Gin-aresto sa kombinadong pwersa sa pulis, mga espesyal nga yunit sini kag sang 79th IB ang lima ka indibidwal sadtong Abril 22 sang gab-i sa Talisay City, Negros Occidental. Ginpasibangdan sila nga mga Pulang hangaway sang Bagong Hukbong Bayan (BHB) nga nakatakas kuno sa natabo nga maduguon nga masaker sa Toboso sadtong Abril 19.

Ginpaguwa sang mga pwersa sa estado nga may nakuha sa ila nga mga armas kag bomba. Isa sa mga gin-aresto si Julie Ann Balora, miyembro sa pungsodnon nga konseho sang UMA. Sa iya panaysayon, ginbalabagan ang ila sakyanan sang isa ka van nga ginsundan sang madamo pa nga iban nga mga sakyanan. Gintionan sila sang pusil kag ginmanduan nga munaog, muluhod, kag muyuko. Sa detensyon, ginpaidalom sila sa interogasyon nga wala sang abogado kag nakaagi sila sang pisikal nga pagpanakit.