Sa Shangri-La Dialogue sa Singapore, nagpinagusto si Gilberto “Gibo” Teodoro Jr, sekretaryo sa depensa sang rehimen Marcos, bilang tiglibod sang mga pinakagrabe kag militaristang patakaran sang imperyalismong US. Diri, gin-engganyo niya ang mga pungsod nga magsunod sa kumpas sang US kag nagpresentar nga mangin tig-koordinar sang mga ini sa Asia. Daw ido-buang, masupog niya nga gin-atake ang mga nagasumpong sa US. Ang Shangri-La Dialogue nga ginhiwat sadtong Mayo 29-31 tuigan nga pagtililipon sang mga opisyal sa depensa sa Asia.

Sa pagtililipon, bug-os ang pagpahambog nga gindeklarar ni Teodoro ang Pilipinas bilang “Archipelagic Sentinel” kag “tagpangapin sang hilway nga kadagatan.” Sandig ini sa estratehikong katuyuan sang US nga gamiton bilang dako kag libre nga forward operating base ang pungsod sa pakig-gasgasan sini sa China. Basehan sang tanyag nga ini ang National Defense Strategy sang US sa pagwara-wara sang gahum militar sang Amerikano ukon “peace through strength.” Ginabugaw ni Teodoro ang mga base, pasilidad kag engklabo sang Pilipinas indi lang sa US, kundi pati sa mga abyan sini, para gamiton nga lunsaran sang mga operasyon militar, tambakan sang opensibong mga armas, kag pabrika para sa produksyon pang-gyera.

Hugot nga ginpangapinan ni Teodoro ang US, pati man ang Japan, batuk sa mga kritisismo sang hegemonismo sa Asia. Gindepensahan niya ang militarismo nga gobyerno ni Sanae Takaichi kag ang kasaysayan sang brutal nga pagpanakop sang Japan sa Asia, lakip ang Pilipinas, sadtong Ikaduha nga Inaway Pangkalibutanon. Gintawag niya nga “indi makatarungan” kag “sayop nga pagbasa sa kasaysayan” ang mga pagpapreska sa mga krimen sa inaway sang imperyalistang Japan. Sa pihak ini sang lapnagon nga pagpamatuk sang pumuluyong Japanese sa pagbuhi sa mga probisyon sa konstitusyon kag layi nga nagadumili sa Japan nga magpasilabot sa ano man nga gyera.

Mas nga ginhigot ni Teodoro ang Pilipinas sa estratehikong mga interes sang US. Ginpirmahan niya, upod sang sekretaryo sang Department of War sang US nga si Pete Hegseth, ang 15-tuig Communications Interoperability and Security Memorandum of Agreement sadtong Mayo 30. Sa idalum sang iya pagpamuno, duha na ka kasugtanan sa “pagpaambitanay sang datos paniktik” nga nagabuyagyag sang mga hambalanon internal kag pangseguridad sang Pilipinas sa mga dumuluong nga tropa ang iya ginpirmahan. Siya man ang nagduso kag nagpirma sang apat ka kasugtanan militar nga nagapahanugot sa libre nga pagsulod-guwa sang mga dumuluong nga tropa nga alyado sang US sa pungsod.

Gindayaw sang kriminal sa gyera nga si Hegseth si Teodoro nga lubos nga nagasuporta sa luyag sang US nga magtalana ang mga pungsod sa Asia sang tubtob 3.5% sang mga gross domestic product ukon GDP sini (masobra ₱1 trilyon, kon sa Pilipinas) para sa gasto pangdepensa. Para sa 2026, napasaka na ni Teodoro ang badyet sang papet nga AFP sang 12% kumparar sa 2025 ukon halin ₱378.9 bilyon padulong ₱423.7 bilyon. Tungod aminado nga indi makasabat sa rekisito sa badyet, gintanyag sang rehimen Marcos ang libre nga paggamit sa mga pasilidad, rekurso kag duta sa mga pwersang Amerikano. Suno kay Hegseth, dapat “sundon” sang iban ang Pilipinas sa hambalanon nga ini.

Sa sulod sang pungsod, nagapanguna nga tigtib-ong sang militaristang doktrina si Teodoro batuk sa pumuluyo kag kahublagan kontra imperyalistang gyera sang US, ilabina sa mga pwersang ginapamunuan sang Partido Komunista sang Pilipinas. Ka-koros sang agalon niya, ginakabig niya nga “terorismo” ang armado nga pagpakig-away sa imperyalistang pagpangkawkaw kag pagpanghimulos. Gindayaw niya ang madugo nga kampanya kontra-insurhensiya nga nagresulta sa mga masaker kag krimen sa inaway. Sang sini lang, gindayaw kag nakigsalo-salo pa siya sa mga tropa sang 79th IB nga yara sa likod sang masaker sang 19 ka indibidwal,lakip ang duha ka menor-de-edad, sa Toboso, Negros Occidental. Tuman ka supak man siya sa ano man nga pakighinun-anon pangkalinong sa rebolusyonaryong kahublagan para solbaron ang ugat sang armado nga kagamo.

Ginatiglawasan ni Teodoro ang pinakapapet kag militarista nga kinaiya sang reaksyonaryong estado sang Pilipino. Una siya nga nagserbe nga sekretaryo sa depensa sang korap nga rehimen Arroyo. Antes mangin sekretaryo sang korap man nga rehimen Marcos, nagserbe siya sa board of directors sang dumuluong nga kumpaniya sa pagmina nga Sagittarius Mines, Incorporated. Ang kumpaniya kilala sa pagpang-agaw sang duta sang mga B’laan para sa Tampakan Copper-Gold Project kag brutal nga pagpangsumpo sang ila pakig-away.

Halin siya sa pamilya Cojuangco, isa ka pamilya sang mga berdugo nga agalon mayduta kag burukrata-kapitalista. Nangin kongresista siya sang una nga distrito sang Tarlac halin 1998 tubtob 2007. Nag-ambisyon siya nga mangin presidente sadtong 2010 apang napaslawan. Sadtong 2022, nagtilaw siya nga makig-alyansa kay Sara Duterte para himuon siya nga bise-presidente sini. Hinablos siya ni Eduardo “Danding” Cojuangco Jr, nagapanguna nga kroni sang pasistang diktadurya ni Marcos Sr, subongman sang anay presidente Corazon Aquino, nga bantog naman sa mga pagmasaker sang mga sakada kag mangunguma.