Gipamatud-an pag-usab ni Department of National Defense Sec. Gilberto Teodoro ang iyang pagka-uhaw-sa-dugo ug kontra-kalinaw sa dihang direkta niyang gibalibaran ang mga sugyot sa mga kanhi negosyador sa kalinaw para sa Gubyerno sa Republika sa Pilipinas (GRP) nga ablihan og balik ang negosasyon. Gisugyot kini sa mga kanhi negosyador human nahitabo ang madugoong masaker sa Toboso 19 sa Barangay Salamanca, Toboso, Negros Occidental.

Gikundena sa mga grupong maki-kalinaw ang dinaliang pagbasura ni Teodoro sa maong sugyot. Matud pa nila, tinuud nga walay interes ang rehimeng Marcos nga sulbaron ang mga gamot sa armadong panagbangi sa nasud. Nagdala kini og mensahe nga brutal lang nga kampanyang kontra-insurhensya ang gamiton imbes nga sulbaron ang pag-alsa sa katilingban.

Taliwala niining mga binayloay og pamahayag, nagpagawas og abli nga sulat ang Negotiating Team sa National Democratic Front of the Philippines (NDFP) ug nagpasalamat sa mga nagsuporta ug nagduso sa panaghisgut alang sa kalinaw. Nagtaho usab ang panel sa mga pag-uswag human gipirmahan sa GRP ug NDFP ang Oslo Joint Statement niadtong Nobyembre 23, 2023, diin nagsilbing third party facilitator ang Royal Norwegian Government.

Sumala sa NDFP, kadaghanan sa mga isyu bahin sa kasabutan nga sagad kontrobersyal, naresolba na sulod sa kapin duha ka tuig nga tipas-tipas nga mga panagtigum. Bisan pa, adunay usa ka gahi nga baruganan sa GRP nga wala nauyonan sa NDFP adunay kalabutan sa disposisyon sa rebolusyonaryong armadong pwersa. Ginapugos sa GRP nga kinahanglan iapil kini sa gambalay sa panaghisgut nga wala una paghatag og pagtagad sa pagsulbad sa mga problemang sosyal, pang-ekonomiya, ug pangpulitika nga maoy gamot sa armadong panagbangi.

Makanunayong nagabarug ang NDFP nga ang Joint Statement kinahanglang mosangpot sa pag-abli og balik sa panaghisgut alang sa kalinaw base sa pagkahan-ay sa mga sustantibong adyenda nga dugay nang nakalatag sa milabay nga kapin 25 ka tuig nga negosasyon tali sa NDFP ug GRP. Nakagamot kini sa pagtuo nga ang pagsulbad lamang sa kasamtangang mga sakit sa katilingbang Pilipino—sama sa grabeng kakabus, kawad-on og yuta ug reporma sa yuta, kakulang sa mga industriya, grabe nga korapsyon sa burukrasya, ug kawalay soberanya—ang tinuod nga makaseguro sa usa ka makatarunganon ug malungtarong kalinaw.