Bug-os kapagsik naton nga dumdumon sa maabot nga Abril 24 ang ika-53 nga anibersaryo sang National Democratic Front of the Philippines (NDFP). Sa okasyon nga ini, labi pa naton nga palig-unon ang paghiliusa kag determinasyon sang NDFP kag sang bug-os nga pumuluyong Pilipino nga isulong ang rebolusyonaryong paghimakas para hilwayon ang pungsod halin sa paghari sang imperyalismong US kag sang lokal nga nagahari nga sahi.

Saulugon naton ang mga kadalag-an sang NDFP bilang pinaka-konsolidado nga alyansa sang mga progresibo kag patriyotiko nga pwersa nga nagasulong sang demokratikong rebolusyon sang banwa. Sa nagligad nga masobra lima ka dekada, ginhugpong sang NDF ang lain-lain nga demokratikong sektor sa 12-punto nga programa sini para sa pagsulong sang pungsodnon-demokratikong rebolusyon.

Samtang ginabalikan naton ang kasaysayan sang wala sang untat nga paghimakas, dapat maghanda man ang NDFP sa pag-abaga sang mas mabug-at pa nga katungdanan sa palaabuton, ilabi na sa tunga sang nagadako nga peligro sang mga imperyalistang gyera sa kahilwayan, kaluwasan kag palangabuhian sang pungsod, bunga sang nagasingki nga pagpang-gyera kag agresyon sang imperyalismong US, agud angkunon ukon agawon ang mga malahalon nga rekurso sa lain-lain nga bahin sang kalibutan.

Sunod-sunod nga ginsalakay sang imperyalismong US ang Venezuela kag Iran, una kag ikatatlo nga pungsod nga may pinakadalagko nga reserba sang lana sa bug-os nga kalibutan. Gamit ang iya gamhanan nga pwersang militar, ginatapakan sang US ang tanan nga pagsulundan sang internasyunal nga layi. Barahubal man nga ginpahog sang US ang Mexico, Colombia, Cuba, Panama, Greenland, bisan ang bahin sang teritoryo sang Ukraine.

Nagasingki ang pagpang-gyera sang US sa katuyuan nga ipabilin ang pangkalibutanon nga dominasyon sa atubang sang estratehikong paghuyang sang iya ekonomiya kag pangkalibutan nga imperyo, kag pagtuhaw sang lain-lain nga sentro sang baligyaanay kag sistemang pang-pinansya nga wala nagagamit sang dolyar, kag mga alyansa kag buligay militar nga wala sa iya kontrol. Ginagamit kag ginawara-wara subong sang US ang pwersang militar sini agud ipatuman ang hegemoniya sa lain-lain nga bahin sang kalibutan, kag punggan ang paglapad sang gahum sang mga karibal sini nga imperyalista, ilabi na gid ang China.

Labi nga ginapahugot sang US ang kontrol sini sa Pilipinas. Nagasala-sala ang mga kapitalistang Amerikano nga ubuson kag angkunon ang nabilin nga manggad mineral sang pungsod, kag ang mga malagpad nga kadutaan para patindugan sang ila mga plantasyon, kag mga proyektong “renewable energy” ukon pang-turismo. Likom nga ginpirmahan sang sini lang ni Marcos ang isa ka kasugtanan sa US (sa tabon sang kuno Luzon Economic Corridor) nga magasungka sang masobra 1,620 ektarya sa bug-os nga kontrol sang mga kapitalistang Amerikano, para kawkawon kag hugakumon.

Tayuyon nga ginapalapad sang US ang presensya militar sa Pilipinas. Nagadamo nga nagadamo ang naka-istasyon nga tropang Amerikano kag nakatambak nga misayl kag mga kagamitan pang-gyera sa mga base militar, sa mga EDCA site kag sa mga likom nga pasilidad militar sa lain-lain nga bahin sang pungsod. Kada tuig nagadako nga nagadako ang ginapatigayon sini nga mga ehersiyo militar kag war games, kasubong sang Balikatan exercises nga nagsugod subong nga bulan nga ginpakigbahinan sang indi magnubo sa 10,000 ka tropang Amerikano.

