Sunod-sunod nga protesta ang ginlunsar sang lain-lain nga grupo batok sa Balikatan kag mga imperyalistang gyera sang US sa lain-lain nga bahin sang kalibutan. Sadtong Abril 22, nagmartsa ang mga grupong pangkinaiyahan kag iban pang organisasyon halin Taft Avenue, Manila, pakadto sa US Embassy isip pagselebrar sa Earth Day. Ginkundenar nila ang rehimeng US-Marcos sa pagpasulod sini sa “Pax Silica” kag ginapasabat ang US kag Israel sa panggyegyera sini sa Middle East nga nagtuga sang malala nga halit sa sosyedad kag kinaiyahan sa Asya.

Sadtong Abril 28, nagkadto man sa embahada sang US ang mga estudyante kag lider Moro sa idalum sang Youth for Justice and Peace para ipanawagan ang pagtapos sang gyera sa US sa Iran. Ginpanawagan nila ang pagbasura sa Enhanced Defense Cooperation Agreement nga ginpirmahan sadtong Abril 28, 2014.

Sadtong Abril 23, nagtipon ang mga organisasyon sang akademiko, progresibo, relihiyoso, mga alagad sang sining, kag iban pa para ilunsar ang Stop the US-Israel War in Iran Campaign Network. Ginhimo ini sa Bulwagang Tandang Sora sa University of the Philippines-Diliman, Quezon City. Ginpatindog ang network para magserbe nga malapad nga alyansa sang mga grupo kag indibidwal nga kontra sa gyerang agresyon sang US sa Iran, Palestine, kag Lebanon. Ginatukod ang kaangay sini nga network sa halintang sang rehiyon kag lokalidad sa pungsod.