Balbaliw a pinaneknekan ni Department of National Defense Sec. Gilberto Teodoro ti kina-uwaw-iti-dara ken kontra-kapya idi agdadata a nagkedkedan na ti singasing dagiti sigud a negosyador iti kapya para iti Gubyerno ti Republika ti Pilipinas (GRP) a balbaliw a luktan ti negosasyon. Insingasing daytoy dagiti sigud a negosyador kasaruno ti nadara a masaker iti Toboso 19 idiay Barangay Salamanca, Toboso, Negros Occidental.

Kinundenar dagiti maka-kapya a grupo ti dagdagus a panangibasura ni Teodoro iti singasing. Kunada, pammaneknek daytoy a saan nga interesado ti rehimen Marcos a sungbatan dagiti ramut ti armado a risiris iti pagilyan. Awit daytoy ti mensahe a ti laeng brutal a kampanya a kontra-insurhensya ti aramaten imbes a risuten ti panagrukwas ti kagimongan.

Kasaruno dagiti sinnukat a pablaak, nagiruar ti silulukat a surat ti Negotiating Team ti National Democratic Front of the Philippines (NDFP) ken nagyaman kadagiti sumupsuporta ken mangidurduron ti saritaan iti kapya. Nag-ulat met ti panel kadagiti panaggunay kalpasan a pirmaan ti GRP ken NDFP ti Oslo Joint Statement idi Nobyembre 23, 2023 nu sadinno a nagserbi a third party facilitator ti Royal Norwegian Government.

Segun iti NDFP, kaadwan kadagiti isyu seknan iti katulagan a kaadwan ket kontrobersyal, ket naresolba iti uneg ti nasurok dua a tawen dagiti atras-abante a pulong. Nupay kasta, adda ti maysa a natangken a takder ti GRP a saan nga umanamong ti NDFP kanaig iti disposisyon ti rebolusyonaryo nga armado a pwersa. Ipetpetteng ti GRP a kasapulan nga iraman daytoy iti agbalin a balangkas ti panagsasarita a saan nga umuna nga ikkan atensyon ti panangresolba kadagiti problema iti gimong, ekonomya ken pulitika a ramut ti armado a risiris.

Kanayon a tumaktakder ti NDFP a ti Joint Statement ket rumbeng nga agtungpal iti balbaliw a panaglukat ti saritaan iti kapya basar iti panagsasaruno dagiti sustantibo nga adyenda a nabayagen a nakaidatag iti napalabas a nasurok 25 tawen ti negosasyon iti baet ti NDFP ken GRP. Nakaramut daytoy iti pammati a ti kaykaysuna a panangrisut kadagiti agdama a sakit ti gimong a Pilipino—kas ti nakaro a kinarigat, kinaawan ti daga ken reporma iti daga, kinakurang dagiti industriya, nakaro a korapsyon iti burukrasya ken kinaawan ti soberanya—ti pudno a makasigurado iti maysa a nainkalintegan ken mataginayon a kapya.