Hul-os karayhak naton nga handumon ha maabot nga Abril 24 an ika-53 nga anibersaryo han National Democratic Front of the Philippines (NDFP). Hini nga okasyon, dugang naton nga padig-unon an pagkakaurusa ngan determinasyon han NDFP ngan han bug-os nga katawhan Pilipino nga ipasulong an rebolusyunaryo nga pakigbisog agud talwason an nasud tikang ha paghahadi han imperyalismo nga US ngan han lokal nga mga naghahadi nga klase.

Igsalin-urog naton an mga kadaugan han NDFP komo pinakakonsolidado nga alyansa han mga progresibo ngan patriyotiko nga pwersa nga nagpapasulong han demokratiko nga rebolusyon han katawhan. Ha naglabay nga masobra lima kadekada, ginbug-os han NDF an magkalain-lain nga demokratiko nga sektor ha 12-kapunto nga programa hini para ha pagpapasulong han nasyunal demokratiko nga rebolusyon.

Samtang nalingi ha kasaysayan han waray hunong nga pakigbisog, kinahanglan mangandam liwat an NDFP ha pagsugbong han sobra nga magbug-at pa nga responsabilidad ha tidaraon, labina ha butnga han natikadako nga hulga han mga imperyalista nga gerra ha katalwasan, kalibrihan ngan pakabuhian han nasud, bunga han natikagrabe nga pan-gegerra ngan agresyon han imperyalismo nga US, agud angkunon o agawon an mga importante nga rekurso ha magkalain-lain nga parte han kalibutan.

Magkasunod nga gin-atake han imperyalismo nga US an Venezuela ngan Iran, syahan ngan ikatulo nga nasud nga mayda pinakadako nga reserba nga lana ha bug-os nga kalibutan. Gamit an iya magbakod nga panmilitar nga pwersa, gintamas-tamas han US an ngatanan nga pagsurundon ha internasyunal nga balaud. Butaray gihap nga gintarhug han US an Mexico, Colombia, Cuba, Panama, Greenland, hasta an parte han teritoryo han Ukraine.

Tikagrabe an pan-gegerra han US ha tuyo nga igpabilin an pankalibutan nga dominasyon atubangan han estratehiko nga pagluya han iya ekonomiya ngan pankalibutan nga imperyo, ngan paglutaw han magkalain-lain nga sentro han negosyuhay ngan pampinansya nga sistema nga diri nagamit hin dolyar, ngan mga alyansa ngan panmilitar nga bubligay nga waray ha iya kontrol. Gin-gamit ngan iginwasiwas yana han US an panmilitar nga pwersa hini agud ig-imponer an hegemoniya ha magkalain-lain nga parte han kalibutan, ngan pugngan an paghiluag han poder han mga karibal hini nga imperyalista, labina gud an China.

Mas ginpapakusog han US an kontrol hini ha Pilipinas. Nagdidinagmit an mga kapitalista nga Amerikano nga ubuson ngan angkunon an nasasalin nga mineral nga karikuhan han nasud, ngan an higluag nga katunaan agud tindugon an ira mga plantasyon, ngan mga proyekto nga “renewable energy” o panturismo. Sikreto nga ginpirmahan diri pala maiha ni Marcos an usa nga kasarabutan ha US (ha tahub han kunuhay Luzon Economic Corridor) nga magsusurender han masobra 1,620 kaektarya ha bug-os nga kontrol han mga kapitalista nga Amerikano.

Dirudiretso nga ginpapahiluag han US an militar nga presensya ha Pilipinas. Nagtitikadamo an naka-istasyon nga tropa nga Amerikano ngan naka-istasyon nga misayl ngan mga higamit pan-gerra ha mga base militar, ngaduha ha mga EDCA site ngan ha mga sikreto nga panmilitar nga pasilidad ha magkalain-lain nga parte han nasud. Kada tuig nagtitikadako an iginhihimo hini nga mga ehersisyo militar ngan war games, sugad han Balikatan exercises nga nagtikang yana nga bulan nga ginpartisiparan han diri mamenos ha 10,000 nga tropa nga Amerikano.

