Sa pahayag sini sadtong Mayo 1, nanawagan ang Revolutionary Council of Trade Unions (RCTU), alyadong organisasyon sang National Democratic Front of the Philippines, sa sahing mamumugon nga Pilipino nga uyatan ang makasaysayanon nga katungdanan nga pamunuan ang demokratikang rebolusyon sang banwa para ihilway ang pungsod halin sa imperyalismong US, pyudalismo, kag burukrata kapitalismo. Ginhatagan duon sang grupo ang importansya sang madamuan nga pag-organisa sang mga mamumugon para mapatuman ini.

Suno sa RCTU, kinahanglan pangibabawan sa kahublagan mamumugon ang mga sakit sa pulitika kaangay sang ligalismo, ekonomismo, repormismo, NGOismo, kag sektoralismo para maundanon nga makaamot sa pagsulong sang inaway banwa. Panawagan sini nga ipatuman ang masunod nga mga tahas:

Organisahon ang pinakamadamo nga mga mamumugon ilabina ang mga kontraktwal para madamuan nga itukod, pabaskugon, kag palaparon ang mga matuod, militante, kag anti-imperyalistang mga unyon. Indi magpahigot sa mga legal nga depinisyon sa laye kon sin-o lang ang mangin katapuan sang unyon.

Pahulagon ang mga kasapi sang unyon nga mag-organisa sang pareho man niya nga mamumugon sa ginapulian nila nga mga komunidad. Kinahanlan nga mosabat ini sa pag-organisa sa mga kubos nga taga syudad, pamatan-on, kag mga kababaenhan sa komunidad. Paagi ini para matungdan ang tahas nga ihiusa ang mga mamumugon kag iban pa nga ginahimuslan nga sektor isip ubod sang hilikuton masa sa kasyudaran.

Ubos-kaya nga isulong ang mga paghimakas pang-unyon kag pang-ekonomiya kaangay sang pataas suhulan, pagbasura sa kontraktwalisasyon kag pleksible nga pagpamugon, kag iban pa. Kinahanglan man pamunuan kag hugot nga makighiliugyon ang mga mamumugon sa mga pungsodnon nga paghimakas.

Sa dagan sang pagpasulong sang mga kampanya kag paghimakas masa, dapat himuon ang tanan nga porma sang propaganda kag pagtuon. Kinahanglan ipalapnag ang mga pagtuki sang RCTY sa mga adlaw-adlaw nga isyu kag ilapag ang alternatibo nga programa sang demokratikong rebolusyon sang banwa.

Sa nataran sang organisasyon, kinahanglan tukuron ang mga sangay sang Partido Komunista sang Pilipinas sa mga empresa para padamuon kag pabaskugon ang mga rebolusyonaryong unyon. Kadungan sini, dapat tipunon ang mga abanteng mamumugon sa mga sangay sang Pulang Brigada ng mga Manggagawa (PBM) sa kada departamento o linya sang trabaho sa mga empresa, sa mga shift, kag/ukon sa mga komite sa unyon.

Ang sangay sang Partido, katimbang ang mga balangay sang PBM, ang magaporma sang rebolusyonaryong konseho sa sulod sang paktorya. Ang nagadamo nga rebolusyonaryong konseho ang magaporma sa pungsodnon nga pormasyon sang RCTU. Buot singganon sang pagbaskog sang RCTU ang nagadako nga suporta para sa armadong paghimakas sa Bagong Hukbong Bayan (BHB) sa kabukiran.

RCTU sa Laguna. Sadtong Abril 29-30, naghatag sang mga polyeto ang RCTU nga nagaunod sang mga pahayag sini sa mga sentrong syudad sang Laguna. Gatusan ka mga polyedo ang ginpanagtag sa tumong nga ganyaton ang mga mamumugon nga maghulag kag mag-intra sa demokratikong rebolusyon sang banwa.