Ginpasidunggan sang bilog Partido kag sa tanan nga rebolusyonaryong pwersa sa bilog pungsod ang kabaganihan sang 10 nga Pulang hangaway nga namartir sa gyera batok sa mga pasistang nisulong sa Toboso, Negros Occidental sadtong Abril 19. Nagahilibion ang pumuluyo sa pagkamartir sang ila mga mabuot nga mga anak nga wala sang pagduha-duha nga naghatag sang ila bilog kabuhi para sa kaayuhan sang masang ginpigos sa Negros kag sa paghimakas sang bilog banwa para sa matuod nga kahilwayan kag demokrasya.

Nagapangasubo man sila sa kamatayon sang siyam nga iban pa nga mga indi armadong indibidwal, lakip na ang duha ka bata, nga wala puangod nga ginpatay sang mga lampingasan nga mga sundalo sang 79th IB. Lakip sa ila ang mga pamatan-on halin sa syudad kag iban nga mga pungsod nga nagkadto sa Toboso agud suportahan ang mga masang mangunguma kag mamumugon sa uma sa ila paghimakas para sa pagpangapin sang ila mga kinamatarung sa duta kag pangabuhi.

Upod ang mga pinalangga sang kabuhi sa mga nagtaliwan sa Toboso, naglanog ang singgitan sang mga pumuluyo para sa hustisya. Tubtub san o nakatatak sa pamensaron sang bilog pumuluyo ang handuraw sang mga kabuhi sang pinakamaayo kag pinakamabuot nga mga anak sang banwa. Ginpakita sang malapad nga masa sang Negros ang ila paghigugma kag pag-atipan sa nagtaliwan nga mga Pulang hangaway sang—sa tunga sang pagpamahug sa mga pasistang sundalo—gatusan ka mga kabaryo ang nag-upod sa paglubong sa ila. Ang amo nga pagpakita sa ila pagpalangga sang BHB ang mas magapabakod sa determinasyon sang mga Pulang hangaway nga ipadayon ang ila pagsakripisyo agud bug-os nga tagipusuon nga serbisyohan ang malapad nga masang pumuluyo.

Nakaagum sang mabug-at nga halit ang BHB sa Toboso. Bisan pa man, temporaryo lang ini kag mapangibabawan lang sa masa kag hukbong bayan paagi sa pagkutlo sang mapait nga mga leksyon. Sa handuraw sa mga martir nga napatay sa Toboso, mas mangin mabakod pa ang determinasyon sang BHB nga ipadayon ang paninguha sa pag-usoy sa masanag apang mabudlay kag nagatiyogtiyog nga banas sang rebolusyonaryong armadong paghimakas. Lubos nga determinado ang BHB sa paghulag agud malab-ot ang hustisya para sa mga biktima sang pasistang pagpamigos sang AFP sa Negros kag sa iban pa nga parte sang pungsod. Halin sang dutang ginbisbisan sang dugo sang mga martir sa Toboso magatumaw ang mas madamo pa nga magabangon kag magaarmas sa lain-lain nga sona kag larangang gerilya sa bilog pungsod.

Madulom man nga kabanata ang masaker sang Toboso, nagahatag ini sang kapawa sa mas nagalala nga kahimtang sang padayon nga pyudal nga pagpanghimulos, pasistang kasingki sang estado, kag tuman nga pag-antus sang masang mangunguma kag mamumugon sa uma sa Negros, nga amo ang rason kon ngaa padayon sila nga nagabangon kag naga-uyat sang armas. Mas nagtingkad ang mga rason kon ngaa dapat isulong ang armadong paghimakas para pangapinan ang masa batok sa mapig-uson nga mga nagaharing sahi kag ang ila mga pasistang

Mas nagdabadaba ang handum sang mas madamo nga mga pamatan-on, ilabina ang mga pamatan-on sa kabukiran nga direktang nakasinati sa pyudal nga pagpahimulos kag pasistang kasingki, nga mag-intra sang hukbo sang banwa, kag mag-amot sa paghimakas sang banwa para sa pungsudnon kag sosyedad nga kahilwayan. Ginapukaw sini ang mga pamatan-on nga intelektwal sa kasyudaran nga magkadto sa kabukiran agud magkat-on sa masa kag magapartisipar sa pagpasulong sa inaway banwa.

