ang kada oras kag minuto.”

Ginapanugyan niya ang sin-o man nga magbisita nga indi mahuya nga mamangkot kon may gusto mahibaluan, makig-talakayan sa mga kaupod kag magpakigbahin sa tanan nga hilikuton-teknikal man ukon pulitikal. Kon may butang ukon hilikuton nga nabudlayan, ipahibalo gilayon sa lider sang iskwad ukon sa inyo lider.

“Indi pagtratohon ang kaugalingon nga simple nga bisita, tungod integral kamo nga kabahin sang hukbo sa kada panahon nga yari kamo diri,” panugyan ni Ka Arman.

Mangin handa sa posible maka-eksperyensiya sang inaway, mga malawig nga lalakton kag iban pa, ilabina kag nagalunsar kita sang armadong paghimakas,” suno sa iya. Nagapahanumdum siya nga dapat halungan ang mga personal nga gamit, kag seguraduhon nga wala sang importante nga mabilin.

“Kon malampuwasan mo na ang mga wala maandan nga pamaagi sa kaugalingon kasubong sang pag-CR, pagtulog, paglakat kag iban pa, mangin mahapos na ang tanan.” suno sa iya.

Magluwas sa mga gamit nga pang-sona, dapat ihanda sang mga makigpangabuhi ang ila kinahanglanon, kasubong sang mga bulong kon may indi kinaandan nga mga balatian kag iban pa.

“Maghanda man syempre kon may dala nga pasalubong para sa mga kaupod,” lahog niya.

Labaw sa tanan, importante nga ihanda ang kaugalingon sa pagsabat sa panawagan sang demokratikong rebolusyon sang banwa nga magdesisyon nga magpultaym sa BHB.