Magkalain-lain nga porma han paggios an iginhimo han mga drayber ngan opereytor han pampubliko nga transportasyon, mga trabahador, kablas ha syudad, kabatan-unan nga estudyante ngan iba pa nga sektor hadton Abril 15-17 kontra ha hitaas ura-ura nga presyo han lana ngan gerra nga agresyon han US ngan Israel ha Iran ngan iba pa nga parte han Middle East. Ha balayan han gintatawag hini nga protesta han katawhan, iginlansar an ukoy-pasada, walkout, piket, kalampagan, konsyerto, kampuhan, paghunong ha pagpalawod, ngan motorcade ha Metro Manila, ngan iba pa nga syudad ngan prubinsya.

Ha pangunguna han Piston (Pagkakaisa ng mga Samahan ng Tsuper at Operator Nationwide), iginkasa han mga drayber ngan opereytor an protesta ha diri mamenos ha 10 nga sentro ha Metro Manila. Mayda liwat protesta ha Legazpi City ngan upat nga sentro han Cebu City.

Naparalisa han gintig-ob nga ukoy-pasada han Undoc-Piston, KNETCO ngan Bacod-Manibela an mga ruta ha Bacolod City hadton Abril 15. Samtang, naghimo han bulag nga ukoy-pasada an grupo nga Manibela ha Metro Manila ngan iba pa nga syudad hadton Abril 15-17.

Nag-walkout ha klase an mga estudyante han University of the Philippines-Diliman hadton Abril 15. Gin-gamit liwat nira an mga konsyerto ha UP Fair hadton Abril 15-18 agud palandawon an panawagan kontra gerra nga agresyon han US, hitaas nga presyo han lana ngan krisis ha ekonomiya.

Hinunong ha pagpalawod an mga parupangisda han Cavite ngan Navotas City hadton Abril 17 komo parte han mga paggios. Hiton liwat nga adlaw, kinadto ngan nagprotesta an grupo nga Kalikasan ha hedkwarters han Shell ha Bonifacio Global City ha Taguig City agud kundenaron an pagkahakog ha ganansya han kompaniya.

Kaparte liwat han protesta han katawhan an welga han mga trabahador han Kowloon House West ngan kampuhan han mga kablas ha syudad ha DSWD, ngaduha ha Quezon City.

Nakig-usa an mga komyuter ngan tagasuporta ha pagtitindog han mga kusina han katawhan ngan community pantry para ha mga drayber ngan opereytor. Ha pangunguna han PARA-Commuters’ Network, nahilansar an inisyatiba ha Metro Manila, mga syudad ha Baguio, Batangas, Cebu, ngan Davao. Hiluagan nga nagpartisipar dinhi an mga estudyante tikang ha mga pampubliko ngan pribado nga eskoylahan ngan unibersidad. Ginkundenar hini an kawaray pulos han rehimen Marcos nga batunon an ungara ngan kagutom han mga kablas. Hadton Abril 18, usa nga rider han motorcycle taxi an namatay ha Quezon City samtang nakapila agud makakarawat han ura-ura kaguti nga ayuda han rehimen.

Samtang, nagsubmiter han petisyon para ha ₱10 nga umento ha pamasahe an Piston hadton Abril 20 ha Land Transportation Franchising and Regulatory Board (LTFRB) agud makadungan an kita han mga drayber atubangan han sobra kamahal nga diesel. Hiton liwat nga adlaw, nagprotesta an Bus Employees Association of the Philippines ha LTFRB agud sukton an ahensya. Tikang Abril 21, iginlalansar han mga grupo an bag-o nga serye han protesta han katawhan.