Ginagamit sang US ang Pilipinas, pati na ang South Korea kag Japan, para pabaskugon ang presensya sang mga pwersang militar sini sa mga kadagatan sa palibot sang China. Sa South China Sea, ginapatigayon sini ang “transparency operations” gamit ang Armed Forces of the Philippines (AFP) kag Philippine Coast Guard agud hangkaton kag garit-gariton ang China. Plano man sang US nga itukod ang mga dalagko nga tambakan sang lana sa Davao Gulf para magserbisyo sa iya mga barko de gyera. Plano man sini nga itukod ang paktorya sang mga kagamitan militar (bala, drone kag iban pa) sa Subic kag sa Aurora. Tanan nga ini kabahin sang paggamit sang US sa Pilipinas para sa agresyon militar, kasubong nga gingamit sini ang mga base militar sini sa mga pungsod sa gulpo, para sa armadong pagsalakay sa Iran.

Ang kamot sang tanan nga soldado nga Amerikano may dagta sang dugo sang linibo nga Iranian kag Palestino nga ginpatay sa pagpangbomba sang US-Israel, sang minilyon nga ginpatay sa mga gyerang agresyon sa nagligad nga siglo, lakip ang masobra isa ka milyon ka Pilipino nga ginpatay sang US sa gyerang pag-agaw sini sa Pilipinas. Dako nga insulto sa pumuluyong Pilipino nga ginagamit ang pungsod nga palahuwayan sang mga dumuluong nga manugsakop, tambakan sang ila mga hinganiban kag lunsaran sang mas madamo pa nga gyerang agresyon. Ang pag-ganoy sang US sa Pilipinas sa pakig-ribalan sini sa China taliw-as sa handum sang pumuluyong Pilipino nga malinong nga makigpangabuhi sa mga kaiping sini nga pungsod. Direkta nga pagtapak ini sa independensya sang Pilipinas kag peligro sa iya kaluwasan.

Sa atubang sang sini nga sitwasyon, dako nga hangkat sa NDFP nga hugpungon kag pukawon ang pumuluyong Pilipino nga nagatindog batuk sa nagadako nga peligro sang pagpang-gyera sang US, kag paggamit sini sa Pilipinas nga lunsaran sang mga gyerang agresyon. “Inaway banwa batuk sa imperyalistang gyera” ang panawagan para usuyon ang banas sang armadong rebolusyon agud hilwayon ang pungsod sa kuko sang imperyalistang manug-dagit kag nagapang-atake.

Yara sa paborable nga tindog ang NDFP nga abagahon ang mga katungdanan nga ini, ilabina sa pagbaskog kag pagpagsik sini sang nagligad nga tuig. Tayuyon nga nagalapad kag nagalig-on ang mga rebolusyonaryong organisasyon halin sang gin-deklarar sang Partido ang kahublagan panadlong sadtong 2023. Nagadamo ang ginatukod nga tsapter sang KM, PKM, Armas kag iban pa nga rebolusyonaryong organisasyon. May pila nga nakalunsar sang ila mga pungsodnon nga kongreso kag sinapol sang mga konseho, samtang tayuyon nga nakapalapad kag nakakonsolida.

Napatigayon sang NDFP ang mga kumperensya kag sinapol para hiusahon ang tindog sang mga alyadong organisasyon sini sa mga mainit nga pungsodnon nga isyu, kag para magpaambitanay sang mga inagihan kag pagtulun-an kag pagpahulag sa masa. Nagapagsik ang mga aktibidad nga nagapukaw sa malapad nga masa kasubong sang mga kalit nga rali, kag pagpaguwa sang lain-lain nga dagway sang propaganda, bisan sa guwa sang pungsod. Nagalapad ang suporta nga ginakalap para sa hukbo sang banwa samtang nagadamo ang luyag nga magkadto sa kaumhan agud magpakigbahin sa armadong paghimakas.

Palig-unon naton ang desisyon nga pabaskugon kag palaparon ang NDFP sa okasyon sang ika-53 nga anibersaryo sini. Labi pa naton nga papagsikon ang pag-amot kag pagpakigbahin sang NDFP sa pagpabaskog sang pangmalawigon nga inaway banwa, inaway nga ginasulong sang bug-os nga pumuluyo, agud maagum ang pungsodnon kag sosyal nga kahilwayan.