Tibuok kusog natong saulogon sa umalabot nga Abril 24 ang ika-53 nga anibersaryo sa National Democratic Front of the Philippines (NDFP). Niining okasyon, labaw pa natong palig-onon ang panaghiusa ug determinasyon sa NDFP ug sa tibuok katawhang Pilipino nga iasdang ang rebolusyonaryong pakigbisog alang sa kagawasan sa nasud gikan sa paghari sa imperyalismong US ug sa lokal nga mga nagharing hut-ong.

Saulogon nato ang mga kadaugan sa NDFP isip pinakakonsolidadong alyansa sa mga progresibo ug patriyotikong pwersa nga nagsulong sa demokratikong rebolusyon sa katawhan. Sa milabayng kapin lima ka dekada, gihiusa sa NDF ang lain-laing demokratikong sektor sa 12-puntong programa niini alang sa pagpaasdang sa nasudnong demokratikong rebolusyon.

Samtang nagbalik-lantaw sa kasaysayan sa walay pagkabugto nga mga pakigbisog, kinahanglan usab mag-andam ang NDFP sa pagpas-an sa labi pang bug-at nga mga katungdanan sa umalabot, labi na sa taliwala sa nagkakusog nga hulga sa mga imperyalistang gubat sa kagawasan, seguridad ug panginabuhi sa nasud, tungod sa nagkagrabeng pagpanggera ug agresyon sa imperyalismong US, aron maangkon o ilogon ang importante nga rekurso sa lain-laing bahin sa kalibutan.

Magkasunod nga giatake sa imperyalismong US ang Venezuela ug Iran, una ug ikatulo nga nasud nga adunay pinakadako nga reserba sa lana sa tibuok kalibutan. Gamit ang iyang gamhanan nga pwersa militar, giligsan sa US ang tanan nga lagda sa internasyunal nga balaod. Dayag usab nga gipanghulga sa US ang Mexico, Colombia, Cuba, Panama, Greenland, ug bisan ang bahin sa teritoryo sa Ukraine.

Nagkagrabe pa ang pagpanggera sa US sa laraw nga mapadayon ang kalibutanong dominasyon atubangan sa estratehikong pagluya sa ekonomiya ug kalibutanong imperyo niini, ug pagtumaw sa lain-laing sentro sa pamatigayon ug sistema sa pinansya nga wala na migamit og dolyar, ug mga alyansa ug tinabangayng militar nga wala sa kontrol nito. Gigamit ug gipasidungog karon sa US ang iyang pwersa militar aron ipugos ang hegemonya sa lain-laing bahin sa kalibutan, ug pugngan ang pagkaylap sa gahom sa mga karibal niining imperyalista, labi na ang China.

Labaw pa nga gipakusog sa US ang kontrol niini sa Pilipinas. Napuliki ang mga kapitalistang Amerikano nga hutdon ug angkonon ang nahibiling bahanding mineral sa nasud, ug ang dagkong yuta aron itukod ang ilang mga plantasyon, ug mga proyekto sa “renewable energy” o pangturismo. Sikreto nga gipirmahan bag-o lang ni Marcos ang usa ka kasabutan sa US (sa takuban sa kuno Luzon Economic Corridor) nga magtugyan og kapin sa 1,620 ektarya ubos sa bug-os nga kontrol sa mga kapitalistang Amerikano, aron kawkawon ug ilogon.

Padayon nga gipakaylap sa US ang presensya militar niini sa Pilipinas. Nagkadaghan ang nakapondo nga tropang Amerikano ug nakapusisyon nga mga misayl ug gamit iggugubat sa mga base militar, parehas sa mga EDCA site ug sa mga sikreto nga pasilidad militar sa lain-laing bahin sa nasud. Tinuig nga nagkadako ang ilang mga ehersisyo militar ug war games, sama sa Balikatan exercises nga misugod karon nga bulan nga giapilan og dili mokubos sa 10,000 tropang Amerikano.

