Inton Agosto 27, maangay ti maika-lima a Green Energy Auction ti Department of Energy (DoE). Ditoy ket agidiaya dagiti kumpanya iti enerhiya kadagiti lungalong tapno makaala ti kontrata iti DoE. Daytoy ti umuna a subasta a para laeng kadagiti proyekto nga offshore wind farms (OSW).

Ti OSW ket ummong dagiti turbina a maitaktakder iti baybay tapno agpataud ti kuryente manipud iti napigsa nga angin iti rabaw ti danum. Dua a klase daytoy—ti nakatapaw a turbina ken nakatakder iti uneg ti baybay.

Idi pay 2019, napigsa nga idurduron ti World Bank ti panangitakder ti OSW iti Pilipinas. Idi 2022, inruar daytoy ti “Offshore Wind Roadmap for the Philippines,” maysa a kumprehensibo a tarabay nu kasano a maipatungpal ken padur-asen ti OSW iti pagilyan. Maysa kadagiti nairut a rekomendasyon ti World Bank ti panangipalubos iti 100% a gangannaet a panagpuonan ken panangpapardas iti proseso ti aplikasyon ditoy.

Segun iti institusyon, addaan potensyal ti pagilyan a makapartuat ti 178 gigawatts (GW) ti kuryente manipud iti proyekto nga OSW. Mabalin met a makapataud ti agingga 40GW ti kuryente iti kabaybayan ti Northwest Luzon, Manila, Northern Mindoro, Southern Mindoro, Guimaras Strait ken Negros/Panay West.

Dagus a simmurot ti gubyerno ti Pilipinas kadagiti rekomendasyon ti World Bank. Idi Abril 19, 2023, nagiruar ti rehimen Marcos ti ehekutibo a mandato iti panangbukel ti patakaran ken administratibo a balangkas para ditoy. Kabilang iti inmandar ti rehimen ti panangpapardas ken panangpasimple iti panangaprubar kadagiti permit para kadagiti proyekto. Nagiruar met ti mandato ti DoE a mangpalpalubos kadagiti gangannaet a kumpanya a 100% nga agtagikwa kadagiti proyekto a renewable energy (RE) iti pagilyan.

Idi Agosto 2024, 92 kontrata ti OSW ti inaprubaran ti DoE. Target ti rehimen Marcos a makaitakder ti umuna a proyekto nga OSW inton 2028 ken makaitakder ti nayon a 150 a dadakkel nga OSW inton 2040.

Tapno agresibo nga iduron ti OSW iti pagilyan, nagilatang ti pondo ken teknikal a tulong dagiti internasyunal nga institusyon. Idi 2024, nangted ti $400,000 ti Asian Development Bank iti gubyerno para iti panangpadur-as kadagiti sangladan kas suporta iti konstruksyon dagiti OSW, bayat a nagpautang ti World Bank ti $800 milyon idi Marso 2025 para iti panangpapaspas ti panagakar ti pagilyan iti “berde nga enerhiya.”

Epekto iti kalikasan

Dakkel ti epekto iti kalikasan ti panangitakder ti OSW, partikular kadagiti ayup iti kabakiran ken baybay. Ti konstruksyon ken operasyon dagiti turbina ket mangiyabog kadagiti ikan ken ayup iti baybay kas kadagiti dolphin, dugong, pating, pawikan ken dadduma pay a maibilang nga agpegpeggaden. Madadael dagiti koral wenno pagtaengan dagiti ikan ken bumaba ti kalidad ti danum a mangitunda ti pannakapukaw ken/wenno pannakatay dagiti ikan kas ti tilapia, bangus, ipon, kappo ken dadduma pay. Dagitoy ti kangrunaan a pagtataudan ti pagbiagan dagiti mangngalap.

Ti mismo a presensya ti turbina ket mangpatalaw ken mangitunda met ti peggad kadagiti billit a migratoryo ken paniki gapu iti pannakaidungpar da kadagiti turbina, kasta met ti ringgor ken pannakadistorbo iti pagtaengan ken pagtaudan ti taraon da. Segun iti datos, minilyonen a paniki ken billit ti natay iti intero a lubong gapu kadagitoy.

Epekto iti pagbiagan ti umili

Kabilang kadagiti kakarwan a managdadael a proyekto nga RE iti pagilyan ti plano nga OSW a maitakder iti San Miguel Bay idiay Camarines Sur ken Camarines Norte ken idiay Pagudpud, Ilocos Norte, nga agpada a sanikwa ti Copenhagen Infrastructure Partners, kumpanya a nakabase idiay Denmark.

Saklaw ti proyekto nga 1GW nga OSW ti 23,307 ektarya nga igid-baybay iti uppat nga ili ti Camarines Sur ken maysa nga ili iti Camarines Norte. Agarup 6,000 a mangngalap ti mapukawan ti pagsapulan gapu iti proyekto. Kasosyo ti kumpaya ti Acen Corp. ti Ayala Group iti proyekto. Malaksid iti Copenhagen, adda pay innem a proyekto nga OSW a naituding a maitakder iti nasao nga igid-baybay.

Idiay Ilocos Norte, dumanon iti 6,339 rehistrado a mangngalap manipud iti uppat a munisipyo ti maapektaran ti 2GW BuhaWind Floating Windmill. Saan pay a karaman ditoy dagiti saan a rehistrado a mangngalap. Iti konstruksyon, mapawilan a tumapog dagiti mangngalap iti nasao nga erya iti unos ti tallo a tawen. Kalpasan ti konstruksyon ket maparitan dagiti mangngalap nga umasideg iti uneg ti 50 metro a radius iti aglikmot dagiti turbina. Kasosyo ti Copenhagen iti proyekto ti PetroGreen Energy Corporation a sanikwa ti pamilya a Yuchengco.

Ti Copenhagen ti umuna a gangannaet a kumpanya a 100% a nagpuonan iti OSW. Idi 2023 a nakaala ti kumpanya ti 25 tawen a service contract para iti panangpaandar iti proyekto nga OSW idiay Camarines Norte ken Sur, Pangasinan ken Northern Samar.

Panaglaban ti umili

Idi Abril 22, adda 200 mangngalap manipud ti grupo a Tanggol San Miguel Bay Network ti nagmartsa manipud Sabang Fishport agturong iti People’s Park idiay Calabanga, Camarines Sur tapno kundenaren ti plano a konstruksyon ti San Miguel Bay Offshore Windmill Project.

Aktibo a supsupyaten ti grupo a Saluadan Network to Defend the Environment and Livelihood ti gakat a Buhawind Wind Farm idiay Ilocos Norte. Mano a daras a nagiyaramid ti fluvial protest ti grupo kadwa da dagiti tao’t simbaan iti rehiyon. Nagisayangkat met ti grupo ti online petition para ditoy.