Sa bilog pungsod, mabakod nga nagabawi sang kusog ang BHB. Padayon nga ginapalapad kag ginapadamo ang mga sona kag larangan nga gerilya, agud maghimo sang mga hilikuton-masa kag maglunsar sang mga taktikal nga opensiba. Bisan diin man nga parte nagapalapad sa kabukiran, mainit nga ginaabi-abi kag hugot nga ginhakos ang mga pulang hangaway sang mga masa nga luyag gid nga ipakigbato ang ila interes kag kinamatarung. Amgo sila nga ang BHB ang sandata nila batok sa mga sahing nagapamigos kag nagahimulos sa ila. Nalangkag sila nga mag-intra sang inaway banwa bilang mga pwersang pangkaugalingon nga pangdepensa sa baryo, bilang milisya o bilang mga soldado sang hukbong bayan.

Tuman ka talom ang mga banggianay sa mga sahi sa kabukiran. Nagalala ang porma sang pagpamigos sa mga agalon may duta sa pag-angkon sang mga manggad nga ginakultibar sang mga mangunguma. Lapnagon ang mga kaso sang pagpang-agaw sang duta kag pagpalayas sa mga mangunguma, subongman sa pagpanghikaw sa mga mangingisda sa ilang ginapangisdaan. Wala untat ang pagpangawat kag pagguba sa kinaiyahan sang mga kumpanya sa minahan kag mga plantasyon sang dalagkoan nga mga dumuluong nga kapitalista kag burgesyang komprador. Kon diin nagabato ang masa sa pagpamigos, ginapaidalom ini sa laye militar agud punggan ang ila paghimakas.

Para sa mga masang ginapigos, makatarunganon kag gikinahanglan ang armadong paghimakas. Mapangapinan lang ang ila kabuhi kag pangabuhian paagi sang pag-armas kag pagbato.

Ang rebolusyonaryo nga armadong paghimakas ang nagapanguna nga porma sang paghimakas sa pagpasulong sa pangmalawigon nga inaway banwa agud mauntat ang mapigoson kag mahimuslanon nga nagaharing sistema. Ginasulong sa armadong paghimakas katimbang ang lain-lain nga porma sang pagbato sang pumuluyo, hayag kag likom, ligal kag iligal, sa kasyudaran kag kabukiran. Isa ka gyera sang mga mangunguma ang inaway banwa bangud nagapanguna sini nga ginahatagan sang duon ang pagpatuman sang rebolusyonaryong programa para sa reporma sa duta.

Isa man ka patriyotiko nga inaway ang inaway banwa nga may tumong nga batoan kag buntugon ang neokolonyal nga estado kag ang bayaran nga AFP sa imperyalismong US. Labi nga kinahanglan ini isulong sa atubang sang imperyalistang panggyera sang US kag sa ginatuga sini nga malala nga krisis sa Pilipinas. Kasabwat sa papet nga rehimeng Marcos, ginaputos subong ang bilog pungsod sang pwersang militar sa US kag mga alyado sa imperyalistang gahum, agud lunsaran sang imperyalistang gyera. Ginalatag subong ang dalan para solong kawaton sang mga monopolyo kapitalistang Amerikano ang duta kag minerall sa pungsod.

Labi nga nangin athag sa pumuluyong Pilipino nga wala na sang iban nga dalan pakadto sa pagtubos halin sa imperyalistang paghari kag pagpangawat, kundi ang banas sang rebolusyonaryong armadong paghimakas.

Padabadabahon naton ang banas sang inaway banwa. Palanugon ang panawagan sa mga pamatan-on nga mamumugon, mangunguma kag mga intelektwal sa kasyudaran, subongman sa guwa sang pungsod, para mag-intra sa Bagong Hukbong Bayan. Palanugon ang singgitan sang mga nagsalmot sa pagkulit sa bag-o nga kasaysayan pakadto sa hilway kag masanag nga palaabuton sang pungsod.