Liwat nga ginpamatud-an ni Department of National Defense Sec. Gilberto Teodoro ang iya pagkauhaw sa dugo kag kontra-kalinong sang direktang ginbalibaran niya ang mga sugyot sang anay mga negosyador kag kalinong para sa Gubyerno sang Republika sang Pilipinas (GRP) nga liwat ablihan ang negosasyon. Ginasugyot ini sang mga anay negosyador pagkatapos sang maduguon nga masaker sa Toboso 19 sa Barangay Salamanca, Toboso, Negros Occidental.

Ginkundenar man sang mga maki-kalinong nga mga grupo ang gilayon nga pagbasura ni Teodoro sa sugyot. Suno nila, pamatuod ini nga indi interesado ang rehimeng Marcos nga sabton ang mga ugat sang armado nga banggianay sa pungsod. Dala sini ang mensahe nga ang mapintas lang nga kampanyang kontra-insurhensya ang gamiton imbes nga solusyonan ang sosyal nga pag-alsa.

Matapos ang sini nga pagbayloanay sang mga pahayag, nagpaguwa sang hayag nga sulat ang Negotiating Team sang National Democratic Front of the Philippines (NDFP), kag nagapasalamat sa mga nagasuporta kag nagaduso sa hambalanon pangkalinong. Nagtaho man ang panel sang mga paglambo matapos nga pirmahan sang GRP kag NDFP ang Oslo Joint Statement sadtong Nobyembre 23, 2023 kung diin nagserbe nga third party facilitator ang Royal Norwegian Government.

Hambal sang NDFP, kalabanan sa mga isyu angot sa kasugtanan nga masami kontrobersyal naresolba na ini sa sulod sang kapin duha ka tuig nga atras-abante nga mga pagpulong. Subongman, may isa nga tig-a nga panindugan ang GRP nga indi mag-uyon ang NDFP nga kabahin sa disposisyon sang rebolusyonaryong armadong pwersa. Ginagiit sa GRP nga dapat ilakip ini sa mangin balayon sang paghambalanay nga wala sang pasiuna nga paghatag duon sa pagresolba sa mga problema sa sosyedad, pang-ekonomiya kag pangpulitika nga amo ang ugat sang armadong banggianay.

Pirmi nga nagapanindugan ang NDFP nga ang Joint Statement dapat maglab-ot sa liwat nga pag-abli sa hambalanon pangkalinong base sa sunod-sunod nga mga substantibo nga adyenda nga malawig na nga nalatag sa niaging kapin 25 ka tuig nga negosasyon sa tunga sang NDFP kag GRP. Nag-ugat ini sa pagtuo nga ang pagresolba sang kasamtangan nga mga sakit sa sosyedad sang Pilipino—kaangay sang malala nga kapigaduhon, kawad-on sang duta kag reporma sa duta, kakulangan sang mga industriya, malala nga korapsyon sa burukrasya, kag kawad-on sang soberanya—ang matuod nga makapasiguro sa usa ka makatarunganon kag pangmalawigon nga kalinong.