Naglanog sa mga kadalanan sa bilog pungsod kag sa luwas sa pungsod ang protesta kag paghulag sang masobra 30,000 ka Pilipino sadtong Mayo 1, Pangkalibutanon nga adlaw sang Mamumugon. Militante silang nanindugan para sa pataas sang suhulan, panubo sang presyo sang gas kag mga balaklon, kag pag-untat sa gyerang agresyon sang US-Israel sa Iran.

Sa Maynila, nagmartsa ang linibo ka mamumugon kag analbalhas pakadto Mendiola. Ginpangunahan ang paghulag sang National Wage Coalition kon diin katapo sini ang Kilusang Mayo Uno (KMU), Bukluran ng Manggagawang Pilipino, Nagkaisa Labor Coalition, kag Trade Union Congress of the Philippines.Nakig-ugyon man sa martsa ang Labor Consultative Assembly kon diin kabahin ang Caritas Philippines, Laban Manggagawa at iban pa nga grupo. Bangud ginpalibutan sang liboan ka mga pulis ang Malacañang, napilitan ang mga mamumugon nga maghiwat sang programa sa intersekyon sang Nicanor Reyes kag Recto Avenue. Matapos sini, ginpangunahan sang KMU ang martsa pakadto sa embahada sang US. Nanawagan sila sa gilayon nga pag-untat sa gerang agresyon sang US-Israel sa Iran nga nagatuga sang wala tupong nga krisis sa Pilipinas kag sa bilog kalibutan.

Sa gawas sang Metro Manila, naglunsar sang mga paghulag sa pagpanguna sang KMU sa mga syudad sang Baguio, Angeles, Calamba, Legazpi, Tacloban, Cebu, Iloilo, Bacolod, kag Davao, kag sa mga sentro nga banwa sa Zambales, Bataan, Bulacan, Cavite, Aklan, Capiz, Iloilo City, kag Dinagat Islands. Sa luwas sang punsod, ginpamunuan sang Migrante ang protesta sa mga migranteng mamumugon nga Pilipino sa pito ka syudad sa US, Canada, United Kingdom, France, the Netherlands, Germany, Italy, Hong Kong, South Korea, kag Japan.