Gin-gamit han US an Pilipinas, hasta na an South Korea ngan Japan, agud pakusgon an presensya han mga panmilitar nga pwersa hini ha mga kadagatan ha palibot han China. Ha South China Sea, ginhihimo hini an mga “transparency operations” gamit an Armed Forces of the Philippines (AFP) ngan Philippine Coast Guard agud ayaton ngan sulsulan an China. Plano liwat han US nga itindog an dako nga istakan han lana ha Davao Gulf agud magserbisyo ha iya mga bokis de gerra. Plano liwat hini nga itindog an pabrika han mga higamit militar (bala, drone, ngan iba pa) ha Subic ngan ha Aurora. Ngatanan ini kaparte han paggamit han US ha Pilipinas para ha panmilitar nga agresyon, kapareho nga gin-gamit hini an mga base militar hini ha mga nasud nga gulpo, para ha armado nga pag-atake ha Iran.

An kamot han ngatanan nga sundalo nga Amerikano mayda mantsa han dugo han yukut-yukot nga Iranian ngan Palestino nga ginpatay ha panmomba han US-Israel, han milyun-milyon nga ginpatay ha mga gerra nga agresyon ha naglabay nga siglo, kaupod an milyon nga Pilipino nga ginpatay han US ha gerra nga pagsakop hini ha Pilipinas. Dako nga insulto ha katawhan Pilipino nga gin-gamit an nasud nga pahuwayan han mga langyaw nga mananakop, istakan han ira mga armas ngan lansaran han mas damo pa nga gerra nga agresyon. An pagdadanas han US ha Pilipinas ha pakigribalay hini ha China sukwahi ha hingyap han katawhan Pilipino nga murayaw nga mabuhi kaupod an mga kasapit hini nga nasud. Butaray ini nga pagtamak ha soberaniya han Pilipinas ngan hulga ha iya kalibrihan.

Atubangan hini nga sitwasyon, dako nga ayat ha NDFP nga bug-uson ngan pukawon an katawhan Pilipino nga tumindog kontra ha tikadako nga hulga han pagegerra han US, ngan paggamit hini ha Pilipinas nga lansaran han mga gerra nga agresyon. “Gerra han katawhan ha imperyalista nga gerra” an panawagan agud hasugon an dalan han armado nga rebolusyon agud talwason an nasud ha kuko han imperyalista nga buwitre ngan parupangatake.

Aada ha maupay nga katindog an NDFP nga sugbungon an mga buruhaton hini, labina ha pagkusog ngan pagrayhak ha naglabay nga mga tuig. Dirudiretso nga nahiluag ngan nadig-on an mga rebolusyunaryo nga organisasyon tikang han igdeklara han Partido an kagiusan pagtutul-id hadton 2023. Tikadamo an gintutukod nga tsapter han KM, PKM, Armas ngan iba pa nga rebolusyunaryo nga asosasyon. Mayda pira nga nakapaglansar han ira mga nasyunal nga kongreso ngan miting han mga konseho, samtang dirudiretso nga nakakapagpahiluag ngan nakagkokonsolida.

Nahimo han NDFP an mga kumperensya ngan miting agud ig-urusa an tindog han mga alyado nga organisasyon hini ha magpaso nga isyu han katawhan, ngan agud magsaruay han mga eksperyensya ngan leksyon ha pag-oorganisa ngan pagpapagios ha masa. Tikarayhak an mga aktibidad nga napukaw ha hiluag nga masa sugad han mga dalikyat nga rali, nga napgpapagawas han magkalain-lain nga porma han propaganda, hasta ha gawas han nasud. Tikahiluag an suporta nga ginkakalap para ha hukbo han katawhan samtang tikadamo an naghihingyap nga kumadto ha kabaryuhan agud magpartisipar ha armado nga pakig-away.

Padig-unon naton an determinasyon nga pakusgon ngan pahiluagon an NDFP ha okasyon han ika-53 nga anibersaryo hini. Labaw naton nga parayhakon an pag-amot ngan pagpartisipar han NDFP ha pagpapakusog han panmaihaan nga gerra han katawhan, gerra nga iginpapasulong han bug-os nga katawhan agud makab-ot an nasyunal ngan pankatilingban nga katalwasan.