Nagkalain-laing porma sa protesta ang gilunsad sa mga drayber ug opereytor sa pangpublikong transportasyon, mga mamumuo, kabus-sa-dakbayan, kabatan-onang estudyante ug uban pang sektor niadtong Abril 15-17 batok sa hilabihang kataas nga presyo sa lana ug gerang agresyon sa US ug Israel sa Iran ug uban pang bahin sa Middle East. Ubos sa gitawag niining protestang bayan, gilunsad ang tigil-pasada, walkout, piket, kalampagan, konsyerto, kampuhan, paghunong sa paglawig, ug motorcade sa Metro Manila, ug sa ubang syudad ug probinsya.

Sa panguna sa Piston (Pagkakaisa sa mga Samahan sa Tsuper ug Operator Nationwide), gilunsad sa mga drayber ug opereytor ang protesta sa dili mokubos sa 10 sentro sa Metro Manila. Aduna usab protesta sa Legazpi City ug upat ka sentro sa Cebu City.

Naparalisa sa giusa nga tigil-pasada sa Undoc-Piston, KNETCO ug Bacod-Manibela ang mga ruta sa Bacolod City niadtong Abril 15. Samtang, naglunsad og bulag nga tigil-pasada ang grupo sa Manibela sa Metro Manila ug ubang syudad niadtong Abril 15-17.

Nag-walkout sa klase ang mga estudyante sa University of the Philippines-Diliman niadtong Abril 15. Gigamit usab nila ang mga konsyerto sa UP Fair niadtong Abril 15-18 aron ipatataw ang mga panawagan batok sa gerang agresyon sa US, taas nga presyo sa lana ug krisis sa ekonomiya.

Wala milawig ang mga mangingisda sa Cavite ug Navotas City niadtong Abril 17 isip bahin sa mga paglihok. Sa maong adlaw, gisulong ug nagprotesta ang grupo sa Kalikasan sa hedkwarters sa Shell sa Bonifacio Global City sa Taguig City aron kundenahon ang pagkahakugan sa tubo sa kompanya.

Kabahin usab sa protestang bayan ang welga sa mga mamumuo sa Kowloon House West ug ang kampuhan sa mga kabus-sa-dakbayan sa DSWD, parehas sa Quezon City.

Nakihiusa ang mga komyuter ug tigsuporta sa pagtukod sa mga kusinang bayan ug community pantry alang sa mga drayber ug opereytor. Sa panguna sa PARA-Commuters’ Network, gilunsad ang inisyatiba sa Metro Manila, mga syudad sa Baguio, Batangas, Cebu, ug Davao. Daghang mga estudyante gikan sa mga pangpubliko ug pribado nga eskwelahan ug unibersidad ang misalmot dinhi. Gitaral niini ang kawalay pulos sa rehimeng Marcos sa pag-atubang sa mga pangayo ug gutom sa mga kabus. Niadtong Abril 18, usa ka rider sa motorcycle taxi ang namatay sa Quezon City samtang nagpila aron makadawat og gamay nga ayuda sa rehimen.

Samtang, nagsumite og petisyon para sa ₱10 taas-plete ang Piston niadtong Abril 20 sa Land Transportation Franchising and Regulatory Board (LTFRB) aron makasugakod ang kita sa mga drayber taliwala sa hilabihan kamahal nga diesel. Sa maong adlaw, nagprotesta ang Bus Employees Association of the Philippines sa LTFRB aron singlon ang ahensya. Sukad Abril 21, gilunsad sa mga grupo ang bag-ong serye sa protestang bayan.