Sadtong Agosto 27, pagahiwaton ang ika-lima nga Green Energy Auction sang Department of Energy (DoE). Diri ginatanyag sang mga kumpanya sa enerhiya ang mga panugda para makakuha sang kontrata sa DoE. Ini ang una nga auction nga para lang sa mga proyektong offshore wind farms (OSW).

Isa ka grupo sang mga turbina ang OSW nga ginapatindog sa dagat agud magtuga sang kuryente hali sa baskog nga hangin sa ibabaw sang tubig. Duha ini ka klase, ang nagalutaw nga turbina kag nagatindog sa idalum sang dagat.

Sadto pang 2019, hugot nga ginaduso sang World Bank ang pagpatindog sang OSW sa Pilipinas. Sadtong 2022, ginpaguwa sini ang “Offshore Wind Roadmap for the Philippines,” isa nga komprehensibong ubay sa kon paano ipatuman kag palambuon ang OSW sa pungsod. Isa sa hugot nga rekomendasyon sini ang pagpatugot sang 100% nga pamuhunan sang dumuluong kag pagpadasig sa proseso sang aplikasyon sini.

Suno sa institusyon, may potensyal ang pungsod nga magatuga sang 178 gigawatts (GW) nga kuryente halin sa proyekto nga OSW. Pwede man nga magatuga sang tubtub 40GW sang kuryente sa baybayon sang Northwest Luzon, Manila, Northern Mindoro, Southern Mindoro, Guimaras Strait, kag Negros/Panay West.

Gilayon nga nisunod ang gobyerno sa Pilipinas sa rekomendasyon sang World Bank. Sadtong Abril 19, 2023, nagpaguwa ang rehimeng Marcos sang ehekutibo nga kamandoan nga maghimo sang patakaran kag administratibong balayon para sini. Lakip sa ginamando sang rehimen ang pagpadasig kag pagpasimple sa pag-apruba sa mga permit para sa mga proyekto. Nagpahuwa man sang kamandoan ang DoE nga nagatugot sa mga dumuluong nga kumpanya sang 100% nga pagpanag-iya sa mga proyektong renewable energy (RE) sa pungsod.

Sadtong Agosto 2024, 92 nga kontrata sang OSW ang gin-aprubahan sang DoE. Target sang rehimeng Marcos nga mapatindog ang una nga proyekto sang OSW pag-abot sang 2028 kag mapatindog ang dugang nga 150 nga dalagkuan nga OSW sa 2040.

Agud agresibo nga iduso ang OSW sa pungsod, nagtigana sang pondo kag teknikal nga bulig ang internasyunal nga institusyon. Sadtong 2024, naghatag sang $400,000 ang Asian Development Bank sa gobyerno para sa pagpalambo sa mga pantalan isip suporta sa konstruksyon sang mga OSW, samtang nagpautang ang World Bank sang $800 milyon sadtong Marso 2025 para sa pagpadasig sa pagbalhin sang pungsod pakadto sa “berde nga enerhiya.”

Epekto sa kinaiyahan

Dako ang epekto sa kinaiyahan sa pagpatindog sang OSW, partikular sa mga sapat sa kalatian kag dagat. Ang konstruksyon kag operasyon sa mga turbina magapalayas sa mga isda kag sapat sa dagat kaangay sang mga dolphin, dugong, bagis, pawikan, kag iban pa nga ginakabig nga mabutang sa peligro. Mahalitan ang mga koral kag pulu-an sang mga isda kaangay sang tilapia, bangus, hipon, talong, kag iban pa. Ini ang mga nanguna nga ginakuhaan sang pangabuhi sa mga mangingisda.

Ang mismong presensya sang turbina ang magapalayas kag magabutang sa peligro sa iban pang migratoryo kag kabog bangud sa pagkabangga sa mga turbina, gahud, kag pagkatublag sa ila mga puluy-an kag ginakuhaan sang pagkaon. Sandig sa datus, minilyon nga mga kabog kag pispis ang nangamatay sa bilog kalibutan bangud sini.

Epekto sa pangabuhian sang pumuluyo

Pipila sa mga makahalalit nga proyektong RE sa pungsod ang planong OSW nga ipatindog sa San Miguel Bay sa Camarines Sur kag Camarines Norte kag sa Pagudpud, Ilocos Norte, kag sa parehas nga ginpanag-iyahan sang Copenhagen Infrastructure Partners, kumpanya nga nakabase sa Denmark.

Sakop sang proyektong 1GW nga OSW ang 23, 307 ektarya sa baybayon sang apat nga banwa sa Camarines Sur, kag isa nga banwa sang Camarines Norte. Ginbulubanta nga nasa 6,000 nga mangingisda ang madulaaan sang pangabuhi bangud sa proyekto. Kasosyo sang kumpanya ang Acen Corp. Sang Ayala Group sa proyekto. Magluwas sa Copenhagin, may ara anum nga proyektong OSW ang gintalana man nga ipatindog sa amo nga baybayon.

Sa Ilocos Norte, maglab-ot sang 6,339 nga rehistrado nga mga mangingisda halin sa apat nga munisipyo ang maapektuhan sang 2GW BuhaWind Floating Windmill. Indi pa lakip diri ang indi rehistrado nga mga mangingisda. Sa konstruksyon, indi pagatugutan nga managat ang mga mangingisda sa mo nga erya sa sulod sang tatlo ka tuig. Pagkatapos sang konstruksyon, ginbawalan ang mga mangingisda nga magpalapit sa sulod sang 50 metro nga radius sa palibot sa mga turbina. Kasosyo sang Copenhagen sa proyekto ang PetroGreen Energy Corporation nga ginpanag-iyahan sang pamilya Yuchengco.

Ang Copenhagen ang nanguna nga dumuluong nga kumpanya nga 100% nga namuhunan sa OSW. Sadtong 2003, nakakuh ang kumpanya sang 25 tuig nga service contract sa pagpagana sa proyekto nga OSW sa Camarines Norte kag Sur, Pangasinan, kag Northern Samar.

Pagbato sang pumuluyo

Sadtong Abril 22, nasa 200 mangingisda halin sa grupong Tanggol San Miguel Bay Network ang nagmartsa halin Sabang Fishport pakadto sa People’s Park sa Calabanga, Camarines Sur agud kundenahon ang plano nga kontruksyon sang San Miguel Bay Offshore Windmill Project.

Aktibong ginbatokan sang grupong Saluadan Network to Defend the Environment kag Livelihood, ang gin-propose nga Buhawind Wind Farm sa Ilocos Norte. Pila ka beses na nga naglunsar sang fluvial protest ang grupo katimbang ang mga taong-simbahan sa rehiyon. Naglunsar man sang online petition ang grupo para sini.