Lain-lain nga dagway sang hublag ang ginpatigayon sang mga drayber kag opereytor sang pangpubliko nga transportasyon, mga mamumugon, imol nga taga-syudad, pamatan-on-estudyante kag iban pa nga sektor sadtong Abril 15-17 batuk sa tuman ka taas nga presyo sang lana kag gyerang agresyon sang US kag Israel sa Iran kag iban pa nga parte sang Middle East. Sa balayon sang ginatawag sini nga protesta sang banwa, ginlunsar ang untat-byahe, walkout, piket, pagpagahod, konsyerto, kampuhan, untat-palawod, kag motorcade sa Metro Manila, kag sa iban nga syudad kag probinsya.

Sa pagpanguna sang Piston (Pagkakaisa ng mga Samahan ng Tsuper at Operator Nationwide), ginkasa sang mga drayber kag opereytor ang protesta sa indi magnubo sa 10 ka sentro sa Metro Manila. May kasubong man nga protesta sa Legazpi City kag apat ka sentro sa Cebu City.

Naparalisa sang gin-isa nga untat-byahe sang Undoc-Piston, KNETCO kag Bacod-Manibela ang mga ruta sa Bacolod City sadtong Abril 15. Samtang, nagkasa sang separado nga untat-byahe ang grupo nga Manibela sa Metro Manila kag iban pa nga syudad sadtong Abril 15-17.

Nag-walkout sa klase ang mga estudyante sang University of the Philippines-Diliman sadtong Abril 15. Gingamit man nila ang mga konsyerto sa UP Fair sadtong Abril 15-18 agud ipa-unod ang mga panawagan kontra gyerang agresyon sang US, mataas nga presyo sang lana kag krisis sa ekonomiya.

Nag-untat-palawod ang mga mangingisda sang Cavite kag Navotas City sadtong Abril 17 bilang parte sang mga hublag. Sa adlaw man nga ini, nagkadto kag nagprotesta ang grupo nga Kalikasan sa hedkwarters sang Shell sa Bonifacio Global City sa Taguig City para kondenaron ang pagkasakon sa ganansya sang kumpaniya.

Kabahin man sang protesta sang banwa ang welga sang mga mamumugon sang Kowloon House West kag ang kampuhan sang mga imol nga taga-syudad sa DSWD, lunsay sa Quezon City.

Nagapakig-isa ang mga komyuter kag tagasuporta sa pagtukod sang mga kusina sang banwa kag community pantry para sa mga drayber kag opereytor. Sa pagpanguna sang PARA-Commuters’ Network, nalunsar ang inisyatiba sa Metro Manila, mga syudad sang Baguio, Batangas, Cebu, kag Davao. Malaparan nga nagpakigbahin diri ang mga estudyante halin sa mga pangpubliko kag pribado nga eskwelahan kag unibersidad. Ginaakusaran sini ang kainutilan sang rehimen Marcos nga sabton ang reklamo kag kagutuman sang mga imol. Sadtong Abril 18, isa ka rider sang motorcycle taxi ang napatay sa Quezon City samtang nagapila para makabaton sang kutimoy nga ayuda sang rehimen.

Samtang, nagsumiter sang petisyon para sa ₱10 saka-pasahe ang Piston sadtong Abril 20 sa Land Transportation Franchising and Regulatory Board (LTFRB) para makalagas ang kita sang mga drayber sa atubang sang tuman ka mahal nga diesel. Sa adlaw man nga ini, nagprotesta ang Bus Employees Association of the Philippines sa LTFRB para sukton ang ahensya. Sugod Abril 21, ginalunsar sang mga grupo ang bag-o nga serye sang protesta sang banwa.