Gigamit sa US ang Pilipinas, lakip na ang South Korea ug Japan, aron palig-onon ang presensya sa mga pwersa militar niini sa mga dagat nga naglibot sa China. Sa South China Sea, gipahigayon niya ang “transparency operations” gamit ang Armed Forces of the Philippines (AFP) ug Philippine Coast Guard aron hagiton ug hulhugon ang China. Plano usab sa US nga itukod ang dako nga dipo sa lana sa Davao Gulf aron magserbisyo sa mga barko de gera niini. Plano usab niini nga itukod ang pabrika sa mga gamit militar (bala, drone ug uban pa) sa Subic ug sa Aurora. Tanan kini bahin sa paggamit sa US sa Pilipinas alang sa agresyong militar, sama sa iyang paggamit sa mga base militar sa mga nasud sa gulpo, alang sa armadong pagpangatake sa Iran.

Ang mga kamot sa tanang sundalong Amerikano namansahan sa dugo sa libuan ka Iranian ug Palestino nga gipatay sa pagpamomba sa US-Israel, sa minilyong gipatay sa mga gera sa agresyon sa milabayng siglo, lakip na ang milyon ka Pilipino nga gipatay sa US sa gera sa pagsakmit niya sa Pilipinas. Dako kaayong insulto sa katawhang Pilipino nga gigamit ang nasud isip pahulayanan sa mga langyawng mananakop, butanganan sa mga armas niini ug lunsaran sa mas daghang gubat sa agresyon. Ang pagguyod sa US sa Pilipinas sa pakigribalan niini sa China sukwahi sa pangandoy sa katawhang Pilipino nga malinawong magpuyo uban sa iyang mga silingang nasud. Tumang pagtamastamas kini sa soberanya sa Pilipinas ug hulga sa kahilwasan niini.

Taliwala niining sitwasyon, dako kaayong hagit sa NDFP nga hiusahon ug pukawon ang katawhang Pilipino aron mobarug batok sa nagkakusog nga hulga sa pagpanggera sa US, ug sa paggamit niini sa Pilipinas isip lunsaran sa mga gera sa agresyon. “Gubat sa katawhan batok sa imperyalistang gera” ang awhag aron bagtason ang dalan sa armadong rebolusyon aron luwason ang nasud gikan sa kuko sa imperyalistang manglulungkab ug mangtas.

Anaa sa maayong kahimtang ang NDFP karon nga pas-anon kining mga katungdanan, labi na sa pagkusog ug paglagsik niini sa milabayng mga tuig. Padayon nga nagkalapad ug nagkalig-on ang mga rebolusyonaryong organisasyon sukad gideklara sa Partido ang kalihukang pagtul-id niadtong 2023. Nagkadaghan ang gitukod nga mga tsapter sa KM, PKM, Armas ug uban pang rebolusyonaryong organisasyon. May pipila nga nakalunsad sa ilang mga nasudnong kongreso ug miting sa mga konseho, samtang padayon nga nagpalapad ug nagkonsolida.

Nakalunsad ang NDFP og mga kumperensya ug miting aron hiusahon ang baruganan sa mga alyadong organisasyon niini sa mga init nga isyu sa katawhan, ug aron magbahinay og mga kasinatian ug lakang sa pag-organisa ug pagpukaw sa masa. Nagkalagsik ang mga aktibidad nga nagpukaw sa daghang masa sama sa mga raling iglap, ug pagpagawas sa lain-laing porma sa propaganda, bisan sa gawas sa nasud. Nagkalapad ang suporta nga nakalap alang sa hukbong bayan samtang nagkadaghan ang nangandoy nga moadto sa kabanikanhan aron mosampa sa armadong pakigbisog.

Palig-onon nato ang kabubut-on nga pakusogon ug palapdon ang NDFP sa okasyon sa ika-53 nga anibersaryo niini. Labaw pa natong palagsikon ang pagtampo ug pagsalmot sa NDFP sa pagpalig-on sa malungtarong gubat sa katawhan, gubat nga gipaasadang sa tibuok katawhan, aron makab-ot ang nasudnon ug katilingbanong kagawasan.